Read Southern Rengma Naga TITA 2 Bible Online

TITA 2 - Southern Rengma Naga bible

TITA 2

¹Ai nwe senkethyü jo kenjü gü zen kerhün kethyü zope senthyü mvulo shvu.

²Kethen nyu ju no tha aphu ka a-kho thyülo, tha rüchün ntsun, lo a-npvü a-kekheni, ketenyen nyu gwa binlo, keso lo nyhenhi binlo lotse zoshülo.

³Tenunyu kethen nyu ju kono tsühontse anyugun jvü kegwa genyu meno anyugun rühvu, me zo nshvu kethyü nyu, nmvue zu ketsü do thyü tinla nyalo tse zoshülo. Anyugun no nyu le gwa yo pe senthyülo.

⁴Nyegi bwenyu ju chün pe no a-nyepvü nyu lo a-nyenyu solo.

⁵A-npvü a-kekhenilo, lo yhun nshünlo, lo kanyu tho dan thyülo, a-jvü gwalo lo a-nyepvünyu khwennyülo, tsonlo yatselo temi nme-e Sunggigü jo gü nkhinla loho.

⁶Tsühontse pelü bwenyu ju kono a-npvü a-kekhenilo.

⁷Nle tha lihi ka-e thatho kegwa kethyü nyu tsinhi nme thyü pe me hilo chi. Njo kensu tsin pe me hilo.

⁸N shwikerüchün nyu no ngun ge tha gwakemvu nme-e zo keloi bin ndi lao kejolo nrün genyu nle meno nmula lo keho jo kegwa dan zolo nye.

⁹Me dothyü kehünyu dan no a-npu nyu jo zenlo, lo tha aphu nyu tsünyu kenyü thyülo. Tsünyu jo nnyini la nya,

¹⁰nmvue rühvu mvula nya. Tson kethyü gü mvule anyugun no tha lihika-e gwa lo tenyenlo kü, tsekethyü tsin shülo, tson-o tha lihi kethyü nyue n kenikelo gü Sunggigü kanyu chwikeryü senkethyü jo gü gwün kezegwalo.

¹¹Kechamvule Sunggigü shwikenjün gü le temi aphu kenikelo sen keryü pe hishü laso.

¹²Jo tsügü le nno ketsinkemvu kipon lo kazü higü nyu nkenyü dan khelao n kekheni lo, seri lo ketsin rüchün-o yhunlo tse kethyü tsin pe nhi hünyo.

¹³Nno nsidyü kegwa thyü pen pe ntsü nrün gü lo n Sunggigü Kedagü lo n Kenikelo gü Jisu Khrista le zankechwi thyüo ryü nrün gü khwen binlo tse hünyo.

¹⁴A-le ngun genyu a-phou hope serikemvu aphu nyu nrhinhilo, lo nthyü pe temi kenshün a-npvü a-hon thyüo thatho kegwa aphu nno nyhen thyülo lotse shü laso.

¹⁵Nle njo kekvu aphu sen-o jo hidan pe nkhwen kenyü nyu dan thu keyhun lo rho shülo. Temi nme no nrüchün nshvu kela thyüla nya.