Read Southern Rengma Naga JAMES 1 Bible Online

JAMES 1 - Southern Rengma Naga bible

JAMES 1

¹Sunggigü lo Npugü Jisu Khrista gogü James le thu pe nrenru tinkela tsipwen tseryü kenyhun che dan kelu keshü.

²Apvünyu ju, kesemen shaseni le hagun ka keryü ka hagun kenyü salo nye.

³Kechamvule hagun ketenyen kegwa keshvu shwi kethyü genyu nyhenhi kethyü le chwiryülo hü tsekethyü hagun le sha bi nyo.

⁴Lo hagun gwa ti gwapen lo tha nme nyue pen kemvu thyü mvulo nrün genyu nyhenhi kethyü no a-tho tsü thyüsa shülo.

⁵Hagun ligühigüe thakesha rhodyü yatselo, a-no nho lo me nmu mvu tse khipe temi aphu tsü kehü gü Sunggigü ka hilo nye, tson yatselo khipe a-tsüti.

⁶Ai a-no kenyunhvu mvutse ketenyen nyu hilo, kechamvule kenyunhvu kehünyu le tsangkenbu no whü pe lizin hizin shü kehü zü keda kentyü hontse kethyü genyu.

⁷Lo temi tsühontse kethyü nyu no Npugü ka nyu tha lihi-e hyulo titse kethyü rüchün nyalo.

⁸A-le kenyun hvu kehünyu lo thame ka-e a-nyun tsü binlo hü kemvu genyu.

⁹Ngun sikezen nyu mijamira nyue no Sunggigü le a-penso keshü tsü rüchün pe ketekho lo.

¹⁰Lo kenya güe no a-thyü tsenyo keshü genyu a-sherhünlo nye; kechamvule tehen kepun hontse a-le ndila nrün genyu.

¹¹Yhüko le nnyü pe nyün soryüo tehen pho rügüla hünyo; tson-o a-kepun le rinla hünyo, lo a-zekegwa nmhenla hü. Tsügenyu kenya nyue a-yhen thyüo fü nsen kebin nyu ndila nrün genyu.

¹²Kesemen nyu nyhenhilo kehünyu le a-hen kegwa nyu; kechamvule a-le kesemen nken chwilo yatselo Sunggigü le khipe a-so kehünyu tsü titse zo kenjü kerhün perün gü a-le hyulo nrün genyu.

¹³Temi ligü higüe no kesemen le a-ge keryü ka, “Sunggigü le asemen bin nyo,” tsekethyü zo nya; kechamvule Sunggigü semen pe a-no tha gwakemvu thyüla lo nrün ndi; lo a-le temi nme-e semen shwi hü mvu.

¹⁴Ai temi ligühigüe a-le nnyü kehü gü no a-sü lo a-nsü sen gü a-semen la kehü gwünzin.

¹⁵Lo a-le nnyü kehü dan phou pvülo-o kemu nnyu shü hünyo, lo kemu gü tsüle peshülo yatselo kesi sen chwiryü hünyo.

¹⁶Keso apvü nyu ju, meno hagun sala nya.

¹⁷Jochü kegwa lihi-e lo jochü gwapen kethyü aphu teso ge kebin dan Pvügü kanyu ryü hünyo; lo a-le kelukenyon hümvu, nmvue n khepe kezün shye nyu shüla hü mvu.

¹⁸A-le nno a-le nyhun keshü dan rasha keri dan thyülo nrün genyu ketsin jo gü ge a-npvü a-kendo thyüo nzen chwiryülo le.

¹⁹A keso apvünyu ju, jo hi shalo nye. Temi ligühigüe nyü whütselo, ai nya jü tse jo zolo, lo nkenyü mvu whüwhü tsela nya.

²⁰Kechamvule temi nyunkenta nyu Sunggigü kentsen kenyü thyülo hü kemvu genyu.

²¹Tsügenyu hagun nshün kemvu aphu lo seri kemvu dan khe küla-o hagun nyun bwen-o hagun kapu kenilo kegwa jo lope hagun nyun nyu sen shü kela gü lolo nye.

²²Ai hagun npvü hagun sa pe nyü kehü nyu nti thyüla mvule jo gü thyüzen kehünyu thyülo.

²³Kechamvule temi ligühigüe jo gü thyüzen mvuo nyü kehü gwünzin we temi tsü gü le sheshwi nme ka a-npvü a-mhun hyu kehü hontse gwünzin.

²⁴A-le a-npvü a-hyu shüo ketu tinla yatselo a-le dihontse yo tsekethyü rüchün mvu whüla kehü genyu.

²⁵Ai temi ligühigüe a-hoshü kela tejvü gwapen kethyü gü nrio nyülo-o nmhinla mvu tse thyüzen kelonyu le tsünyu le a-le thyü kebin gü genyu jochü hyulo ti.

²⁶Temi ligühigüe a-le nyünyü kipon nyu letse rüchün hüo a-yi kekhenilo mvu yatselo a-npvü a-sa hünyo, lo a-nyünyü tsüe a-kenrun le.

²⁷Npvü Sunggigü mhundyü nyu nshün lo rhu kemvu nyünyü tsü le higü hile; tegonyu ju lo maginyu ju kenjün kethyü shweshwi kehü, lo kazü gü nyu a-npvü a-nrhula mvu bin kehü nyu le.