Read Southern Rengma Naga 2 THESSALONIANYU 1 Bible Online

2 THESSALONIANYU 1 - Southern Rengma Naga bible

2 THESSALONIANYU 1

¹Paul, Silvana lo Timothi tse nyugun le thu pe n Pvü lo Npu Jisu Khrista kipon bin kela Thessalonia nyu kehun gü ketsü.

²Sunggigü n Pvügü lo Npugü Jisu Khrista ka nyu chwikeryü shwikenjün lo nyun kebwen gü no hagun zen bin kelo gü thyülo.

³Apvünyu ju, ale hagun genyu Sunggigü shwen zin mvulo shvu laso; lo tsühontse thyü zü. Kechamvule hagun ketenyen le mi kenye sa chwi jü, lo hagun lihigüe khinyunyu keso chon kenye kebin genyu.

⁴Tsügenyu ale hagun le mele hagun shwe kethyü nyue lo hagun le kenjün kethyü le hagun ge keryü ka-e nyhenhi kehü lo hagun le nnu mvu bin kehü lo ketenyen genyu Sunggigü kehun dan nyu hagun genyu a sherhün sa bin hünyo.

⁵Hile Sunggigü le ketsin nyu temi jünkera kehü shalo kegwa nme, kechamvule ntsoka kenjün thyü kebin hi aphu genyu hagun le a-keda nyu yülo kekü thyülo ti.

⁶Sunggigü le nyu le nzhü yo tsü thyü ti. A-le kenjün kethyü khipe hagun no kenjün thyü kebin nyu dan tsüti.

⁷Npugü Jisu Khrista le tsangge jolo kekvu ju zen-o me yhühyu thyü tsüryü ti, a-le kerüyü khipe hagun kenjün thyü kebin dan tsüti, lo ako atsü ti.

⁸Ai mah nnyü kebin nyu shaja khipe Sunggigü shakemvu ju lo ngun Npugü Jisu jolokegwa gü zenlo kemvunyu ju tsüti.

⁹Anyugun le Npugü lo a-zankechwi kethyü kekvu gü ze kekho lati, tson-o kethonthen kenjün kethyü kenke nyu shaja hyu loti.

¹⁰A-le tsünyü ryülo a-temi aphu ka zankechwi loti, lo a-tenyen kehü nyu aphu ka kerühvu pvüti. Hagun-e ale hagun ka jünzo keshü gü tenyenlo kela genyu, hagun ko tsüdan dan nyu bin ti.

¹¹Tsügenyu ale Sunggigü no a-kekvu nyu hagun thyü pe a-le hagun no yhunlo tseo hagun ko kelo keyhun nyu yhun kekü thyülo, lo hagun le thatho kegwa thyü nyü kebin lihi-e thyülo, lo ketenyen tho gü thyü penlo lo tse hagun genyu hizin bin hü nyo.

¹²Tson-o ngun Sunggigü lo Npugü Jisu Khrista shwikenjün nyu hagun genyu n gun Npugü Jisu zankechwi thyülo ti, lo hagun-e agenyu zankechwi thyülo ti.