Read Southern Rengma Naga IBRINYU 2 Bible Online

IBRINYU 2 - Southern Rengma Naga bible

IBRINYU 2

¹Tsügenyu nle nyülo kela dan nle tsüdan nrhi kela kenshvu genyu nyhen thyüo tsüdan rüchün kegwa thyü kvulo mvulo shvu.

²Tson-o tsangge jolonyu mün nyu chwikeryü jo-e thyü kelulo nrün ndi lo tejvü gwünkerho-e lo jo zen kemvu aphu a-shaja kho hyu tsentsülo hü yatselo;

³kenikelo le gon pe hitsülaki kethyü gü zenlo mvula yatselo nle dikipon tinlo tila? Tsüle Npugü le a-npvü zo teri gunryü, lo jo tsügü nyü kelonyu le nka-e jünzo shü.

⁴Lo Sunggigü le a-npvü a-kendo thyüo tha zansü lo ndun kethyü tho, kekvu shaseni lo Kenshün Kapu jochü pe jo tsügü nyü kelonyu che-o jünzo shü.

⁵Lo Sunggigü le nle a-rüla zo kehü siki ryü nrün kazü gü khipe tsangge jolonyu hensin shüla mvu.

⁶Tsonkethyü gü mvule ketsinlesü peha ka zo keshü le: “Temi hile nyu letseo nle a-phin rüchün hü nla; nmvue temi nyugü hile nyu letseo nle a-shweshwi hü nla?

⁷Nle a-gwünkho keshanyu ka genyu a-thyü pe tsangge jolonyu nyeki tsenyo din laso; nle zankechwi lo teshwe pe a-keda perün thyü shü laso,

⁸nle tha aphu khipe a-pha hensin shü laso.” “Lo a-le tha aphu pe a-hensin shükela ka a-hensin shümvu kebin nme ndi so”; ngun le ntsoka tha aphu a-hensin shü kü kela hontse hyu mvu bin nyo.

⁹Ai tsangge jolonyu nyeki keshanyu jaka genyu a-thyü tsenyo din kela gü Jisu tsüle si-o kenjün thyü kelo genyu zankechwi lo teshwen pe a-keda perün hontse thyülo kela nme nle hyu bin laso, tson-o Sunggigü shwikenjün genyu a-no temi lihigüe sun thyüo si nrün genyu.

¹⁰Kechamvule tha aphu thyü keshü gü lo a-genyu tha aphu yhun kebin gü, anyenyu zen-o zankechwi nyu ryü kejü gü no anyugun kenikelo sharhi gü thyülo nrün genyu kenjün thyüo gwatilo kethyü le a-zü kela genyu.

¹¹Lo anyugun thyü nshün kehü gü lo nshünlo kela dan-e tse kengüo nme ge chwiryü kü. Tsügenyu a-le anyugun lope a-sikezen nyu dan letse ko kejo mvuo

¹²zo, “Ale nzan zope asikezen nyu dan tesha shü ti; ale süda gü dan nyu nshwe ti.”

¹³Lo “Ale aketenyen pe a-ge shüti.” Lo ntsoka-e hire, “Ale lo Sunggigü le khipe aketsü ntsenyu dan le re.”

¹⁴Lo nyu tsüdan le a-thyü a-zi thyü pvü kethyü genyu a-ko tsühontse a-thyü a-zi thyü pvü; tsüle kechamvule a-le si-o kesi kekvu kesen gü, tsüle tero serikemvu gü kekvu bo kemhenla nrün genyu le.

¹⁵Tsüntimvule kesi nshvuo a-keyhun then a-do thyü tinkela nyu hoshülo nrün genyu.

¹⁶Ketsin, a-le tsangge jolonyu ju ntsenlo titse mvule Abraham tsipwen dan ntsenlo titse tsentsü laso.

¹⁷Tsügenyu a-no Sunggigü lokethyü denzin me shwinjün lo joketsin püshükeda gü thyüo temi dan kemu ro thyüla nrün genyu tha lihi nyue a-sikezen nyu dan hontselo mvulo shvula.

¹⁸Lo mele a-semen-o a-le kenjün thyü kelo genyu a-le mele semen kebin nyu keche shü logwa.