Read Southern Rengma Naga IBRINYU 13 Bible Online

IBRINYU 13 - Southern Rengma Naga bible

IBRINYU 13

¹Tsagü sikezen gü kekeso no binzin lo, lo tha lope tesin tsü la kethyü rüchün zinlo.

²Kechamvule nduka tsügenyu peha le shamvu tse tsangge jolonyu nsinlo kethyü genyu.

³Dothyü kebin nyu lo meno a-nshwen kebin nyue anyugun thyümin-e nthyü min a-keme letse kethyü rüchün-o tsüdan phin rüchünlo.

⁴Hagun aphu senkethyü rühvu mvulo shvu; lo sunkethyü zhü gü nrhula mvu bin mvulo shvu; kechamvule Sunggigü le kemeshün nyu lo keyüla nyu ketso nrün genyu.

⁵Pisa ketepen nyu hagun keyhun petsülo, lo hagun le nyu le bin yo tsü sen-o rünyu lo, kechamvule Sunggigü le, “Ale thame ka-e nhoshü loho; nmvue nkhela loho,” tse zoshü kela genyu.

⁶Tsügenyu nle pecheo, “Npugü le akeche gü, ale nshvu loho. Temi le age nyu thyü shülo tila?”

⁷Hagun himhundyü ki Sunggigü jo pe hagun ka zo keshü hagun sharhinyu ju rüla rüchünlo; anyugun keyhun le dihontse yo rüchün shülo, lo tson-o anyugun ketenyen sithen lo.

⁸Jisu Khrista le ndu-e lo nthu-e lo kethonthen a-keme.

⁹Senkethyü jo keshün lo lile hile tse kethyü no hagun sa zentinla nya; ketyüketsü jvü mvule shwikenjün gü pe hagun nyun thyü nkolo kethyü gü we gwa, tsüdan, then kehü dan le a-kechwi hyulo hümvu.

¹⁰Ngun le kershvu phika gü nyu lotho thyü kehünyu le a-ge tyülo nrün kendi kershvubin nme le bin laso.

¹¹Kechamvule kemu rotho thyü tseo peshükengun gü no a-zi sen-o kenshün bin nyu yükeryü nyukhu min dan tsü sen chwigü rünyi ngwen ki rola la tse gunryü.

¹²Tsügenyu Jisu ko a-npvü a-zi pe temi dan thyü kenshünlo nrün genyu chwida ngwen ki kenjün thyüla.

¹³Tsügenyu ngun chwida ngwenzin chwio a-ki gü a-genyu tetsin pvülo tile nu.

¹⁴Kechamvule hinyu we binzin nrün rünyi ndi, ai nle ryü kezhü rünyi nme tsü fü hünyo.

¹⁵Tsügenyu ngun a-zan sen-o Sunggigü keshwen kershvu thyü shü zin binlo nu, lo tson-o a-zan shao nmün lope a-zan shwen lonu.

¹⁶Thakegwa kethyü lo tha khipe metsü mejün kethyü nmhinla nya, kechamvule kershvu tsühontse kethyü tsüle Sunggigü le a-kenyü kehü genyu.

¹⁷Hagun sharhinyu jo zenlo, lo tsüdan hensin binlo; kechamvule tsüdan le anyugun tho rüla pe Sunggigü ka zo nrün genyu hagun kapu khwen ntsen bin kehü genyu. Tsügenyu anyugun no anyugun shekerhün thyüo thyülo; kechamvule anyugun no anyugun nyun gwamvula yatselo hagun ko kechwi nme-e ndi kethyü genyu.

¹⁸Agun genyu kehithyü binlo, kechamvule agun le thatho lihi nyu-e thatho kegwa thyü nyüo agun nshün kebin sha tsetsü bin nyo.

¹⁹A nipe hagun ki shü nshwenlo nrün genyu ale hagun no kehithyü kenyekvu binlo lotse hi tenge shü bin nyo.

²⁰Nyunkebwen khishü kehü Sunggigü, kesinyu Npugü Jisu Tanyü kekhwen kedagü thyü nrhünni kelo gü, lo kethonthen kejopen kejozen kelo zi no,

²¹hagun pe a-kendo thyülo nrün genyu tha kegwa lihi aphu pe hagun ge shüo, Jisu Khrista nyu aphu dan nyu a-kenyü gü thyü binlo nda. A-no kethonthen zankechwi gü thyülo. Amen.

²²Apvünyu ju, hagun no ale hagun thukeyhun keshü jo hi hagun kenyü mvula nyao nyü shü lotse hagun ka hishü bin nle, kechamvule ale thu nzü sa shübin nyo.

²³Ngun sikezen gü Timothi hoshü kela rüla ale hagun ko no shanyü, a-le nshwen gunryü yatselo ale a-zen ryüo hagun zen kehyu tile.

²⁴Hagun sharhinyu ju lo kenshün nyu ju aphu kelushü le, Itali nyu kebin nyu ju le hagun kelushü le.

²⁵Shwikenjün gü no hagun aphu zen bin kelo gü thyülo. Amen.