Read Southern Rengma Naga IBRINYU 10 Bible Online

IBRINYU 10 - Southern Rengma Naga bible

IBRINYU 10

¹Lo tejvü gü we tha kegwa le gunryü nrün dan joja to mvule a-shye nme kethyü genyu chenkechwi pe ngun kershvu thyüzin kehü kershvu tsüdan tsü sen-o a-kho nni kehünyu thyü ngwa penlo nrün ndila.

²Keshanyu laka rüshvu kehü dan le anyugun kemu nyu nshün ketsin thyülo la yatse kethyü we, anyugun nyun le anyugun nmu mvu lati, tson-o kershvu thyü sinmvu lati.

³Ai kershvu tsüdan kethyü le meno chenkechwi a-npvü a-kemu rüchün nilo lotse kehü gwünzin.

⁴Kechamvule methutse lo tenyü dan zi le temi kemu sentinlo nrün ndi kela genyu.

⁵Tsügenyu a-le kazü nyu tsüryü kejü ka, a-le Sunggigü ka zo: “Nle kershvu kethyü lo tha sen ryüo kershvu-e nkendo mvula, ai nle min nme ndo pe atsü laso.

⁶Tha rope rüshvu kethyü lo kemu genyu rotho nyu nle nkenyü hü mvu.

⁷Tsontsin a-le, ‘Lesüsü gü nyu arüla thu pe kenjün hontse, O, hire, Sunggigü ale n kendo gü tsü thyüshü tile tseo ryü la sele,’ ” tson.

⁸A-le keri dan tsü zokeshü ka, “Nle kershvu dan lo tha hope kershvu dan lo tha rope kershvu dan lo kemu genyu kershvu dan nkendo mvu nmvue nkenyüe mvu.” A-le zo tha hidan hile tejvü genyu pe rüshvu keshü gwünzin.

⁹Tsonshü njüo a-le zo, “Hire, ale nkendo gü tsü thyü shü ti tseo ryü la sele.” Tson-o Sunggigü le rope kershvu tho when gü aphu pe khe laso lo Khrista pe kershvu gü khipe tsü bin nyu shülo laso.

¹⁰Lo Sunggigü kendo tsügü genyu Jisu Khrista mingü pe aphu genyu gwüngwa phou kerho thyü kela genyu nthyü kenshünlo laso.

¹¹Lo peshükeda lihigüe so-o khenyütsen nyü lotho thyüo kershvu tho kethyü si thyü nini bin hünyo, ai tsüle thame ka-e kemu dan sentinla loho.

¹²Ai Khrista we kemu dan genyu kethonthen genyu rotho nme thyüla njüo gungü Sunggigü njüzin bin tin laso.

¹³Tson-o a-shwikerüchün nyu ju no a-pha hensin binlo kemvuthen khwen bin tin laso.

¹⁴Kechamvule kershvu thyü gwa nti nyu nshünlo kela ju thyü pe kethonthen gwapen laso.

¹⁵Tsüntimvule Kenshün Kapu gü le a-jün zosin shü hünyo; a-le,

¹⁶“Npugü le zo-o, jon tsüdan siki ale anyugun zen-o kejopen kejozen nrün gü le higü hile: Ale a tejvü dan khipe anyugun nyun nyu shüti, lo ale tsüdan thu pe anyugun nyun ge shüti.”

¹⁷Lo a-le zosin-o, “Ale anyugun kemu dan lo anyugun serikemvu dan rüchün nimvu lati.”

¹⁸Lo kemu hidan jü kelo le binla yatselo, kemu genyu rotho nme-e thyü sinmvu lati so.

¹⁹Tsügenyu apvünyu ju, nle Jisu zi genyu pecheo kenshün bingü nyu yülo gwa so.

²⁰A-le phi süden pe khin kenjü, tsüle a-kon le a-thyümin tsünyu tson keshün kerhün tson nme khinshye shü laso.

²¹Lo nle Sunggigü ka kentsen n peshükeda le bin kelasi genyu.

²²Ngun nyun ketsin thyü tenyen-o nnyun ki n nmu kehü dan tsü thyü kenshünla, lo zü kenshün tsin lope nmin-e sülao a-khonni gunlo tinu.

²³Ngun sidyü nme zo kehü gü tsü tezen tsekho sen binlo nu, kechamvule tha zope ntsü kenjü gü le joketsin kethyü genyu.

²⁴Lo ngun tsühontse khinyunyu thu keyhun pe keso lo thatho kegwa nyu shülo tiyo tsü rüchün lo nu.

²⁵Peha nyu jvü hontse gungü kehun keteno kethyü gü tsü khela nya, ai tsangkeben jon gü le nkho nni kvu kebin hontse khinyunyu thu keyhun kvulo.

²⁶Tson-o nle ketsin thakesha gü hyulo kela siki n npvü nshwen nron thyüo kemu thyülo, kemu rothyü keloi nmv-e bin sin mvu so.

²⁷Ai n nmu nrün ketetsin kethyü gü khwen kebin gwünzin so, lo mah ketetsin kethyü tsüle shwikerüchün tsü ju roti.

²⁸Temi lihigüe Mosa jvü gü gwünrho kethyü shahu mihvu mishen le bin yatselo shwi njün mvu tse no sila hü.

²⁹Tson yatselo Sunggigü nyugü pe a-phabin thyü kedü, lo khipe a-thyü kenshün kelo kejopen kejozen kelo zigü pe tha lihi kemvu thyü, lo shwikenjün kapu gü nshwen tse kehü gü le tsünye ki a-shaja tsen kvu kethyü hyulo mvu ti ole!

³⁰“Kechamvule khünkezo le ajün le, ale kethun ni ti,” tson kezo gü ngun le a-sha bin nyo. Lo zoni keshü le, “Npugü le a-temi dan ketso ti.”

³¹Rhün kehü gü Sunggigü ben nyu chetsü titse kethyü tsüle kenshvu nme le.

³²Ai himhundyü hagun le keben hyu kelo sikikenjün kethyü kerü nyu-e nyhen bin kelo dan rüchün nishülo.

³³Tsükatsü khika we süda mhundyü nyu meno hagun kemüni lo hagun nthyü nnyü, lo khika we mele n nshwen pe tsühontse kebin nyu zen-o dan me thyü hü.

³⁴Kechamvule hagun le dothyü kebin nyu shwi pe hagun nyun kenjün thyü, bin zin hü nrün hagun kenya gwakvu kethyü nme le bin kela shao mele hagun hon nke nmhü-e hagun kenyü hü.

³⁵Tsügenyu hagun kepeche pe shwenla nya, tsüle a-chün keda le bin nyo.

³⁶Lo hagun Sunggigü kendo thyülo-o a-le tha zope bin kenjü gü hyulo nrün genyu hagun nyhenhi kethyü sen bin mvulo shvu.

³⁷Kechamvule ketsinlesü le hontse zo hü, “Thonsa mvu tse gunryü titse kehü gü le ryü ti, lo a-le ntsüla loho.

³⁸Ai atemi kentsen gü le a-ketenyen genyu rhün loti; ai a-le tesen nila yatselo, ale a-ge akenyü loho.”

³⁹Ai ngun we tesen nilao nke kelanyu kemvu, ai tenyen bin-o kenilo nrün nyu le.