Read Southern Rengma Naga IBRINYU 7 Bible Online

IBRINYU 7 - Southern Rengma Naga bible

IBRINYU 7

¹Lo Melkizedek hile Salem nyu Raja thyü, lo ketetso tsin gü Sunggigü peshükeda-e thyü; Abraham le raja nyu dan me gala-o gunryü kezhü ka Melkizedek le a-zen keteno-o jochü pe a-tsü.

²Lo Abraham le teri nyu tha hyu kelo tha lihie jün tseryü thyüo jünme pe Melkizedek tsü. Temi tsügü zan a-kon keri güle, “Kentsen Raja.” lo a-le Salem nyu raja ko thyü sin, a-kon le, “Gwaketho Raja.”

³A-le a-pvü ndi, a-jvü-e ndi, lo a-bon nyu-e ndi, a-le yhunso keryüe lo a-keyhun keni-e ndi, ai Sunggigü nyugü hontse a-le peshükeda thyü zin hü.

⁴Lo nbon Abraham le teri nyu hyukelo aphu jün tseryü thyüo jünme pe a-ketsü temi tsügü tsü le ditsü laki thyü gon yo rüchün shwi ta.

⁵Lo tejvü gü nyu johokeshü le peshükeda tho hyukelo Levi tsipwen dan no temi ju ka, tsüle anyugun tsagü sikezen ju Abraham tsipwen da ka jün tseryü jünme khilo lotse shü.

⁶ai anyugun tsipwen nyu yhun kemvu temi higü le jün tseryü jünme Abraham ka khilo-o jochü pe a-tsü kenjü dan hyu kelo gü tsü.

⁷Lo keshen gü le a-nye kegon gü ka jochü hyulo hü tsekethyü temi nme-e tsüle a-kemvu letse loho.

⁸Hika we sila nrün nyu no jün tseryü jünme khilo, ai ligü nyu we rhün hü n letse a-rüla zo kehü gü no lo.

⁹Lo jüntseryü jünme hyulo kehü gü Levi le kon me ka a-le Abraham ge bin-o jüntseryü jünme pe tsüla.

¹⁰Kechamvule Melkizedek le a-bon zen keteno kethyü tsüle a-le a-bon ge bin zun kethyü genyu.

¹¹Lo Levi peshükeda jvü nyu gwapen kelo thyülo gwala yatselo (kechamvule tsü hensin temi le tejvü gü hyukelo genyu) nyu thyüo Aaron le kethyü hontse mvule Melkizedek le kethyü hontse peshükeda kecha nme no soryü mvulo shvu ti la?

¹²Lo peshükeda kethyüe kelula yatselo tejvü güe kelu mvulo shvu laso.

¹³Kechamvule a-rüla jo hidan zope bin kenjü gü le tsipwen kecha nduka temi nme-e kershvubin nyu lotho thyü shwi hü kemvu nyu kelasi genyu.

¹⁴N Npugü le Juda tsipwen ge yhun gunryü tsekethyü sha tsentsü bin nyo; lo Mosa le tsipwen tsügü no peshükeda kethyü rüla thame zomvu.

¹⁵Lo Melkizedek hontse kethyü peshükeda kecha nme le soryü kethyü le tsü kon gü le ntsen kvu laso.

¹⁶A-le thyü min nyu yhun sokeryü tson kipon thyüzü kethyü kon genyu mvu, ai keni thyüla lo keho keyhun kekvu kipon peshükeda thyülo.

¹⁷Lo tsü rüla hihontse zo njü, “Nle Melkizedek le kethyü hontse kethonthen peshükeda thyü laso.”

¹⁸Johokeshü kerigü le kvumvu lo a-kechwi kendi genyu khe laso.

¹⁹Kechamvule tejvü gü pe thame thyü pe no gwapenlo kemvu genyu; lo kechagü nyu nsidyü gwakvu kethyü gütsü sen nyü laso, lo tsügü nyu nle Sunggigü kho nni gunlo hünyo.

²⁰Lo tsüle keswe nme-e sen mvuo thyü mvu. Himhundyü ki kethyü dan we keswe sen mvu tse peshükeda thyü gunryü;

²¹ai higü we a-rüla zokeshü gü le swe-o peshükeda thyülo, “Npugü le swela, lo a-le anyun kelu loho: ‘Nle kethonthen peshükeda thyü laso.’ ”

²²Higü hile Jisu thyü pe jopen jozen kelo gwakvu kethyü khi keshü gü thyü shü.

²³Lo a-kon kecha nme le: peshükeda kecha tsüdan we kechon, kechamvule anyugun le sila-o peshükeda tho gü thyü gunlo mvula kehü genyu.

²⁴Ai tsügü we kethonthen rhün bin kela genyu a-peshükeda tho tsü kelu loho so.

²⁵Tsügenyu a-zan sen-o Sunggigü kho nni gunkeryü nyu kenilo lo tse zin binlo gwa so; a-le rhün zin bin-o tsüdan genyu hi zin bin hü kela genyu.

²⁶Kechamvule n gun le peshükeda tsühontse, nshün, kemu ndi, rhula mvu, kemunyu zen kekho, tsanggenyu nyeki-e gonkvu kethyü sen mvulo keshvu genyu.

²⁷Lo a-we peshükeda kechanyu dan hontseo a-npvü a-kemu genyu ri lo tsüsika a-temi kemu genyue tse khenyütsen rotho thyümvue gwa so; kechamvule a-le a-phou pe me rothyü kela ka gwüngwa thyüo tsü aphu thyü pen kü kelasi genyu.

²⁸Lo tejvü gü we gwapen kemvu temi kejü pe peshükeda thyü hü; ai tejvü gü siki keswe jo gü we kethonthen gwapen kela nyu gü kejülo laso.