Read Southern Rengma Naga IBRINYU 9 Bible Online

IBRINYU 9 - Southern Rengma Naga bible

IBRINYU 9

¹Lo kejopen kejozen kelo kerigüe kershvu jvü dan lo kazü hinyu kershvu ka-e bin.

²Lo kershvu phika nme thyü njü, kamhuntsen gü tsülo pe kenshün bin gü letse hünyo. Lo tsünyu tsü makemben bin gü, miz gü, lo mehi keshü tensü dan pe sin njü hü.

³Lo tsüsigü ka phi süden pe khin kenjü tsen gü lope kenshün nyeki kenshün bin letse hü.

⁴Tsünyu tsü tharün kegwa ro kehü suna kershvubin, lo kejopen kejozen kelo khingü, suna pe jekü kethyü gü le bin, lo tsünyu tsü suna la manna pe a-nyu shü kenjü gü, Aaron thün a-nyü sen chwikeryü gü, lo tso ponhvu ge kejopen kejozen kelo jo tsü pe thu njü.

⁵Lo tsü soge gingvü kethyü cherub kenyhun le au sekin sükhun pe shwikenjün bin gü henpvü bin. Ntsoka tha hidan hi zolo kebui mvu.

⁶Lo tha tsüdan ndo nron pe tsühontse pe bin njü, lo peshükedanyu ju no katsen keri gü nyu yügü kershvu tho thyü zin bin hünyo.

⁷Ai tsüsigü tsen gü nyu we peshükengun gü npvü chenme ka gwüngwa yülo hü; lo tsükatsü tezi sen mvuo yülo hü mvu; lo tsü pe a-npvü a-genyu-e lo a-temi thyüzü kelanyu genyue kershvu thyü gunryü.

⁸Hige hi Kenshün le tsin tsentsü pe mehi keshü le kershvuka kamhuntsen güle kebin then kenshün bin gü khinshye shü mvuzun.

⁹Tsügü tsü le ntsoka gwünkho higü zansü thyü keshü. Tsüle tha khisen gunkeryü lo rotho thyü pe rüshvu keshü le rüshvu kebin gü nyun thyü pe nshün penlo mvu.

¹⁰Tsüdan tsüle ketyüketsü lo sü nshün kethyü sha seni. Hi aphu tegwen kipon then nrün tejvü a-le tejvü thyü keshün ni kemvu ka thyü hü tselo tse keshü nti.

¹¹Ai Khrista le tha kegwa gunryü la kethyü dan kershvu Kengun gü thyü gunryüo ben no thyü kemvu, a-kon le nyhun keshü kazü higü kemvu kershvuka gwakvu lo gwapen kethyü gü nyu.

¹²A-le tenyü lo methunyu zi sen mvule a-npvü a-zi sen-o kethonthen rhinhi kelo thyülo nrün genyu gwüngwa thyü kenshün bin nyu yü laso.

¹³Tson-o rhukelanyu ge tenyü lo methu zi, lo methunyu rope kershvu thyü kela jonbü kesin kezen shüo thyümin gü thyü kenshünlo hü yatselo.

¹⁴Tsünyeki kethonthen Kapugü nyu a-khipe nmulo keho thyü pe Sunggigü tsü kela Khrista zi gü we, kesi tho dan nyu hagun nyun thyü kenshün pe rhün kehü gü Sunggigü lothyü kvulo mvu tile?

¹⁵Kesi nme le kebin genyu a-le tejvü kerigü hensin thyüzü kelanyu rhinhilo, tson-o kolo kelanyu no kethonthen bin nrün zope bin kenjü gü gwenlo nrün genyu a-le kejopen kejozen keshünni kethyü gü nyu a-jaka kebin gü thyü laso.

¹⁶Lo tha zope me tsü kenjü lesü ndi yatselo, tha zo keshü gü le si-o hyulo hünyo.

¹⁷Kechamvule tsügü le sikela siki nyu lesügü le a-kekvu le binla hü, ai tha zokeshü gü le rhün kebin then lesü gü le a-kekvu ndi kethyü genyu.

¹⁸Tsügenyu kejopen kejozen kerigüe tezi sen mvu tse binzen mvu.

¹⁹Lo Mosa le tejvü hokeshü lihi-e zoshwi pe temi dan aphu hi keshütsen a-le methunyu dan lo tanyü dan zi khipe zü lo thyü hüphi kenhon lo hisop sinlo njüo lesügüe lo temi aphu gwün-o,

²⁰“Higü hile Sunggigü le hagun ka johokeshü kejopen kejozen kelo zigü le,” tse zoshü hü.

²¹Lo tsühontse a-le tezi gü kezen pe kershvu phi kagü lo tsünyu kershvuka nyu sen kehü thakhin dan aphu gwün küshü hünyo.

²²Ketsin, tejvü hensin tha aphu ka tsühontse kethyü tezi sen-o thyü kenshünlo lotse ryü: lo tezi tsunshü kemvu we kemu jükelo ndi.

²³Lo tsangge kebin dan me hidan hi ai tha tsüdan sen-o thyü kenshünlo mvulo shvula; ai tsangge kebin dan we tsüdan nyeki-e kershvu kegwa sen mvulo shvu kvu bin nyo.

²⁴Tsüntimvule Khrista gü we ketsin gü mvuo a-men gü benlo kethyü kenshün bin gü nyu mvule; ngun sunka tsangge yügü ntsoka Sunggigü mhundyü nyu hü laso.

²⁵Kechamvule peshükedagü le a-npvü a-zi mvule senru zi sen-o chenkechwi kenshün bin gü nyu yü kehü hontse Khrista we a-phou lope rüshvu nini tse bin loho so.

²⁶Tsonkemvu we kazü thyülo nyemhun nyu a-no kenjün thyü ni ni tse lati. Ai gunryüo chen kekhin ki a-npvü a-phou khipe kershvu thyülao kemu khipe shwela nrün genyu kethonthen genyu gwüngwa thyü me yhühyu thyü ryü.

²⁷Lo temi no gwüngwa si-o tsüsiki ketsokethyü no ryü titse kela hontse.

²⁸Khrista ko temi kechon kemu pvülo titseo gwüngwa nme a-phou hoshü laso; lo kenyhun gü ka me yhühyu thyü ryü nrün gü le kemu genyu mvule a-khwen kebin nyu kenilo nrün genyu ryü ti.