Read Southern Rengma Naga 2 TIMOTHI 3 Bible Online

2 TIMOTHI 3 - Southern Rengma Naga bible

2 TIMOTHI 3

¹Tsangkeben jon kekhin dan ki tsü tha thyü rüsa kethyü gwünkho le gunryü ti tse kethyü jo hi sha bin lo nye.

²Tsükitsü temi le a-npvü a-jün kegwa kefü, pisa ketepen, ketekho, kemakin, metsin, a-pepvünyu khwen nyü kemvu, me rühvu kemvu, nshün kemvu;

³meso njün kemvu, keso nyun pvü kemvu, me zo nshvu kethyü, yhun nshün kemvu, a-jvü gwamvu sa kethyü, kegwa shwinyü kemvu,

⁴kekhünkekho kethyü, me jo zen nyü hü kemvu, a-npvü a-rüchün ngwao ketekho kethyü, lo Sunggigü so kethyü nyeki anyugun npvü anyugun kenyü yhüdyü thyünyü kethyü le soryü ti.

⁵Tegwenki we temi ketsin nyu hontse, ai a-kekvu gü sha mvula ti. Temi tson kehünyu nrhilo nye.

⁶Tsüdan nyu peha le me ka nyu yügü tenunyu a-nyun tsü kemvunyu a-kemu khvü nsu kebin nyu sa zen-o serikemvu kenyü dan thyü tinla so.

⁷Anyugun le me le anyugun senkethyü khwe nyü zin hünyo, ai ketsin thakesha gü kipon tsü gunryülo hümvu.

⁸Tson-o ndukako Jani lo Jambri hvu le Mosa ntsunla kethyü hontse temi hidan-e ketsin gü ntsun hünyo; temi tsüdan le anyugun nyun le gwamvu laso, lo anyugun ketenyen-e ketsin mvu laso.

⁹Ai tsüdan le nithen sa tin loho; kechamvule tsühvu hontse anyugun kemu-e temi aphu sha tsentsülo nrün genyu.

¹⁰Ai nwe le asenkethyü, ajvü arüla, akeyhun ka ale nyu rüchün hüyo, tsü then hünyo; lo nle aketenyen, anyun kethon, ale me keso, ale nyhenhi bin kelo,

¹¹meno akenshwe lo akenjün kethyü aphu hyu. Lo Antiok, Ikonia lo Lustra nyu agenyu hontse thyüyo tsü aphu sha kü! Ai tsüdan tsü aphu nyu Npugü le akenishü.

¹²Tsühontse Khrista Jisu kipon ketsin rüchün-o yhun kenyü nyu aphu me le nshwen nyhün ti.

¹³Ai temi serikemvu lo me sa kehünyu le mesa lo anyugun npvü anyugun sa tseo gwamvu kvu kvu tse güla ti.

¹⁴Ai nwe zope nzen shü kela ketsin gü lo ketenyen gü nyu binlo, kechamvule nle segü ka jo tsüdan shalo yo tsekethyü sha kebin si genyu.

¹⁵Lo nle n ncheka nyu kenshün lesü dan sha gunryü laso, tsüle dihontseo Khrista Jisu ketenyen genyu kenikelo hyulo tiyo zope nhishü laso.

¹⁶Ketsinlesü gü aphu Sunggigü kanyu henshwi shü, lo tsüle senkethyü genyu gwünzü kebin nyu rho shü nrün genyu, thyüzü kebin nyu thyü ngwa shü nrün genyu lo me che pe ketsin nyu shülo nrün me genyu kechwi genyu le.

¹⁷Tson-o Sunggigü temi no a-gwün ndo penlo njüo thatho kegwa lihi-e thyülo kegwa thyülo hünyo.