Read Southern Rengma Naga IBRINYU 3 Bible Online

IBRINYU 3 - Southern Rengma Naga bible

IBRINYU 3

¹Tsügenyu apvünyu kenshün nyu dan, tsangge ko kebin nyu kerhün kebin dan, ngun le zoshwi kehü gü apostel gü lo npeshü kedagü Jisu rüla rüchün shülo.

²Mosa le Sunggigü kami aphu dan nyu joketsin zo kethyü hontse Jisu ko a-kejü kelogü mhundyü nyu joketsin zoshü.

³Ai ka thyü keshü gü le kagü nyeki teshwen le bin kvu kethyü hontse Jisu ko Mosa nyeki a-zan chwi kenye kvulo laso.

⁴Lo ka lihi-e a-thyü keshü nyu le bin hü, ai tha aphu thyü keshü gü le Sunggigü.

⁵Lo Mosa we Sunggigü kaminyu joketsin kezo gonyu nme thyüo siki zoshü nrün jo pe zoshü.

⁶Ai Khrista we nyutsin nyu thyüo Sunggigü kaminyu dan nyu joketsin zoshü. Lo nle nsidyü nyu n kepeche lo nkenjü gü tezen tsekho bin yatselo ngun hile A-ka.

⁷Tsügenyu Kenshün Kapugü le kezo hontse, “Hagun nthu akhwen nyülo yatselo,

⁸nduka Sunggigü ntsun kethyü hontse nmvue tehenyu a-semen shwi kethyü nyü hontse hagun nyun rüla nya.

⁹Hagun bon nyu le tehen tsünyu asemen lo tson-o chen henzi atho dan hyu laso.

¹⁰Tsügenyu ale temi tsüdan ge akenyü mvula, tson-o anyugun le kethonthen rüchün kezü nyu bin hü, anyugun le thame ka-e anyugun tson shalo mvula so.

¹¹Tsügenyu ale anyun ntao swe-o, ‘Anyugun no akerüyü nyu yüryü loho!’ ”

¹²Apvünyu ju, hagun dan nyu peha le serikemvu lo tenyen kemvu nyun pvüo rhün kehü Sunggigü ben nyu chela nrün kenshvu genyu petsülo nye.

¹³Ai kemu mesa kehügü no hagun peha nyun thyü pe rü kela kenshvu genyu “Nthu” tse kebin then khenyütsen hagun khinyunyu thu keyhun binlo.

¹⁴Kechamvule nle binzen ka tenyen tsentsü kelogü tezen nko sen bin-o kekhin gü tilo yatselo nle Khrista zen-o kerhün hon thyü bin kelanyu genyu.

¹⁵Ketsinlesü le hihontse zohü nyo: “Hagun nthu a-khwe nyülo yatselo, nduka Npugü ntsun kethyü hontse hagun nyun rüla nya.”

¹⁶Senyu le a-khwe nyülo-e a-nyun rüla la? Mosa no Ijipt nyu anyugun zen chwi keryü nyu aphu mvu ole?

¹⁷Lo senyu ge a-le chen henzi a-kenyü mvu hü la? Mula-o sikelanyu ju genyu mvu ole?

¹⁸Lo a-jo zen mvu kela dan kemvu we senyu no a-kerüyü bin nyu yü loho letse swe ola?

¹⁹Tsügenyu nle hinyu hyukelo le anyugun le tenyen kemvu genyu tsünyu yü loho kela gwünzin.