Read Southern Rengma Naga IBRINYU 4 Bible Online

IBRINYU 4 - Southern Rengma Naga bible

IBRINYU 4

¹Tsügenyu a-kerüyü nyu yülo nrün jole kebin zun genyu, hagun temi nme-e no tsünyu yülo mvukela thyü mvu nrün genyu ngun nshvulo nu.

²Kechamvule tsüdan hontse ngun-e jolokegwa gü nyülo laso; ai tsüdan le jo gü nyü kethyü ka ketenyen le sinmvu kela genyu jo tsügü kenyü genyu anyugun kechwi nme-e hyulo mvula.

³Tson-e ngun tenyen kehü dan le kerüyü tsünyu yüzhü nyo. A-le zokeshü hontse, “Ale anyun kenta nyu swe kethyü hontse: ‘Anyugun no a kerüyü bin nyu yü loho!’ ” Kazü thyülo keri kanyu a-tho dan thyü penlo la yatse-e.

⁴Kechamvule a-le dika yo nmeka jon tsenyü rüla hihontse zo njü, “Lo Sunggigü le jon tsenyü nyü a-tho aphu genyu rüyülo.”

⁵Lo hinyu we a-le kezo le: “Anyugun no thame ka-e akerüyü nyu yülo ho.”

⁶Lo peha nyu we yülo titse kethyü jo le bin nyo, ai nduka jolokegwa zo pe hi kela dan we jo zen mvukela genyu yülo mvula tsekethyü sha bin laso.

⁷Tsügenyu “Nthu” tson-o tsüsiki kethon ki David mün nyu ngüka zoshü kela hontse khenyüme jon nme tho ni-o: “Hagun le nthu a-khwe nyülo yatselo hagun nyun rüla nya,” tson hünyo.

⁸Lo Joshua le kerüyü khipe anyugun tsüla yatselo, Sunggigü le tsüsiki tsangkeben jon kecha nme rüla zoni loho.

⁹Tsügenyu Sunggigü temi dan genyu we kerüyü jon nme le bin zun.

¹⁰Lo Sunggigü kerüyü nyu yü kelanyu le, tsünyu le a-tho nyu rüyü tinkela hontse rüyü tinla ti.

¹¹Tsügenyu temi nme-e no jozen mvukela tsüdan hontse chela mvule kerüyü tsünyu yülo titse kethyü hagun yhen thyülo nu.

¹²Kechamvule Sunggigü Jo gü le kerhün lo kekvu kebin jo, zhethon yi kepen nyeki gwakvu, nnyun lo nkapu jenkho sen-o n keren lo ntsin nyu nyu ai yü gü nnyun kendo kerüchün lo nle thyü nyü kebin dan ai kese-o shalo hü nyo.

¹³Lo tson-o a-le nyhun keshü dan nme-e a-yhühyu ka kebulo bin mvu, tsüntimvule nle a-mhundyü nyu gungü n npvü nrüla pe zo kü nrün gü yhütyü mhundyü nyu we tha aphu khishwi pe ndo njü nyo.

¹⁴Lo nle tsang pvüthü kü kela n Peshükeda gü, Jisu, Sunggigü Nyugü le kebin si genyu nle zoshwi keshü nketenyen gü tezen tsekho sen bin lo nu.

¹⁵Kechamvule n peshü kedagü le nkvu kemvu nyyu nphi rüchünlo keho gü mvu, ai nhontseo tha aphu nyu a-semen-e a-we kemu nme-e ndi.

¹⁶Tsügenyu ngun shwikenjün hyulo, lo nmvulo keshvu ka-e a-no n njün-o ncheshü nrün genyu ngun nshvumvu tse shwikenjün keda bin gü kho nni gunlo nu.