Read Southern Rengma Naga IBRINYU 1 Bible Online

IBRINYU 1 - Southern Rengma Naga bible

IBRINYU 1

¹Nduka kerika we Sunggigü le sidyükeshanyu ge gwün kechon tson kechacha kethyü kechon nyu nbon nyu nthon gunryü.

²Ai jon kekhin hidan ki we a-le kejü pe tha aphu sen kelo gü lo a-genyu kazü thyü kelogü Nyu nme ge n nthon shü laso.

³A-le Sunggigü keben kenyeni keshü gü, lo a-jo kekvu genyu tsang kazü aphu tezen sen bin nyo.A-le temi kemu thyü kenshün kethyü thyülao teso ge kekvu keda tsin gü njüzin bin laso.

⁴Tson-o a-le tsangge jolonyu nyeki zan kegwa tsingü hyu kelo hontse a-le anyugun nyeki gwakvu bin laso.

⁵Kechamvule Sunggigü le thame ka-e tsangge jolonyu nme ka, “Nle Anyu le; nthu ale n nnyulo laso.” Nmvue Sunggigü le tsangge jolonyu nme ka, “Ale a-pvü thyüti, lo a-le anyu thyü ti,” tson zo shwimvu.

⁶Sunggigü le a-nyuri gü nipe kazü nyu shünrün ka zo keshü le, “Sunggigü jolonyu aphu no a-rüshvulo.”

⁷Tsangge jolonyu rüla we a-le kezo le, “A-le a-jolonyu thyü pe tsangkenbu thyü lahü, lo a-gonyu thyü pe mah kenyü thyüla hünyo.”

⁸Ai Nyugü ka kezo le, “O Sunggigü, N Raja bin, kethonthen bin ti! Nle jo ketsin thün gü sen-o Raja thyü ti.

⁹Nle kentsen so hü lo serikemvu shwi ntsüla. Tsügenyu Sunggigü n Sunggigü le shekerhün terzü lope nyün pe nno npvünyu nyeki gon kvu laso.”

¹⁰Lo a-le zoni, “Npugü, NLe sokeri kanyu kazü gü thyü shülaso, lo nle n npvü nben lope tsang dan thyü shü.

¹¹Tsüdan we ndila ti, ai nwe bin zin ti; lo tsüdan aphu phi nya hontse a-ren thyü lati.

¹²Tson-o phi hontse nle sükeryü lati, lo phi hontse anyugun le kelu lati. Ai nwe keme zin bin ti, lo nchen dan le thame ka-e a-keni thyüla loho.”

¹³Lo Sunggigü le thame ka-e a-jolonyu nme ka-e: “Ale n shwikerüchün nyu khipe nphabin thyüla kemvu then nle a njüzin binlo,” tse thu njü mvu shü.

¹⁴Tsüdan tsü aphu kenikelo hyulo nrün nyu dan genyu lothyü lotse nikeshü lotho kethyü Kapu dan mvu ole?