Read Southern Rengma Naga 1 TIMOTHI 1 Bible Online

1 TIMOTHI 1 - Southern Rengma Naga bible

1 TIMOTHI 1

¹N kenikelo n Sunggigü lo nsidyü gü Khrista Jisu au jo genyu Khrista Jisu apostel thyü kelo gü Paul le;

²khipe ketenyen kipon anyu ketsin gü Timothi tsü keshü. Sunggigü n Pvügü n Npugü Khrista Jisu no keso, shwikenjün lo nyun kebwen pe n ketsü gü thyülo.

³Ale Makedonia nyu gun kezhü ka nka kezo hontse, ale nno Efesa nyu bin nyü bin nyo. Tsügenyu temi peha le kenku senkethyü khi sen-o me senthyü hünyo, lo nle anyugun no khela lotse khinla mvulo shvu.

⁴Anyugun no nduka nyu rüla kera kethyülo nbonnyu dan zan swü kethen kethyü tsü khela mvulo shvu, kechamvule tsügenyu kenyi kehü gwünzin a-melo ketenyen nyu shakelo Sunggigü kendo gü thyülo hü kemvu genyu.

⁵Ai n tenyen shü kela kon gü le nnyun nshünlo nkerüchün nzhülo kerokon mvuo tenyen kethyü genyu keso no binlo nrün genyu.

⁶Temi peha we tha hidan hi gwünzüo n mhon gü kenrun kenryü kera kethyü kipon hü tin laso.

⁷Temi tsüdan le anyugun le nyu zobin yo anyugun npvü anyugun jo-e sha mvu; nmvue anyugun le tha rüla sha letseo zo peche kebin güe shamvue tejvü gü pe me senkethyü nyu thyü nyü hünyo.

⁸Temi lihigüe tejvü gü thenlo yatselo tejvü gü le gwa tsekethyü nle shabin nyo.

⁹Higü hi shalo mvulo shvu, tejvü gü le temi kegwanyu genyu thyü shü mvu, ai tejvü gwünrho kehünyu, me jo zen kemvunyu, Sunggigü sha hü kemvunyu, nshün kemvunyu lo serikemvunyu, a-pvü a-jvünyu dushvu kehünyu.

¹⁰Keyüla nyu, pechenyu le pechenyu zen-o kejo kemvu tho thyü kehünyu, temi rühulo la kehünyu, kenku nyu, nkuo swe kehünyu, lo thakecha lihi-e senkethyü jo kenjü gü seri kebin dan genyu thyü shü le.

¹¹Senkethyü jo tsügüe atenyen kela kegwa tsingü Sunggigü jolokegwa zankechwi kethyü gü zen kerhün le.

¹²Khrista Jisu ngun Npugü, athyü nko shü kehü gü, a-le arüchün ngwao ano a-lo thyülo tseo akejü kelo genyu ale a-cheno hünyo.

¹³Ale nduka a-zo nshvu lo a-nshwen nyhün hü. Ai ale tenyen kemvu ka ale nyu thyü hü yo shamvuo tsü thyü gunkeryü genyu Sunggigü le ashwi njün shü.

¹⁴Lo Npugü le shwikenjün run pe akesü kela kethyü thyüshü, lo Khrista Jisu nyu ketenyen lo keso khipe atsüshü.

¹⁵Khrista Jisu le kemunyu dan kenilo titseo kazü nyu tsüryü le, tsekethyü jo higü hile ketsin le, lo temi lihigüe lopen lo tenyen lozü le. Lo kemunyu tsüdan dan nyu ale kemu tsin gü le.

¹⁶Ai a-le ashwinjün kela le kechamvule siki a-tenyenlo-o kethonthen kerhün hyulo nrün dan no Khrista Jisu le akemu tsin gü ge a-nyun thonsa kethyü pe me hishü nrün genyu ashwi njün chon shüle.

¹⁷Lo kethonthen raja, sila lo keho, lo n yhütyü pe hyulo keho a-nyeki kecha kendi Sunggigü no kethonthen teshwen lo zankechwi gü thyülo! Amen.

¹⁸A nyugü Timothi, himhundyü ki sidyükeshanyu dan le zo kenjü tsin pe nzen keshü hontse, ale johokeshü higü hi pe ntenyen shübin nyo. Nle me zen-o kenren kethyü ka jo hidan hi lope nronye thyü pvü binlo.

¹⁹Ketenyen lo nnyun kenjü gü sen binlo. Temi peha le a-nyunki a-nthon kebin khwen gü sha kemvu genyu anyugun ketenyen nke shü laso.

²⁰Tsüdan dan nyu Hamenia lo Alekjender hvue sin; tsühvu no Sunggigü zo nshwe loshvu tsekethyü shalo nrün genyu ale khepe Satan ben nyu shü laso.