Read Southern Rengma Naga TITA 1 Bible Online

TITA 1 - Southern Rengma Naga bible

TITA 1

¹Sunggigü gogü lo Jisu Khrista apostel gü Paul le khikeshü; Sunggigü le kejülo kela temi dan ketenyen thyü nso shü lotse lo anyugun tson tsin pe ketsinjvü kipon ketsin thakesha gü nyu shülo tseo akejülo.

²Kethonthen kerhün hyulo nrün nsidyü gü, tsüle Sunggigü, nkulo keho gü le keritsin kanyu kerhün higü lope ngun tsü titse zo njü.

³Lo Sunggigü nkenikelo gü jo genyu a-npvü a-gwünkho to ka pe atenyen kela a-jolo gü nyu a-kerüchün zo pe me hishü laso.

⁴Ale lesü higü thu pe ketenyen kerhün hon kethyü kipon anyu ketsin thyü kelagü Tita ki shü shü le. Sunggigü n Pvügü lo ngun kenikelo gü Jisu Khrista ka nyu chwikeryü shwikenjün lo nyun kebwen gü no nhon thyü kelo gü thyülo.

⁵Ale nno thathyü tilo mvu kebin dan thyü kentsen shü lotse lo ale nka zokeshü hontse rünyi kedanyu dan ka kehun kekhwen nyu kejü njü lotse kethyü higenyu nkhe pe Kreta nyu shü laso.

⁶Temi no a-nmulo keho nyu, a-nu nme nti kebin nyu, a-nyenyu ai ketenyen nyu, me le tsüdan le serimvu nmvue me jo zen mvu letseo nmu kemvunyu mvulo shvu.

⁷Lo kehun kekhwen nyu le Sunggigü hon kentsen nyu genyu meno a-nmulo keho nyu mvulo shvu; a-npvü a-kendokenron kethyü nyu, kenthün nyu, kenzeü nyu, me vükehü nyu, nmvue kenrun nyu hon lonyü kehü nyu no thyülo shvu.

⁸Ai tesin nsin kehünyu, tha kegwa le a-kenyü kehünyu, me jo zen kehünyu, kepetsü nyu, kenshün nyu lo a-npvü a-kekhenilo kehünyu mvulo shvu.

⁹A-no senkethyü jokenjü nyu me thu keyhun, lo tsü zen keseri chwikeryü nyu nnyila nrün genyu senthyü kehü tenyenlo kekü jo gü nyu nko bin kehünyu mvulo shvu.

¹⁰Kechamvule me jo seri kehü, kenrun zo-o me sa kehü kechon le bin laso, tsü dan nyu gikerünyu nchon kvu.

¹¹Tsüdan tsü mün khinla mvulo shvu; anyugun kejokemvu kon ka kechwi füo anyugun le me senthyü kezü kon ndi-e me senthüo kakhwün aphu nyu thyü nshvu kela le bin laso.

¹²A-nyu npvü a-nyu temi sidyükeshanyu nme le zo, “Kretanyu le nkuzin kehünyu, a-jvü gwakemvu nyukhu dan me, lo tha thyü ntsüo tyü kehü nyu dan me.”

¹³Anyugun rüla kezo hile ketsinle. Tsügenyu anyugun rhosa shülo, anyugunno ketenyen ketsin gü nyu binlo nrün genyu.

¹⁴Lo Judanyu le kera kehü kenrun dan nmvue ketsün gü nrhi kela temi dan jo nyü mvulo nrün genyu.

¹⁵Kenshün nyu genyu we tha aphu nshün, ai rhukela tenyen kemvu nyu genyu we thame kenshün ndi laso.

¹⁶Anyugun le Sunggigü sha nle tse zo hünyo, ai anyugun tho gü le a-shamvu letse zo hünyo, anyugun le kentsükenchen, mejo zen kemvu, thakegwa kon me-e thyülo kü kemvu dan le.