Read Southern Rengma Naga 2 TIMOTHI 4 Bible Online

2 TIMOTHI 4 - Southern Rengma Naga bible

2 TIMOTHI 4

¹Ale Sunggigü lo kerhün nyu lo kesinyu aphu ketso nrün gü Khrista Jisu mhundyü nyu n kesin shü bin nyo; kechamvule a-le ryü kezhü lo keda thyü nrün genyu ale nno jünzo binlo lotse zoshü le.

²Gwünkho toka metse lo gwünkho kemvu ka metse nyhenthyü zo binlo; meno ketsin letse shalo, kesülo, lo thu keyhunlo, nnyun thon-o senthyü binlo.

³Kechamvule temi le senkethyü jo nyünyü kemvu gwünkho nme le ryü jü nyo; tson-o anyugun le anyugun nyetin kenjün thyüo anyugun le nyu nyülo nyü bin yo tsü senkethyü fü kequen loti.

⁴Lo anyugun le ketsin gü nyu anyugun nyetin pvü kerü sen-o ketsin kemvu kipon güla ti.

⁵Ao nwe tha lihi nyue nnyun tsentsü binlo; kenjün thyüe nyhen binlo, jolokegwa zope me senkethyü tho thyü binlo, nle lotho thyü titse kebin gü tsü thü penlo.

⁶Kechamvule awe aphou hoshüla titse ndo binla so, ale tinla nrün gwünkho gü le ryüzhü laso.

⁷Ale kenren kethyü gü nyu kenren penlo laso, ale tin kehü kethyü nyu tin gü tinlo laso, ale ketenyen gü ntsen sen tilo laso.

⁸Nthu gerho nyu kentsen perün khipe atsü titse akhwen bin laso; Npugü, jo ketsin nyu me jün kera nrün güle a-npvü tsangkeben jon keda tsünyu tsü khipe atsüti, lo a npvü mvule a-le nikeryü le a-kenyü kehünyu aphu tsüti.

⁹Nle nshwe aki ryü titse kethyü nyhen thyü binlo.

¹⁰Dema le kazü higü hon keso genyu akhelao Thessalonika ki gun laso, Kresken le Galatia ki gun laso, lo Tita ko Dalmatia ki gun laso.

¹¹Lo Luk nti azen kebin gwünzin so; nle Mark ko zen ryülo; a-le lotho nyu akeche salo kehü genyu.

¹²Ale Tukika nipe Efesa ki shü laso.

¹³Nle keryü ka ale phi khipe Troa nyu Karpo ben nyu shü kenjü gü tsü lo lesü dan nyu lesüsü dan nchon-o sen ryülo.

¹⁴Lazo cha kehü gü Alekjender le age a-zü kemvu thyü sa la le, a-tho hontse NPugü le a-jün ketun ti.

¹⁵Nko a-genyu petsü binlo nye, kechamvule a-le n gun jo hi ntsun sa kehü genyu.

¹⁶Ale a npvü arüla zo kerigü ka temi nme-e ano pen shü mvu, ai akhe küla le, Npugü no tsü lope anyugun nmu nyalo tse nda.

¹⁷Ai tsükatsü Npugü le akhoka bin-o athyü nkoshü le, tson-o ale jo gü zo bu pe Juda kemvunyu ju aphu no nyü külo; lo tson-o shünyho gü mün nyu asi kenilo le.

¹⁸Npugü le tha gwa kemvu lihi nyue akenilo ti; tson-o akeni zen gungü tsangge keda nyu shülo ti. A-no kethonthen zankechwi gü thyülo! Amen

¹⁹Priskila lo Aquila hvu, lo Onesifora nyu kaminyu kelu shü le.

²⁰Erasta le Korinth nyu bin nyo, ai Trofima we halo lao ale a-khe pe Meleta nyu shü laso.

²¹Tsangse mhundyü ryü titse n yhen thyü bin ta. Eubulu, Poden, Lino, Klaudia lo npvünyu ju aphu nkelushü le nye.

²²Npugü no n kapu zen bin kelo gü thyülo. Shwikenjün gü no hagun aphu zen bin kelo gü thyülo.