Read Southern Rengma Naga IBRINYU 5 Bible Online

IBRINYU 5 - Southern Rengma Naga bible

IBRINYU 5

¹Lo peshükeda lihigüe temi dan nyu kejü pe no temi dan sunka Sunggigü mhundyü nyu mele tesha keshü dan lo kemu dan rokethyü lotho dan thyü nrün genyu bin njü hünyo.

²A-le a-npvüe gwa pen kemvu genyu a-le tha shati kemvunyu lo thyüzü kehünyu ge a-nyun bwenlo gwa.

³Tsügenyu a-le a-npvü a-kemu genyu metse lo temi dan kemu genyu metse tha pe rotho thyü mvulo shvu.

⁴Tson-o temi nme-e a-npvü zankechwi tsügü khi pe a-ge shülo hü mvu, ai Aaron hontse Sunggigü npvü kolo hünyo.

⁵Tsühontse Khrista ko a-npvü a-thyü ketetso pe peshükeda thyülo mvu, ai a-ka, “Nle Anyu le; Ale nthu n nnyulo laso,” tse zokeshü gü le a-kejü shü.

⁶Lo kecha nme ka ko a-le hihontse zo, “Nle Melkizedek hontse kethonthen peshükeda thyü laso.”

⁷A-le kazü hinyu yhun ketseka kesinyu-e a-kenishülo kegwa gü ka ayhüphu che lo nra tetso-o a-shwikenjün hi-o kehi thyü sa. Lo a-le Sunggigü shye nshvu kehü genyu a-kehi thyü pe a-tsü.

⁸A-le Sunggigü nyue a-le kenjün thyü kelo nyu jo kezen jvü shalo.

⁹Lo a-le gwapen kelo siki, a-jo zen kelonyu aphu genyu kethonthen kenikelo bin gü thyü lo laso.

¹⁰Lo Sunggigü le a-lope Melkizedek peshükeda hontse peshükeda thyü shü laso.

¹¹Melkizedek rüla tha kechon kezoi le bin nyo, ai hagun nyetin rügü kela genyu a-kon zokho pe hagun zen tsen laso.

¹²Lo ntsoka hile hagun le me senkethyüe thyülo zü so, tson-e hagun le meno Sunggigü jo a-binzen keri dan zope hagun hi ni mvulo shvu bin laso. Hagun le ketyüketsü kenko mvule nyüzü sen mvulo shvu bin laso.

¹³Kechamvule temi lihigüe nyüzü pe a-gintho thyü kehü nyu le kentsen keseri nyu a-sikesha ndi zun, a-le nyuhonyu thyü kebin zun genyu.

¹⁴Ai ketyüketsü kenko we peshülo kelanyu chvü thyü hü nyo, tsüdan we a-nyun sen-o tha rüchün kenye kela genyu tha kegwa keshvu sha kekholo hünyo.