Read Southern Rengma Naga JOSHUA 8 Bible Online

JOSHUA 8 - Southern Rengma Naga bible

JOSHUA 8

¹Npugü le Joshua ka zoshü, “Shüpahü aphu zen-o Ai ki nsin lo. Nshvu nmvue shese nya. Ale Ai raja gü so kvukelo pe ntsüti; a-temi, nyida lo a-kazü le hagun hon.

²Hagun le Jeriko lo a-raja ge thyü keshü hontse Ai lo a-raja ge thyülo, ai nthu gwen we kanyü lo senru pe hagun hon thyülo. Anyugun no shamvu tse sizin nyida gü whe nrün ndolo.”

³Tsügenyu Joshua le a-shüpahü aphu zen Ai ki nsin titse ndolo. A-le a-temi teri kegwatsin yie shenryü kejülo-o kheje nyu anyu ni shüo

⁴anyugun ka, “Nyida gü lizin, nithen sa kemvu ka kebu tselo; whe nrün ndo binlo, tse ahza pe tsüshü.

⁵Ale atemi zen-o nyida kho nni ryüti. Tson-o Ai temi le a gun whe ryülo, khenyüme ki hontse agun le ranio tin shüti.

⁶Anyu no nyida gü zen nithen lo kemvu then agun le anyu nsü zentin lati. Anyu kerüchün le himhundyü hontse agun le anyu nshvu bin nle tse lati.

⁷Tsonketse ka hagun le chwiryü nyida gü lolo. Npugü hagun Sunggigü le tsü pe hagun tsüti.

⁸Npugü le johoshü kela hontse hagun le nyida gü lolo lo roshü la. Ahza pe hagun ketsü le hidan.”

⁹Joshua le anyu gun nishüo anyugun le gü Ai nkhün zin, Ai lo Bethel au jaka khwebin. Joshua le tsüje kensenbin nyu bin.

¹⁰Joshua le lonyü nshwe so-o shüpahü dan ko kequen lo. Tson-o a-le Israel sharhi ju zen lo-o temi dan tsonrio Ai ki gü.

¹¹A-le shüpahü dan zen nyida nyu keyü tsonlvu nyu tesozin kensenbin thyülo, Ai anyu jaka ketejon nme le bin.

¹²A-le temi yiepvün zen gü Ai lo Bethel au jaka nkhün zin kebu la.

¹³Shüpahü ketsen pe teri thyü nrün ndao nyida tesozin kensenbin da günyu lo a-sen no nkhün zin tse shü. Tsüje Joshua le ketejon nyu bin.

¹⁴Ai raja gü le Joshua temi dan hyu keshüka, whütse ndolo. A-le lo a-temi aphu Jordan ketejon nyu himhundyü hontse Israel nyu zen kega titse chwiryü, sizin a-wheryü nrün shamvuo.

¹⁵Joshua lo a-temi dan le tesen ni kebin rothyüo, tin tehen yhun kemvu kipon güla.

¹⁶Nyida günyu temi aphu ko kequen lo njüo Joshua sithen-o anyugun hü sentse nyida zen nithen tinla.

¹⁷Ai nyu temi aphu Israel nyu hüo nyida khinshe shülao temi nme-e tsü khwe mvula.

¹⁸Tsüselo Npugü le Joshua ka zoshü, “Nmi pe Ai ru lo; Ale tsü pe ntsü bin nle.” Joshua le Npugü le zokeshü hontse thyü shü,

¹⁹lo a-le a-ben shwe shü ntsin kebu kebin dan le whütse nyida günyu yü gü lolo la. Anyugun le nyida gü nyu yü lo nye mhun roshü la.

²⁰Ai temi dan le ranio nrishü laryü tsangne ki mah kekhu hyushü. Anyugun le thame ka tin keloi ndila, Israel nyu tin-o tehen yhun kemvu kipon kegü dan le ranio anyu when ryükela genyu.

²¹Joshua lo a-temi dan le kecha dan le nyida gü lolo njüo robin kela hyushüo rani ryü Ai temi gaso.

²²Israel nyu le nyida gü nyu nsheryüo kecheo terithyü. Tson-o Ai temi le Israel nyu le anyugun hun kenthünlo kela hyulo, lo anyugun aphu gala. Nme-e tinmvu lo nme rhün lomvu.

²³Ai raja gü nti. A-ten zen Joshua ki ryü.

²⁴Israel nyu le shwikerüchün le anyu hüo tehenyhun kemvu ki keryü ka tsünyu anyu le tsüdan aphu dushvula. Tson-o rani Ai ki gü temi aphu dushvula.

²⁵Joshua le a-mi penso pe Ai ru lo-o tsünyu temi aphu dushvula kemvuthen a-ben süshe mvu. Tsü jonyü Ai nyu temi apentha peche lo tenu kesin yie tseryü kenyhun dushvula.

²⁷Npugü le Joshua ka zokeshü hontse Israel nyu le nyida günyu nyurhün lo kanyü dan pe anyu hon thyülo.

²⁸Joshua le Ai rola lo nkela. Nthu keti tsü le tson bin.

²⁹A-le Ai raja gü pe sen ge hü lao, no tson bin ngwen gü ti. Yhüko chela ntsin Joshua le simin gü khishe la lotse ahza shüo khishe pe nyida gü khinrun ka keto la. Anyugun le tso kechon pe a-so khwe pe nthu keti tsüka bin nyo.

³⁰Lo Ebal kazüthun ge Joshua le Npugü Israel Sunggigü kershvubin nme thyüshü.

³¹A-le Npugü go gü Mosa le pe Israel nyu tsükeshü, Mosa tejvü nyu kezo hontse tsü then-o thyüshü: “Tegi keyhenvü pe kesü kemvu tso pe kershvubin nme thyüshü.” Tsüge anyugun le kero kershvu lo kepfüshe kershvu dan thyü pe Npugü tsü.

³²Tsünyu Israel nyu yhühyu ka, Joshua le Mosa le thu keshü tejvü gü tsü pe tso ge thu kela shü.

³³Israel nyu le, anyu sharhi ju, kedanyu, kerapen nyu lo anyu dan nyu kehü tesin tse zen-o Npugü Kejozenkelo Khinpha lizin hizin so-o tsü pen kehü Levinyu Püshükeda ju ntsun bin. Ponha le a-sizin pe Gerizim kazüthun kipon shü lo kecha dan le a-sizin pe Ebal kazüthun kipon shü. Npugü gogü Mosa le anyugun no jochü hyulo nrün gwenkho le ryü lo hihontse lotse johoshü njü.

³⁴Tson-o Joshua le tejvü apentha swü tetso shü, tejvü gü nyu thu kebin hontse jochü lo shochün sin-o,

³⁵Mosa le johokeshü nme me tse aphu Joshua le swü pe tenunyu, ntsenyu lo anyu dan nyu kehü tesin kequen kebin apentha hishü.