Read Southern Rengma Naga TITA 3 Bible Online

TITA 3 - Southern Rengma Naga bible

TITA 3

¹Nle n temi dan no sorkari kesen nyu lo kekvu kesen nyu khwenyülo lotse kethyü, lo tsünyu jo zen, lo thatho kegwa lihi-e thyü titse ndo bin lotse zoshü nye.

²Anyugun no temi nme-e zo nshvula nya, kega keseri nya, anyugun nyun bwenlo, lo temi aphu mhundyü nyu benshunlo lotse zoshülo.

³Kechamvule ngun ko gwüngwa nme ka me jo zenmvu, lo tson gwünzü hü, lo nkenyü yhüdyü dan do thyü ryü, lo me ge nra kepvü lo nyhükethyü, me shwirüchün lo meko nshwirüchün tseo yhun ryü laso.

⁴Ai nkenikelo Sunggigü le temi shwikenjün, lo keso gü le me yhühyu thyü keryü ka,

⁵n kenilo laso, tsüle nle n npvü thatho kegwa lihi-e thyü keshü genyu mvu, ai a-npvü n shwikenjün genyu keyhun keshün kethyü nyu nsülao Kenshün Kapu nyu nthyü keshün thyülo laso.

⁶A-le nkenikelo gü Jisu Khrista genyu Kenshün Kapu ja pe nkesü kela thyü shü laso.

⁷Tson-o a-le shwikenjün genyu nno kentsen nyu thyülo, lo kethonthen kerhün hyulo titse kethyü kipon njün kebin nyu thyü kelo le.

⁸Jo hidan hile ketsin lo ale nno hidan hile mvulo keshvu tsin letse zoshü nyü bin nyo, tson-o Sunggigü tenyen kelonyu dan no thatho kegwa dan yhen thyüo thyülo nrün genyu. Hidan hile gwasa lo temi genyu kechwi le bin nyo.

⁹Ai ketsozü kemvu ketso-o kenyi kethyü, lo pvübon zan swü kethyü, kega keseri kethyü, tejvü gü zo-o kenyi kethyü, dan nrhilo; kechamvule tsüle thame kechwi ndi lo a-kenrun kethyü genyu.

¹⁰Temi me pvükho titse kehünyu gwüngwa gwünhvu ge kesü keshü siki we zen-o thame thyü nya.

¹¹Kechamvule temi tsühontse kethyü nyu le ketsin gü nrhio gwamvu laso, lo a-le thyüzü kehü a-npvü sha bin nyo tsekethyü shalo.

¹²Ale Artema nmvue Tukika nipe nki shülo nle Nikopoli nyu aki gunryü titse nyhen thyülo nye, kechamvule ale tsangse gwünkho ka tsü nyu bin titse rhilo laso.

¹³Nle nyhen thyüo tejvü keshagü Zena lo Apolos au le njwen kegun ka au cheshü nye, au no thame rhodyüla nya.

¹⁴Lo ngun temi dan no a-sha nshalo nrün genyu lo nmvulo keshvu ketsin nyu keche shülo nrün genyu thatho kegwa kethyü jvü shalo.

¹⁵Azen kebin nyu dan le nkelu shü le. Ketenyen nyu ngun so kehünyu dan kelushü lo. Shwikenjün no hagun aphu zen bin kelo gü thyülo.