Read Southern Rengma Naga 1 TIMOTHI 5 Bible Online

1 TIMOTHI 5 - Southern Rengma Naga bible

1 TIMOTHI 5

¹Kethennyu rho nya, ai tsünyu no npvünyu hontseo thu keyhun lo. Lo ponyu lope nsikezen nyu hontselo.

²Lo nnyun kenshün sen-o tenunyu kethen nyu ju khipe njvü nyu hontse lo; lo lünyu ju lope nlügi nyu hontselo.

³Tenunyu magi-e magi ketsin thyü kebin nyu ju rühvulo.

⁴Ai tenunyu magi-e a-nyenyu nmvue a-nyenyu nyu kebin nyu le, tsünyu no a-npvü a-kaminyu kipon ketsin jvü to gü thyülo, lo a-npvü a-pepvünyu shweshwi kelo do sha terilo. Sunggigü yhühyu nyu tsühontse kethyü le a-zü kethyü genyu.

⁵Lo tenunyu magi ketsin nyu, a-npvü kela gile, Sunggigü nti nrin gwünzin la hünyo, lo khensin jongwün kehi thyü bin gwünzin tinla hünyo.

⁶Ai tenunyu magi serimvu pe a-kenyü yhüdyü thyü tin kelanyu le rhün kebin ka nyu sila hünyo.

⁷Meno anyugun nkhinla mvu nrün genyu johokeshü hilo pe anyugun ka zoshü lo.

⁸Lo temi lihigüe a-npvü a-shvu a-nye tsüdan nyu a-kaminyu dan-e shweshwilo mvu yatselo a-le ketenyen gü nkhinla so, lo tenyen kemvunyu nyeki shvukvu laso.

⁹Peche nme nti zen yhun-o magi tin kelanyu kemvu we a-keyhun chen hentsero khünyu shweshwi titseo a-zan thulo nya.

¹⁰A-le me mhundyü nyue thatho kegwa genyu teshwe kepvünyu mvulo shvu, a-le ntsenyu leyi soryü, tesin nsin, kenshünnyu ju phasü, kenjün thyü kebin shweshwi, tson-o tha lihi ka-e thatho kegwa kethyünyu a-yhen thyü kehünyu mvulo shvu.

¹¹Ai tenunyu maginyu chen hentsero khünyu we zan thulo nya; tsüdan le Khrista kendo then mvuo thyümin kenyü yhüdyü thyünyü solo anyugun le kaluni nyü soti.

¹²Lo tson-o anyugun jo kerigü gwünrho kela genyu mula ti.

¹³Tsünyeki-e anyugun le tha thyü kentsü do-e sha lati,tson-o ka aphu rün tinla ti; lo tha thyü ntsü kela ntimvule jo zozü kemvu zo-o selü thyü soti.

¹⁴N shwikerüchün nyu dan no ngun nkhinla mvu nrün genyu tenunyu magi kebin nchenyu dan we no kaluo nyu zen, a-kami shwi leyi kethyü le akendo le.

¹⁵Kechamvule temi peha le tson gwünzüo satan tson then tin kela si genyu.

¹⁶Tenunyu ketenyen nyu lihigie a-shvu a-nye tenunyu magi tsühontse kethyü le binlo kehun no a-khvü nsu nyao tsünyu shweshwilo nye; tson-o kehun no magi ketsin nyu shweshwi kelo thyülo nye.

¹⁷Kehun peshünyu ju, kehun ketsen kegwa thyü kehü ju, tsüdan nyu jolokegwa jünzo lo me senthyü kehünyu chün jünhvu pe tsüshü züle.

¹⁸Kechamvule ketsin lesü le kezo le, “Nle methu no shyenyu ketseka tha pe a-mün khenla nya,” lo, “Tha thyü kehünyu le a-chün hyutyü zü.”

¹⁹Kehun nyu peshü gü nmu soryüe mihvu mishen le sha lo hyu tsentsü la kemvu we tenyen nya.

²⁰Kechanyue no nshvulo nrün genyu kemu thyü kelanyu kehun süda mhundyü nyu tsünyu kesü shülo.

²¹Ale Sunggigü lo Khrista Jisu lo tsangge jolo kejü kelonyu mhundyü nyu ale jo hidan khipe nki shübin nyo; nle tha nme ka-e temi nme-e so kecha thyü mvu tse tha hi thyü nye.

²²Nnyun nyhun-o nben shwepe mege shü nya, nmvue me kechanyu kemu nyu nhüsülo nya, lo nshün binlo nye.

²³Zü nti tsü bin nyao nle ho whülo lala tse kehü nginda kethyü gü genyu vain zu kesha shanyu pe ritsülo.

²⁴Khinyu kemu we ndo pe gingvü lahü nyo lo anyugun kemu le anyugun mhundyü ki gü anyugun nmula hünyo, ai khinyu kemu we siki nyu me le sha chwiryü hünyo.

²⁵Tsühontse thatho kegwa kethyüe gingvü la hünyo; lo tsühontse mvu yatse-e kebu binlo hü mvu.