Read Southern Rengma Naga IBRINYU 12 Bible Online

IBRINYU 12 - Southern Rengma Naga bible

IBRINYU 12

¹Tsügenyu jünkezo nmhu keda le nhunpvü kebin genyu ngun hüsü kehü lo kemu nkho nni n nsü kehü tsü kelila, lo tson-o nyhen thyü nmhundyü zin hü gunlo tinu.

²Tson-o n ketenyen khipe nketsü gü lo thyüpen shü kehü gü Jisu nrilo, a-le shekerhün le a mhundyü ki bin kela gü genyu krus ge kejokepvü pe lihi kemvu thyüo nyhenlo, lo tson-o ntsoka Sunggigü Raja bin njüzin bin tin laso.

³Hagun shese lo hagun nyun kunla mvu nrün genyu, kemu nyu no a-shwirüchün sa lo a-ntsun sa-e nyhen kelo gü rüla rüchün shü shwi ta.

⁴Kehun le kemu zen kenren kethyü ka hagun le tezi ketsun keti nren mvu zun.

⁵Lo hagun le a-nyu laso tsekethyü hagun thu keyhun jo tsü nmhinla sele? “Anyu, Npugü le n nthyü nnyüo nsenkethyü tsü rüchün kenshenla nyalo, nmvue n kemu tsin pe nhi kethyü ka n shese la nyalo.

⁶Kechamvule Npugü le a-le so kehünyu senthyü hünyo, lo a-nyenyu lihigüe a-le zenlo kelanyu vüo zenlo hünyo.”

⁷Hagun no gwalo nrün genyu hagun nthyü nnyüo hagun senthyü kehü tsü nyhenlo, Sunggigü le hagun no a-nyu hontseo hagun ge tson hünyo. Kechamvule nyu segü le a-pvü le a-nthyü nnyüo a-senthyü kemvu le bin nla?

⁸Keshanyu laka me kechanyu aphu a-nthyü nnyü kethyü hyulo kü lo hagun we khela yatselo tsüle hagun le nyutsin nyu mvule teshvu nyu laso.

⁹Tsünyeki kazü nyu npvü nyu le n nthyü nnyüo nsenthyülo nle a-rühvu hünyo. Tsonlo nle rhünlo nrün genyu tsünyeki-e nle n Kapu pvügü jozen kvu mvuti ole?

¹⁰Kazü nyu npvünyu le a-mhundyü ka a-zü tseo a-gwünkho keshanyu ka n nthyü nnyüo nsenthyü hünyo. Ai a-we nno a-kenshün hyulo titse ngenyu kegwa kon ka n nthyü nnyüo nsenthyü hünyo.

¹¹N nthyü nnyüo senkethyü le aphu tse nyeka we nkenyü mvule thyüri hünyo; ai tsü lope a-senthyü kelonyu le kekhin ki tsügenyu nyun kebwen rasha kentsen keseri nsha shü hünyo.

¹²Tsügenyu hagun buthun kenla tsü penso shü lo hagun kho kvukemvu thyü nko shülo!

¹³Lo tson dan thyü kenzhü shülo, tson-o phayhon gü no rhunkekhün la mvule ponlo la nrün genyu.

¹⁴Hagun temi aphu zen kengü gwalo titse lo nshün lo titse kethyü hagun yhen thyülo, tsühontselo kemvu we temi nme-e Npugü hyulo ho.

¹⁵Temi nme no Sunggigü shwikenjün gü gwünzü la mvu nrün, tsüle kekhü bin nme no tsü soryüo hagun kevüla lo tsügenyu temi kechon thyü nrhula mvu nrün genyu petsülo.

¹⁶Tsüle temi nme no yhun serimvu nmvue ketsin rüchün mvuo Esau hontse gintho gwa genyu a-peshü jün jwen tyüla mvu nrün genyu petsülo.

¹⁷A-le kekhin ki jochü a-le keni kelagü tsü gwenlo nyüo a-yhüphu che-o füe thame thyüo a-nyun keluni kelo gwünkho ndila tse kethyü hagun ko sha bin ti.

¹⁸Tson-o hagun le kesülo kegwa kazüthun ka mah kenyü metsen tse lo züntin tsekethyü lo tsangkenbu terhi kethyü,

¹⁹lo shu kekhun khwen, lo jokezo khwen gü nyü kelonyu ju le anyugun ka jo zosin nya gwünlo tseo hi sola kethyü gü ki gunryü mvu zun.

²⁰Kechamvule, “Nyukhu-e kazüthun tsügü keju shü yatselo tso pe jon shvula ti,” tsekethyü jo gü tsü nyhen loho la.

²¹Lo shwikenrin thyüri tsin kela genyu Mosa-e, “Ale nshvu pe ake nsüla le,” tse zo.

²²Ai hagun we Sion kazüthun ge rhün kehü Sunggigü rünyi nyida gü, tsangge Jerusalem gü lo jolonyu swülobu keho le shekerhün thyü kequen kebin nyu.

²³Lo tsangge a-zan thulo kela nnyulo kerinyu kehun nyu, lo temi aphu ketso nrün Sunggigü ka, lo thyü pe gwapenlo kela kentsen nyu ju ka.

²⁴Lo kejopen kejozen kelo keshün gü nyu a-jaka kebin gü Jisu ki, lo Abel zi nyeki zope gwakvu kehü kezün pe gwün kethyü zi gü ki ryü laso.

²⁵Hagun nthon kebin gü jo kenila mvu nrün genyu petsülo nye. Kechamvule kazünyu anyugun nthon keshü jo gü zen mvu kela ka nrhilo nrün ndila yatselo, nle tsangge n nthon kebin jo gü kenila yatselo tin-o nrhi loho kvula ti.

²⁶Tsükatsü a-jo le kazü sükenu shü, ai ntsoka we a-le zope bin kenjü le, “Ale gwüngwa nme ka kazü ntimvule, tsang ai sin-o sükenu shü ti.”

²⁷“Gwüngwa nme,” tsekethyü jo hi ge tsin keshü le nnu kemvu dan no binlo nrün genyu nnu kela dan a-kon le nyhun keshü dan sentin la nrün shalo hünyo.

²⁸Tsügenyu ngun nnu nrülo keho keda kethyü nme hyulo kela genyu a-cheno lonu, lo Sunggigü shye nshvu kelo hontse a-no lolo kekü kershvu thyü pe a-tsü tinu.

²⁹Kechamvule ngun Sunggigü le tha rokemhenla kehü mah nme kethyü genyu.