Read Southern Rengma Naga IBRINYU 6 Bible Online

IBRINYU 6 - Southern Rengma Naga bible

IBRINYU 6

¹Tsügenyu Khrista rüla senkethyü jo keri dan nken sen-o gü gwati penlo tinu.Tson-o kesi tho nyu nyunkelulo lotse, lo Sunggigü ketenyen,

²Baptism lo nben shwe pe me ge keshü, lo kesinyu le rhünni so nrün lo kethonthen genyu ketso nrün rüla senkethyü jo dan binzen si mvulo nu.

³Lo Sunggigü le nno hi thyülo tselo thyü ti.

⁴Kechamvule peha le himhundyü ki Sunggigü keben hyulo, lo tsangge jochü-e ntsin shwi, lo me zen-o Kenshün Kapu-e kerhün hon thyü.

⁵Tson-o Sunggigü jo kegwa gü-e lo siki keyhun nyu kekvu gü-e ntsin shwi,

⁶tson-o ranila yatselo temi tson kethyü nyu no nyun kelunilo nrün genyu anyugun thyü kenshün nilo nrün ndi. Kechamvule anyugun le Sunggigü nyugü pe krus ge hüni lo me mhundyü nyu a-lope kejokepvü thyüni kethyü genyu.

⁷Lo kazü le tsangri pe gwünshü zin bin kehü kazü le zütsülo-o sen mvulo keshvu dan nyhun pe low tsü kebin nyu tsüshü lo Sunggigü kanyu jochü hyulo hünyo.

⁸Ai kazü tsügü le tsehü lo nyhe nyhun shüla yatselo, tsüle thaja thyü laso, lo meno swe tsü gü zhü laso; lo siki a-rola nrün gwünzin lati.

⁹Lo akesonyu ju, ale hihontse zoshüe ale hagun rüla tha tsünyeki kegwa dan me sha tsentsü bin nyo, lo tsüle hagun kenilo nrün rüla le.

¹⁰Kechamvule hagun le Sunggigü zan nyu Kenshün nyu Lotho thyü lo so keryü lo ntsokae thyü kehü Sunggigü le njü mvu sabin kemvu genyu tsü nmhinla loho.

¹¹Tson-o akenrin gü tsüle hagun lihigüe no hagun yhen kethyü tsüno a-gwünzin gungü hagun sidyü bin tsentsü kethyü fü zin gungü a-keni tilo nyü bin nyo.

¹²Tsügenyu ale hagun no hagun shesela nyü mvu ai tenyen hü lo nyhenhi hüo Sunggigü le zope bin kenjün gü hyulo kela dan hontse lonyü.

¹³Lo Sunggigü le tha zope Abraham ketsü ka, a-le zo-o swelo kegwa a-nyeki gonkvu kethyü ndi kela genyu a-npvü a-zan nyu swe-o zo,

¹⁴“Ale jochü pe ntsü ti lo nthyü pe chvükenye shü tsentsü ti.”

¹⁵Lo Abraham le nyhenhi gungü zope a-tsü kenjü gü tsü hyulo la.

¹⁶Ketsin, temi-e a-nyeki kedagü zan sen-o keswe thyü hünyo, tson-o keswe gü lope jo kekera lihie kera penla hünyo.

¹⁷Tsühontse Sunggigü ko tha zope tsü titse zo kenjü gü hyulo nrün nyu dan ka a-jo kelula lo keho anyugun no sha ntsenlo nyü kethyü genyu keswe no anyugun jaka shü pe binla.

¹⁸Tsügenyu a-jo kelula loho tsekethyü jo tsühvu ge Sunggigü le thame kae nku lalo nrün ndi. Tsügenyu ngun tin sen-o a-hensin nyu kegun dan no a-mhundyü zin kebin sidyü gü tezen tsekho sen-o n kepeche no binlo nrün genyu le.

¹⁹Nle n sidyü higü hile n keyhun no kelu kenyonla mvu nrün genyu dyütun hontse kethyü, lo tsüle kenshün bin nyu phi lope khin kenjü nyu zin yü kela hontse kethyü n sidyü nme.

²⁰Jisu le Melkizedek hontse kethonthen peshükeda thyülo-o ngun sunka nmhundyü rio tsünyu yü laso.