Read Southern Rengma Naga 2 TIMOTHI 2 Bible Online

2 TIMOTHI 2 - Southern Rengma Naga bible

2 TIMOTHI 2

¹Tsügenyu anyugü nle Khrista Jisu kanyu shwikenjün gü nyu nko binlo.

²Lo nle temi kechon yhühyu nyu ajo nyü kelo dan, khipe me kechanyue senthyü shülo kegwa tenyenlo kekü nyu ben nyu shüshü nye.

³Nko Khrista Jisu shüpahü kegwa nyu hontseo kengüo kenjün thyü lota.

⁴Temi nme-e shüpahü tho thyü seren tha kecha thyü pe a-ketekhi sinlo nrün ndi, tsüle kechamvule a-no shüpahü thyü titseo a-zan thu kelogü kenyü thyülo nrün genyu.

⁵Tsüntimvule temi lihigüe me zen-o kecho kenyhen kethyü nyue tejvü gü then kemvu we kvukelo perün pvülo hümvu.

⁶Low tsüo hokeli kehü gü le me mhundyü a-rasha hyulo ri mvulo shvu.

⁷Ajo dan rüchün shü ta, Npugü le a-npvü tha lihi-e shalo kegwa khipe ntsüti.

⁸Jisu Khrista rüchün binlo; ale jolokegwa pe jün kezo nyu kezo hontse, a-le kesinyu rhünniso laso, lo a-le Israel tsipwen ge gunryü.

⁹Jolokegwa tsügü genyu ano kemu kethyü nyu hontseo meno tegiron pe adyü sen-o kenjün thyü hihontse kehü gwünzin. Ai Sunggigü jogü we tegiron pe dyüla mvu.

¹⁰Tsügenyu kejülo kela dan no Khrista Jisu genyu chwikeryü kenikelo pe kethonthen zankechwi kethyü sin-o hyulo nrün genyu ale tha aphu nyu nyhenhi bin hünyo.

¹¹“Nle a-zen-o si yatselo, nle a-zen-o rhün loti.

¹²Nle nyhenhilo hü yatselo, nle a-zen-o meso gon ti. Nle a-zan zoshwi mvula yatselo, a-ko nzan zo mvula ti.

¹³Nle joketsin zohü mvue, a-we joketsin zozin bin hünyo, kechamvule a-we a-jo kelula hü kemvu genyu,” jo higü hile ketsin le.

¹⁴Nle anyugun no jo higü rüchün nilo, lotse kethyü Npugü mhundyü nyu anyugun rho shülo, kenyi kethyü le gwa kelogü mvule kenyünyu thyü nshvula kehü gwünzin.

¹⁵Sunggigü no nle gwa letse lo nrün genyu nyhen thyü salo; tha thyü kehünyu le kejopvü kelai ndi; lo ketsin jo gü kenjün to senlo.

¹⁶Lo joja jora nshünkemvu tsü nrhilo; kechamvule tsühontse kethyü then gü ketsin gü rüchün mvu a-shvushvu tsela nrün genyu.

¹⁷Lo anyugun senkethyü le me senra kethyü hontsela hünyo; tsüdan nyu Huminia lo Fileta au ko hünyo.

¹⁸Au le ketsin gü gwünzüla njüo rhünniso nrün tsüle güla sele tseo peha ketenyen gwen pe shese titse hünyo.

¹⁹Ai Sunggigü le a-bin jwen keshü gü we nnu loho, lo tsüge mohor le hihontse,“Npugü le senyu le a-hon yo tsünyu sha bin nyo,” “Temi lihigüe Npugü zan zo kehünyu no nshün kemvu nrhila lo,” tson hü.

²⁰Lo ka keda nme nyu le suna nmvue rakagi pe kethyü thakhin nti le bin mvule tesan lo nnyon lope kethyü khin-e bin hünyo; peha we teshwen pvü, lo peha we kedukeru ka sen hünyo.

²¹Tsügenyu temi lihigüe a-npvü a-thyü kenshün pe kedukeru kethyü dan tsü nrhilo yatselo, a-thyü pe teshwen kepvü nshünlo kela, Npugü ka nyu sen-o tha thyülo kekü thatho kegwa thyü nrün genyu thakhin nme thyülo ti.

²²Tsügenyu nle nselo kenyü dan khelao n nyun nshün-o Npugü ko kehü dan zen-o kentsen, ketenyen, keso lo nyunkebwen hidan thenlo.

²³Ai tha rüchün kemvu lo tha ketso zü kemvu ketso kethyü tsü thame thyü nya, tha tsüdan genyu kegalo kehü gwünzin.

²⁴Lo Npugü gonyu le kega hü zümvu, tsonkethyü gü mvule temi aphu ge njvü gwa lo nnyun thon-o me senthyü sha mvulo shvu.

²⁵Sunggigü le anyugun shwinjün shüo anyugun no anyugun nyun kelulo-o gunryü ketsin gü shalo ti ado tse, lo njvü gwao n ntsun kebin nyu kemu tsin pe hishülo.

²⁶Tsonlo yatselo tsü mhundyü satan le anyugun ten pe a-kendo nyu shülo la-e anyugun le tin-o a-sen nrhi chwiryüe logwa.