Read Southern Rengma Naga 1 TIMOTHI 3 Bible Online

1 TIMOTHI 3 - Southern Rengma Naga bible

1 TIMOTHI 3

¹Temi lihigüe kehun kekhwen tho thyünyü kehü le thatho kegwa tsin fü hünyo tsekethyü tsü le ketsin le.

²Tsügenyu kehun kekhwenyu le meno a-nmulo kehonyu, a-nu nme nti kebin nyu, tha lihi ka-e akekheni kehünyu, a-jvü kegwa nyu lo temi kepetsü nyu, me nsin nyü kehü nyu lo me senthyülo kekü nyu mvulo shvu.

³A-le kenzeü nyu nmvue kenthü nyu loshvu, ai a-jvü kegwa nyu lo me zen kega keseri hü kemvu nyu lo seki raka tepen hü kemvu nyu mvulo shvu.

⁴A-le a-npvü a-ka khwün ai kekheni kegwa thyü kehünyu lo a-nyenyue a-rühvuo a-jo zen kehünyu mvulo shvu.

⁵Kechamvule temi nme le a-npvü a-kakhwün-e kekhenilo shamvu yatselo, a-le dihontse Sunggigü kehun nucha kegwa thyülo mon?

⁶A-le ketekho bin-o satan hontse Sunggigü no a-nmu kela kenshvu genyu temi keshün nyu no thyülo shvu.

⁷Tsüntimvule a-no tetsin pvüla nmvue satan sen ka a-minla lo kenshvu genyu tegwenkinyu mhundyü nyue meno rühvu kehünyu mvulo shvu.

⁸Tsühontse Dikonnyue tha rüchün ntsun kehünyu mvulo shvu, zu tsü sahü kemvunyu, kenrunnyu hon tepen hü kemvunyu mvulo shvu.

⁹Anyugun no a-nyun njüo ketenyen jo kentsun sen kehünyu mvulo shvu.

¹⁰Lo temi tsüdan kegwa keshvu nri shwi rio anyugun nmu mvu yatselo anyugun no Dikon tho thyülo.

¹¹Dikonnyu nunyu ai tsühontse tha rüchün ntsun kehünyu, selü thyü hü kemvunyu, a-kekheni kehünyu, lo joketsin kezo nyu mvulo shvu.

¹²Dikonnyu no a-nunyu nme nti kethyünyu, anyenyu lo a-kakhwün kekheni kegwa thyü bin kehünyu mvulo shvu.

¹³Kechamvule dikom tho thyü kegwa thyü kehünyu le nko salo la hünyo, tson-o Khrista Jisu kipon peche sa tinla hünyo.

¹⁴Ale nki ryü nshwen kethyü rüchün bin nyo, ai jo hidan hi thu pe ntsü shü bin nyo.

¹⁵Tson-o keshanyu laka ale ryü ntsüla-e Sunggigü ka nyu kebin nyu le njvü dihontse mvulo shvu yo tsekethyü nno shanyü; ka tsügü tsüle rhünkehü Sunggigü kehun gü, ketsin gü ketun kachon gü lo ka kehü gü le.

¹⁶Ale zo shwishü bin nyo, n gun nyünyü jo kentsun gü le, gonri ketsin, tsüle: “A-le thyümin thyü pvüo me yhühyu thyü ryü, kapu nyu a-le njü tsekethyü tsinshü, lo tsangge jolonyu le a-hyu. A-le temi aphu dan nyu jünzo shü, kazü hinyu keyhun nyu le a-tenyen la, lo a-zen-o tsangge küla.”