Read Southern Rengma Naga JOSHUA 9 Bible Online

JOSHUA 9 - Southern Rengma Naga bible

JOSHUA 9

¹Jorda nkhün zin rincho ki lo ketejon nyu kebin lo Mediterranean zida kerhon gü tesozin Lebanon keti raja nyu aphu Israel nyu kekvu rüla shala; hile Hitnyu, Amornyu, Kanan nyu, Periznyu, Hivnyu lo Jebus nyu raja ju.

²Anyugun aphu kengü kekvu kerhün lo njüo Joshua lo Israel nyu zen kega ti tse ryü.

³Ai Gibeon nyu temi, (tsüle Hivnyu) le Joshua le Jeriko lo Ai ge nyuthyü shüyo nyülo-o,

⁴anyugun le a-sala titse rhilo. Anyugun le thula ren nyu ketyüketsü shülo lo vainzu dan khin khülo njüo pe gada khvu thyülo.

⁵Anyu le phinya renryü lo phakü khü kethyü pfü. Anyugun le pfü kehü tensü le nko lo keri gwenla.

⁶Anyugun le kensenbin Gilgal ka gü Joshua lo Israel nyu dan ka zoshü, “Agun le kazü nithen ki ryüle. Lo hagun zen-o gwatho lanyü bin nle,” tsonshü.

⁷Ai Israel nyu le zoshü, “Agun le nyuthyü hagun zen gwa tho mon? Hagun le agun kho ka bin-e logwa.”

⁸Anyu le Joshua ka zoshü, “Agun le n lothyü tile.” Joshua le anyu ka, “Hagun le dikipon nyula? Lo dikipon ryüla?”

⁹Tsontsin anyugun le tha rüla hi pe a-ka zoshü: “Kedagü, agun le kazü nithen saki ryüle, Npugü hagun Sunggigü rüla nyü kelo genyu. A-le Ijipt nyu thyü keshü rüla aphu agun le sha

¹⁰lo Jordan npho zin Amor raja hvu ge nyuthyü shüyo nyü lo laso tsüle Ashtaroth nyu yhun kehü Heshbon raja Sihon lo Bashan raja Og au ge.

¹¹Tson-o agun sharhi ju lo a kazü nyu kebin temi aphu agun no kenjwe tsonyu kesen ketyüketsü nda lo-o ryü hagun teno shü lotse zoshü le. Agun le hagun gonyu, tsügenyu agun zen gwatho lalo tse zoshü le.

¹²Agun tensü shwishü ta. Agun le hagun teno titse ka nken-o tsonchü keshü a-keyün pfü kehü le ntsoka we nko lo kerin gwen laso.

¹³Agun le vain zu nla kethyü ka a-khin keshün le ntso ka we nrhen laso. Njwen thonri pe agun phinya lo phakü le ren laso.”

¹⁴Israel nyu le Npugü ka ketso shwi mvutse anyugun ketyü ketsü peha lolo la.

¹⁵Joshua le Gibeon temi dan zen kepfüshe titse gwatho lao anyugun no yhun bin.Lo Israel sharhi ju le gwatho kenjü tsü then titse anyugun jo shüla.

¹⁶Gwatho kela jonshen siki Israel nyu le temi hidan le anyugun khoka yhun kebin shalo.

¹⁷Tson-o Israel nyu le tson chü shüo jonshen siki temi hi dan le yhun kebin Gibeon, Chephirah, Beeroth lo Kiriath Jeerim nyida dan ka ryülo.

¹⁸Ai Israel nyu le anyugun dushvu lo shvula, anyugun sharhi ju le Npugü Israel nyu Sunggigü zan sen-o anyugun ka johoshü kela genyu. Temi aphu sharhi ju ka hizo kenya,

¹⁹ai anyugun le zoshü, “Agun le Israel nyu Npugü Sunggigü zan nyu zoshwi shü laso. Tsügenyu ntsoka anyugun nthyü nnyü loho so.

²⁰Agun le zoshwishü kenjü genyu anyugun no yhun bin mvu loshvu; nmvu yatselo Sunggigü le shaja pe ngun tsüti.

²¹Anyugun no yhun bin ai anyugun le ngun sen lü lo zü pfü ti.” Sharhi nyu jule anyugun ka tson zoshü.

²²Joshua le Gibeon temi dan zenryü lo tse ahza hoshü, tson-o anyu ka ketsoshü, “Nyuthyüo hagun le hika yhun bin-e kazü nithen ki kebin nyu le tse agun sala ola?

²³Hagun le hihontse thyükela genyu, Sunggigü le hagun nmu bin nle. Hagun temi le azin tse do thyü hüti, a Sunggigü kershvuka gü genyu sen lü lo zü pfü ti.”

²⁴Anyugun le zoshü, “Kedagü, agun le tson lale, kechagenyu mvule Npugü hagun Sunggigü le a-go gü Mosa no kazü hi apentha pe hagun tsü lo hagun le ketu shülo tsü nyu kebin nyu dushvu lalo tse johokeshü tsü le ketsin tse agun le sha kela genyu. Agun le hagun nshvuritsin lo agun si nshvu kela genyu le.

²⁵Ntsoka we agun le nben nyu bin laso, n mhundyü ka nyu le a-zü yo agun ge tsü thyülo.”

²⁶Tson-o Joshua le anyugun ntsen lo-o Israel nyu no anyugun dushvu lamvu.

²⁷Ai a-le anyugun no Israel nyu do thyüo Israel nyu genyu lo Npugü kershvubin gü genyu sen lü lo zü pfü. Nthu keti Npugü le a-kershvubin thyü titse kejü kelo bin günyu anyugun le thatho higü thyü hü.