Read Southern Rengma Naga FILEMON 1 Bible Online

FILEMON 1 - Southern Rengma Naga bible

FILEMON 1

¹Jisu Khrista genyu dothyü kebin gü Paul lo nsikezen gü Timothi au le thu pe npvügü kengü lotho thyü kehügü Filemon,

²n lügi Afia, lo n gun kengüo Khrista shüpahü thyü kehü gü Arkipa lo a-kanyu kequen kehü kehun gü ka keshü:

³Npvü Sunggigü lo n Npugü Jisu Khrista ka nyu shwikenjün gü lo nyun kebwen gü no hagun zen bin kelo gü thyülo.

⁴Ale akehi kethyü nyu nrüla rüchün-o Sunggigü cheno bin hünyo.

⁵Kechamvule ale Jisu Khrista kipon n ketenyen rüla lo nle kenshün nyu aphu so kehü nrüla nyü kelo genyu.

⁶Akehi gü le nketenyen tho genyu Khrista nyu ngun hon tha kegwa dan aphu sha ntsenlo nrün genyu.

⁷Kechamvule asikezen gü n keso genyu kenshün nyu dan nyun gwün nrhün keshü rüla nyü pe akenyü lo anyun bwenlo kethyü genyu.

⁸Tsügenyu, ale Jisu Khrista kipon we peche sa tse nno thyü kezü gü we thyülo lotse ahza pe ntsülo gwa.

⁹Ai keso genyu tsühontse kethyü gü mvule ale nka hishü bin nyo. Ale Paul, Khrista Jisu lothyü kehü güle, lo ntsoka-e a-genyu dothyü bin nyo.

¹⁰Ale dothyü ketseka a-pvü thyü kelogü anyugü Onesimus genyu ale nka hi hünyo.

¹¹A-le himhundyü ki we nno a-genyu n kechwi ndi ryü, ai ntsoka we n-e lo a-e tse a-genyu kechwi le bin laso.

¹²Ale a-ni nipe nki shü bin, lo a npvü anyun nishü bin nyo.

¹³Ale jolokegwa gü genyu dothyü kebin ka a-no n sunka a lothyü bin nrün genyu a-no a zen bin tin kela le a kenyü bin nyo.

¹⁴Ai nka shün mvu tse ale thame thyüla nyü mvu, tson-o n kegwa gü no tenge tselo kela ge nyu mvule n npvü n kendo thyülo nrün genyu.

¹⁵Lo a-le gwüngwa nme nzen kekhola kethyü le nno kethonthen a-zen nilo nrün genyu ado.

¹⁶Donyu nme hontse mvu, ai tsünyeki keso asikezen nyu nme hontse laso, agenyu we, ayi thyümin kipon-e lo Npugü kipon-e ditsüki thyü nkho nni kvula sela!

¹⁷Tsügenyu nle arüchün pe ano nzen-o logwa nme thyü kehü nyu letse yatselo azen kelo hontse a-zenlo lo.

¹⁸Keshanyu laka a-le nge tha lihi thyüzü njü nmvue npu pvü bin yatselo azan nyu thu pe bin njülo.

¹⁹Ale Paul, a npvü aben pe hi thu shü le, ale gunryülo thola tile, ale nka zomvue nle nphou-e pe aketsüi le bin nyo.

²⁰Ketsin le, asikezen gü, ale Npugü nyu nka kechwi peha lonyü bin nyo. Khrista nyu anyun gwün nrhün shülo.

²¹Nle akhwe nyüti lo ale zokeshü nyeki-e thyüshü titse kethyü ale tenyen tsentsüo thu pe ntsüshü bin nyo.

²²Tsüntimvule agenyu ka tsenme ndo pe bin njü nye; kechamvule ale a kerüchün le hagun kehi nyu Sunggigü le akhipe hagun ki shü ti.

²³Khrista Jisu genyu azen-o dothyü kebin gü Epafra le nkelushü le.

²⁴Lo azen kengüo lotho thyükebin dan Mark, Aristerka, Dema lo Luk nyugun ko nkelushüle.

²⁵Npugü Jisu Khrista kanyu chwikeryü shwikenjün gü no hagun kapu zen bin kelo gü thyülo.