Read Southern Rengma Naga JAMES 2 Bible Online

JAMES 2 - Southern Rengma Naga bible

JAMES 2

¹Apvünyu ju, hagun le n Npugü Jisu Khrista, zankechwi Npugü tenyen kehü hontse pehanyu so kecha thyüla nya.

²Keshanyu laka temi nme le suna benkhin pvü, lo phi kegwa ben-o hagun kehun nyu ryülo tha kendinyu nme ko phiren khiben-o yüryü.

³Tsontsin hagun le phinya kegwa kesen gü rühvuo a-ka, “Hika binlo re,” tson, ai tha kendi gü ka we, “Tsüka so bin ta,” tson hü yatselo,

⁴hagun npvü hagun dan nyu temi süko kecha thyü lo hagun kerüchün gwa kemvu sen-o me rüchün kekho bin mvu ole?

⁵A keso apvünyu ju, nyülo ta, Sunggigü le kazü hinyu tha kendinyu kejü pe anyugun no ketenyen kipon nnya, lo a-so kehü nyu tsü titse zo kenjü keda kethyü gwenkelo dan thyüla mvu ole?

⁶Ai hagun le tha kendinyu rühvu mvu laso. Hagun nshwen nyhün kehünyu lo hagun sü zen-o jokera bin nyu gun kehü tsüle kenya nyu dan mvu ole?

⁷Tsüle anyugun le zankechwi gü, tsügü genyu hagun ko kelo gü zo nshvu hü mvu ole?

⁸Ketsin lesü nyu thu kenjü le, “Nle nkazonkazin so pe n npvü nkeso hontselo chi,” tsekethyü keda tejvü gü nyu thyü pen bin yatselo hagun le a-kenjü gü thyü bin nyo.

⁹Ai peha nyu so kecha thyüla yatselo hagun le mu laso, tejvü gü le hagun le tejvü gwünrho kehünyu letse hagun nmu laso.

¹⁰Lo temi ligühigüe tejvü aphu zen hüe kon me nyu tinmvula yatselo aphu nyu a-le mu laso.

¹¹Kechamvule, “Keyüla nya,” tse zo keshü gü le “Me dushvu nya,” tson kethyü güe zoni shü, tsügenyu nle keyüla mvue nle me dushvu yatselo nle tejvü gü gwünrho kehü nyu laso.

¹²N kekhin ndi kela tejvü gü le ketso nrün hontseo zo lo thyülo.

¹³Kechamvule me shwinjün hü kemvu nyu shwinjün mvu tse a-jo kera ti; ai shwikenjün gü le jokera nyu kvulo ti.

¹⁴Apvünyu ju, temi nme le a-le a-ketenyen le bin nle tse hü, ai a-tho ndi yatselo tsüle nyu kechwi le bin nla? A-ketenyen le a-kenilo gwa ti ole?

¹⁵Keshanyu laka nsikezen nyu nmvue nlügi nyu nme le a-phinya gwamvu, lo nthu gintho-e rhodyü bin.

¹⁶Lo tsükatsü hagun nme le anyugun ka nyun bwenye tse nyenbüntseo nginnyülo, tsonshüo a-thyümin genyu sen mvulo keshvu thame khipe a-tsüshü mvu yatselo, tsüle a-genyu nyu kechwi le bin nla?

¹⁷Tsühontse ketenyen-e a-tho ndi yatselo, a-npvü we a-kesi.

¹⁸Ai peha le nka, nle nketenyen le bin, lo ale atho le bin nyo, ntho sin mvu tse ketenyen tsin pe a hishülo, lo ako atho nyu a ketenyen tsin pe nhi shü tile tso zo so-e sha loho.

¹⁹Nle Sunggigü le nme tsekethyü tenyen hü amon? Gwale! Tero gwakemvu dan-e tsü tenyen hü nyo, lo nshvuo a-ke nsü bin hünyo.

²⁰Kepin gü! Ketenyen-e a-tho kendi we a-kenrun letse kethyü tsü tsin pe nhishü nyü bin nla?

²¹Ngun bon Abraham le a-nyugü Isak khipe kershvubin ge shüo rüshvu shü kethyü ka a-tho tsügenyu njülo la mvu ole?

²²A-ketenyen lo a-tho au le kengü hü lo a-tho ge a-ketenyen thyüpen keshü nle hyulo gwa.

²³Tson-o “Abraham le Sunggigü tenyenlo, lo a-ketenyen genyu Sunggigü le a-khipe kentsen nyu le tselo.” Lo a-lope Sunggigü pvügü letse kolo la, tsekethyü ketsin lesü le thu kenjü gü thyüpen lo.

²⁴Temi le a-ketenyen genyu nti mvule a-tho-e sin-o njülo hü tsekethyü hagun ko hyulo gwa.

²⁵Lo tsühontse Rahab keyüla chün tyü kehügi ko Israel nyu jolo thyü keryü hvu nsinlo-o au nipe tson kecha kipon shü kela genyu njülo la mvu ole?

²⁶Kechamvule nmin hile kapugü sinmvu yatselo sila kehü hontse ketenyen ko a-tho sinmvu yatselo a-kesi.