Read Southern Rengma Naga 2 THESSALONIANYU 3 Bible Online

2 THESSALONIANYU 3 - Southern Rengma Naga bible

2 THESSALONIANYU 3

¹Tsüselo apvünyu ju, Npugü jo gü no hagun dan nyu thyü keshü hontse kenye nmhe gun lo lo zankechwi thyü gun lo nrün genyu.

²Lo temi aphu le tenyen bin kemvu genyu, temi serikemvu lo gwakemvunyu ben nyu ano tinchwilo nrün genyu agenyu hibin lo.

³Ai Npugü we tenyenlo kekü gü, a-le hagun thyü nko shü lo serikemvu gü ben nyu hagun ntsenlo ti.

⁴Lo ale hagun ka tha zo keshü dan hagun le tsü thyü hünyo, lo thyü bin ti tsekethyü ale Npugü nyu hagun rüchün n gwa bin nyo.

⁵Npugü no hagun nyun tson tsin pe Sunggigü keso gü lo nyhenhio Khrista keryü khwen bin kelo gü thyülo.

⁶Lo apvünyu ju, ale hagun no hagun pvünyu lihigüe tha thyü kentsü nyu lo hagun le aka senkethyü jo shakelo dan zen hü kemvunyu zen kengü nyalo tseo n Npugü Jisu Khrista zan nyu ale jo hope hagun tsüshü bin nyo.

⁷Hagun le ale nyu thyü hü yo ahontse thyülo zü tse kethyü hagun npvü sha bin nyo, ale himhundyü hagun dan nyu kebin ka tha thyü ntsüo yhun mvu.

⁸Ale temi nme hon-e a-min thyü mvutse tyü shwi mvu; ai hagun temi nme-e no a genyu kenjün thyü mvu nrün genyu ben-e zün-e ale tha thyü kenjün thyü hü.

⁹Tsüle ale akeche lozü kemvu genyue mvu, ai hagun no siki ajvü hontselo nrün genyu tsinhi nme thyü keshü le.

¹⁰Tsüntimvule ale hagun zen kebin ka-e, “Temi lihigüe tha thyü mvu yatselo a-no tha-e tyütsü nyalo,” tse kethyü ajo hoshü le.

¹¹Kechamvule ale nyü kelo le hagun dan nyu temi peha le ntsü nthyüo yhun hünyo, thame thyü mvuo me kemün pen kehü gwünzin letse kethyü shalo.

¹²Tsügenyu ale temi tsühontse kethyü nyu no jüje tse a-tho gü thyülo, lo a-npvü a-gin chün tyü hülo tse kethyü Npugü Jisu Khrista zan nyu johoshü lo thu keyhun shü bin nyo.

¹³Ai apvünyu ju, thakegwa thyüo hagun nyun kunla nya.

¹⁴Lo temi lihigüe lesü hinyu thu keshü ajo zen hü kemvunyu, hagun temi tsünyu shabin lo; tson-o a-no kejolo nrün genyu hagun a-zen kengü nya.

¹⁵Tson ai a-lope nrinyu hontse la nyao, n sikezen nyu hontse a-tsenro lo nye.

¹⁶Kebwen Npugü no nyun kebwen khipe gwünkho aphu ka-e lihi nyue hagun tsü kelo gü thyülo. Npugü no hagun zen bin kelo gü thyülo.

¹⁷Ale Paul, ale hagun kelushü a npvü aben lope thu shü le nye; hile a lesü aphu nyu ale thu shü letse kethyü tsinshü le; ale hihontse thu shü hünyo.

¹⁸N Npugü Jisu Khrista shwikenjün gü no hagun aphu zen bin kelo gü thyülo.