Read Southern Rengma Naga 2 THESSALONIANYU 2 Bible Online

2 THESSALONIANYU 2 - Southern Rengma Naga bible

2 THESSALONIANYU 2

¹Lo apvünyu ju, n Npugü Jisu Khrista le nigunryü nrün lo ngun le gungü a-mhundyü nyu kequen nrün rüla pe hagun tesha bin nyo.

²Tsüle hagun no temi peha le Kapu nyu zo mvue peha le jünzo kethyü ka nmvue Npugü le ryüla sele tse kethyü ale lesü thu shü letseo hagun no hagun nyun keyhun kerun nnmvue hagun nyun kenjün thyüla mvulo nrün genyu le.

³Temi nme-e no hagun sala nya; tejvü gwün kerho lo serikemvu dan nkela nrün nyu le me yhühyu thyü chwiryü teri kemvu ka we jon tsügü le gunryü loho.

⁴A-le me ntsun lo a-npvü a-thyü ketetso pe teronyu letse kehü lihi-e lo mele rüshvu kehü aphu zen kenren ti, lo a-le Sunggigü letseo bin lo lati.

⁵Ale himhundyü hagun zen kebin ka hi rüla pe hagun ka zokeshü tsü rüchün mvula sele?

⁶Lo a-no a-gwünkho ki chwiryü nrün genyu nyu le ntsoka a-khin bin yo hagun-e shabin nyo.

⁷Lo serikemvu sha tilo keho tsügü tsüle a-tho thyü binla so, ai a-khin kebin gü tsü khinla kemvu ka we a-le dihontse shü tiyo tsü thyü shü loho.

⁸Tson-o tsüsikinyu serikemvu tsügü le me yhühyu thyü chwi ryü ti, ai Npugü le zankechwi thyüo me yhühyu thyü keryü ka a-mün nyu a-teshe gü lope tsügü dushvu lati, tson-o tsügü kemhenla ti.

⁹Serikemvu tsügüle Satan kekvu sen gunryüo ndun kethyü tho aphu lo tha zansü kenku lo tha ndun kethyü tho dan thyü ti.

¹⁰Serikemvu, me kesa shaseni sen ryüo nkela nrün nyu dan sati. Kechamvule tsüdan le ketsin gü so-o zenlo yatselo anyugun le kenilo ti tse kethyü jo gü zenlo mvu kela genyu.

¹¹Tsügenyu Sunggigü le anyugun no kenku jo tenyenla nrün genyu tha rüchün zü sa kethyü nme nipe anyugun ge shüla.

¹²Tson-o ketsin gü tenyen mvule kemu nyu a-kenyü tin kelanyu aphu nmu lati.

¹³Ai Npugü keso kepvü apvünyu ju, Kapugü nyu hagun thyü kenshün lo-o hagun no ketsin gü tenyen kelo genyu Sunggigü le sokeri ka nyu hagun kejü pe kenikelo kipon shü kela genyu ale hagun genyu Sunggigü shwen zin bin hünyo.

¹⁴Hagun no n gun Npugü Jisu Khrista zankechwi kethyü hyulo titseo a-jolokegwa gü no hagun kolo laso.

¹⁵Tsügenyu a pvünyu ju, hagun tsekho tse binlo, lo hagun ajo-e lo a lesü nyu hagun senthyü keshü shakelo dan thyü lo zen binlo.

¹⁶Lo n Npugü Jisu Khrista-e lo n Pvügü Sunggigü le nso-o shwikenjün nyu kethonthen nyun kebwen pe ntsü lo sidyü kegwa khipe n ketsü gü no,

¹⁷hagun nyun thyü nbwen shü lo hagun nyun thyü pe no tha kegwa lo jo kegwa lihi-e thyülo.