Read Southern Rengma Naga IBRINYU 11 Bible Online

IBRINYU 11 - Southern Rengma Naga bible

IBRINYU 11

¹Ketenyen le sidyü hyu kemvu dan hyulo titse sha tsentsü kela nme.

²Kechamvule tsügenyu nbon nyu ju ai Sunggigü no anyugun le gwa letse kelo gwünzin.

³Ketenyen nyu kazü gü hile Sunggigü jo nyu nyhunlo, tson-o nle hyulo kegwa dan hile hyulo nrün kendi nyu chwiryü tse kethyü nle shalo.

⁴Ketenyen genyu Abel le Kain nyeki a-kershvu gwakvu kethyü nme thyü pe Sunggigü rüshvulo; ketenyen genyu Sunggigü le a-le tha sen ryüo rüshvu keshü khilo-o a-le kentsen nyu letse kolo; lo a-le sila-e a-ketenyen le jozo bin nyo.

⁵Ketenyen genyu Inok-e kesi hyu loho letseo a-zen küla, lo tson-o a-hyumvu la, kechamvule Sunggigü le a-zenlo kela genyu; a-zen kü kela mhundyü a-le Sunggigü kenyü thyülo letse a-jün zo ryü la.

⁶Lo ketenyen sen mvutse Sunggigü kenyü thyülo nrün ndi. Kechamvule temi lihigüe Sunggigü ki keryü nyu le a-le bin tsekethyü lo a-fü kehü nyu chün thyü pe tsü hü tsekethyü tenyen mvulo shvu.

⁷Ketenyen genyu Noah ko hyumvue petsülo mvulo keshvu le ryü kezhü Sunggigü kanyu jo shalo-o a-nyun nkhi ketsin thyüo a-kaminyu kenilo nrün genyu zürun nme chalo, lo hige a-le kazü gü nmula, lo tson-o ketenyen genyu a-le ketsen gwen kelo gü thyülo la.

⁸Ketenyen genyu Abraham ko Sunggigü le a-ko keshü ka a-jo zen-o a-no gwenlo nrün nme hyulo titse keshü nyu gunlo; lo a-le dikipon gun tiyo shamvu tse güla.

⁹Ketenyen genyu a-le tesin ki kehü hontse zope a-tsü kenjü kazü gü nyu tesin thyüo a-zen-o tha zope anyugun ketsü kerhün kethyü Isak lo Jakob au ai zen-o phika nyu yhun.

¹⁰Kechamvule a-le rünyi nyida a-bin kekhwen le binzin kehü gü nri bin, tsügü thyü keshü lo zü keshü gü le Sunggigü.

¹¹Ketenyen genyu Sara le then kela siki-e kekvu hyulo-o nyuphou pvülo a-le tha zope kenjü gü jo le ketsin letse tenyen kelo genyu.

¹²Tsügenyu kesinyu hontse kethyü nme ge a-tsi a-pwen no tsangge shyenyü hontse lo züda seki hachon swülo bu keho hontse yhun soryülo.

¹³Temi hidan hi aphu tha zope bin kenjü gü hyulo mvu tse ketenyen nyu sikü laso, ai anyugun le ntsen ki tsü hyu shüo anyugun kenyüla, lo anyugun le kazü gü nyu njwen kehü nyu lo ketsin letse rüchünla le.

¹⁴Kechamvule jo tsühontse kethyü zo kehü dan le a npvü arünyi, thyü nrün nme fü hü tsekethyü pe mehi tsentsü shü le.

¹⁵Anyugun le bin hüo chwiryü kela kazü gü tsü rüchün hü yatse kethyü we, anyugun le rani gunla nrün gwünkho hyulo ti atale.

¹⁶Ai tsüle rünyi tsügü nyeki gwakvu kethyü, tsüle tsangge rünyi gü nnyü kvula le. Tsügenyu Sunggigü le anyugun no a-le anyugun Sunggigü letse kethyü ko kejo mvula, kechamvule a-le anyugun genyu rünyi nyida nme ndo pe bin kela genyu.

¹⁷Abraham le Sunggigü le a-kegwa keshvu sha titse kesoka ketenyen genyu Isak khipe rüshvula, lo zope tsü kenjü hyu kelogü le a-nyuche gü khipe rüshvula titse so.

¹⁸Tsügü rüla zo kenjü le, “Isak ge ntsipwen zan tho ti.”

¹⁹A-le Sunggigü le kesi-e thyü nrhün nishü logwa tse kethyü tenyenla; tsühontse Abraham le kesi nyu Isak hyunilo.

²⁰Ketenyen genyu Isak-e siki ryü nrün dan rüla zo-o jochü pe Jakob lo Esau tsüshü.

²¹Ketenyen genyu Jakob le sigü kezhü ka jochü pe Josef nyuhvu nme me tse tsüshü, lo a-thün nrhun sen-o Sunggigü rüshvu.

²²Ketenyen genyu Josef le a-kesi kho nni kela siki Israel nyu nyenyu ju le tsonchü chwila nrün rüla zoshü, tson-o a-ru kesun rüla zoshü.

²³Ketenyen genyu Mosa nnyu kelo ka a-pepvünyu le shyeshen a-kebu njü, kechamvule anyugun le ntsenyu gü le zegwari tsin kethyü hyulo-o rajagü hukum zen mvue nshvu mvula.

²⁴Ketenyen genyu Mosa le peshü soryülo ntsin a-le Pharo nyugi nyu letse ko mvula.

²⁵A-le gwüngwa me ka kemu nyu a-kenyü yhüdyü thyü kebin nyeki Sunggigü temi ju zen-o meno a-nshwen nyhün kethyü le a-kenyü kvula.

²⁶A-le Ijipt nyu kenya aphu nyeki Khrista genyu tetsin kepfü we a-kenya le gon kvu letse rüchünla, kechamvule a-le siki a-chün gü fü hü kela genyu.

²⁷Ketenyen genyu a-le raja gü nyunkenta-e nshvu mvuo Ijipt khelao tinla. Kechamvule a-le a-yhütyü lope hyulo keho gü hyu kebin hontse nyhenhi bin kela genyu.

²⁸Ketenyen genyu nyuri gü nke gunkeryü gü no anyugun kesü mvulo nrün genyu nkenchwi kelo nga zenlo, lo tezi gü kezün shülo.

²⁹Ketenyen genyu temi ju le Zükenhon züda-e no kazü kesin hontseo pvüthü chwila Ijipt nyu dan we anyugun hontse ryü kethyü ka zü no anyugun nrhüshvu la.

³⁰Ketenyen genyu anyugun le jon tsenyü Jeroki chwida hun shü ntsin chwida le ntsela.

³¹Ketenyen genyu tenunyu serikemvu gi Rahab le jozen kemvu ju zen-o nkela mvulo, kechamvule a-le a-kenyüo rünyi rüzü keryü nyu nsin kelo genyu.

³²Lo ale tsünyeki nyu zo sin mon? Ale Gideon, Barak, Samson, Jefta, David lo Samuel lo sidyükeshanyu ju rüla zobulo titse kethyü le a-gwünkho ndi.

³³Tsüdan ko ketenyen genyu raja bin lolo, ketsen tho thyülo, lo zope bin kenjü dan hyulo, shünyo dan mün-e khinlo.

³⁴Mahkenyü ketsera-e bo kemhülo, zhethon yi-e nrhilo, kvu kemvu nyu-e nkolo, teri nyu-e kvulo, lo rünyi kecha ki shüpahü jue hü pe no tinla.

³⁵Tenunyu ju-e anyugun temi kesi le rhünni kelo hyulo. Lo kechanyu ju le meno anyugun hoshü kelagü mvule nthyü nnyü nyüla, tsüle anyugun le rhünni keso gwakvu kethyü nyu rhün solo nrün genyu.

³⁶Lo kechanyu ju le meno anyugun shwinyü, anyugun vü, lo ron pe anyugun dyülo njüo do thyü.

³⁷Meno tso lope anyugun jon, meno senkerü zhe lope anyugun rhenkhola, meno zhethon khipe anyugun dushvu, anyugun le tanyü gi nmvue tenyü gi ben-o hohü, anyugun le thame ndi, kenjün thyü, lo meno anyugun shwen sa.

³⁸Kazü gü le tsüdan zenlo kümvu la, anyugun le ho-o kazü kesi nyu lo kazüthun ki, kazü kepekü nyu tsokü nyuki ho hü.

³⁹Lo temi hidan hi aphu, anyugun ketenyen genyu mele anyugun nshwen sa-e zope bin kenjü gü hyulo mvu laso.

⁴⁰Sunggigü le ngun genyu tha gwakvu kethyü peha ndo pe bin kenjü genyu ngun sin mvutse tsüdan thyü pe gwapen shü mvu laso.