Read Southern Rengma Naga IBRINYU 8 Bible Online

IBRINYU 8 - Southern Rengma Naga bible

IBRINYU 8

¹Lo ale zokebin kongü le higü hile nle tsangge keda tsingü keda bingü nzhüzin binkela tsühontse kethyü nme pe n peshükeda thyü bin laso.

²Lo tsüle temi no mvule Npugü le a-npvü thyü keshü kershvu phika ketsin gü nyu lo kenshün bin gü nyu lotho thyü bin laso.

³Kechamvule peshükeda lihigüe no tha hoshü lo rotho thyüshü nrün genyu kejü shü hünyo; tsügenyu peshükeda higü hi ko tha peha sen gunryüo rüshvu mvulo shvula.

⁴Lo a-le kazü nyu bin yatse kethyü we, a-le peshükeda thyülo nrün ndi lati, kechamvule tejvü gü hontse tha khisen ryü rüshvu kehü peshükeda ju le kebin genyu.

⁵Tsüdan tsü le tsangge kebin dan rokethyü nme lo a-shye hontse thyü kebin gwünzin. Tsühontse Mosa-e kershvu phika gü penso shü titse keso ka Sunggigü le a-ka, “Kazüthun ge tsin pe a-hi keshü tsü joja gü gwünzin tse tha lihi-e thyülo nye,” tsonshü.

⁶Ai tsühontse Jisu we a-le a-ja nyu kebin gü thyüo kejopen kejozen kelo gü le gwakvu kethyü hyulo laso, kechamvule tsüle tha zope ntsü kenjü gü nyeki gwakvu kethyü gü ge chwikeryü genyu.

⁷Kechamvule kejopen kejozen kelo kerigü le thyü kezü ndi yatse kethyü we, kenyhun gü no bin nrün-i ndi.

⁸Ai a-le anyugun nmu-o: “Npugü le zohü nyo, jon dan le ryüjü nyo, ale Israel nyu kami dan zen-o, lo Juda kami zen-o kejopen kejozen kelo keshün nme thyü shüti.

⁹Tsügü we ale Ijipt kazü nyu anyugun bon nyu dan ben sülo-o anyugun tsonri chwiryü kelo jon nyü anyugun zen-o kejopen kejozen kelogü hontse mvu. Anyugun le tsüka azen-o kejopen kejozen kelogü nyu bin mvula, tsügenyu ako anyugun shwishü mvula le.

¹⁰Tson-o Npugü le zo, tsangkeben jon tsüdan siki ale Israel tsipwen dan zen kejopen kejozen nrün gü le higü tile: Ale ajvü dan khipe anyugun nyun nyu shü shü ti, Lo tsüdan thu pe anyugun nyu ge shü shü ti. Lo ale anyugun Sunggigü thyü ti, lo tson-o anyugun le atemi dan thyüti.

¹¹Lo anyugun lihigüe a-temi ka nmvue a-sikezen gü ka ‘Npugü shalo lo,’ tsekethyü zope kesenthyü mvula ti. Kechamvule tsüdan aphu keshen tsin ka gungü keda tsin keti asha küla nrün genyu.

¹²Kechamvule ale anyugun gwakemvu kethyü tsü shwinjün lati lo ale anyugun kemu dan rüchün sin mvu lati.”

¹³A-le kejopen kejozen kelo keshün nme tson kethyü tsüle a-le kerigü lope a-whegü thyü laso. Ai a-whe thyüla lo a-ren thyü kelagü tsüle ndi güzhü laso.