Read Southern Rengma Naga JAMES 3 Bible Online

JAMES 3 - Southern Rengma Naga bible

JAMES 3

¹Apvünyu ju, hagun dan nyu temi kechon no me senkethyü nyu thyü soryü nyalo, kechamvule ngun me senthyü kehünyu ketso petsü kvu nrün genyu.

²Ngun aphu thyüzü lala tse kehü genyu, temi ligühigüe a-le nyu zoyo yozü hümvu yatselo a-le gwapen kethyü nyu, lo a-le temi aphu kekhenilo gwa.

³Keshanyu laka nle tha lope keru mün khenlo-o a-no nkendo zenlo gwala yatselo, nle a-min aphu no dika günyü yo gülo hünyo.

⁴Tsühontse run le gon sa lo tsangkenbu kekvu no whün sen hüe run kejen nyu le run sükezelo kehü kanyü keshanyu nme no a-sükeze pe a-npvü a-kendo kipon gunlo hünyo.

⁵Tsühontse n-yi nge tha keshanyu nme, ai tsü lope kemakin sa tse tha kedada aphu zobin hünyo. Mah kenshwe keshanyu nme le chün keda ditsülaki thyü rola hü nla?

⁶Lo n-yi hile mah nme; nmin ge zanketho kechacha kethyü dan nyu n-yi hile serikemvu kazü nme; tsüle nmin aphu thyü nrhula hünyo, lo n-yi le mahzi nyu mah lope n keyhun jvü aphu roshvu la hünyo.

⁷Temi le tehenthyü lo tegü lo kazü nyu nyon kehü dan lo zü keda nyu kehü shaseni pe no a-jo zenlo gwa, lo tson ryü laso.

⁸Ai temi nme-e a-yi we kekhenilo shwi mvu; tsüle gwamvu pe sun binlo hü mvu lo kesi terün lope süpvü bin hünyo.

⁹Nle tsü sen-o Npvü Sunggigü shwe hünyo, lo nle tsü sen-o Sunggigü rhenrhü hontse thyükeshü temi tsüe swetsü hünyo.

¹⁰Mün nme nyu keshwe lo me sweketsüe chwiryü hünyo. Apvünyu ju, hihontse hü zümvu le.

¹¹Zükepünkü nme nyu zü tsükegwa lo zü kekhü tse tsun chwiryülo hü ole?

¹²Apvünyu ju, kherobin ge oliv sha nmvue vain bin ge kherosha nshalo hü ole? Khezi zü nyu zü tsü kegwa le chwiryülo hü mvu.

¹³Hagun dan nyu segü le thasha lo a-do gwa bin nla? A-no a-thakesha genyu ketekho mvuo yhun njü kehü a-tho nyu tsin shülo.

¹⁴Ai hagun le hagun nyun ki me shwi pe hagun yhüthyü, lo n npvü njün kegwa fü hü yatselo kemakin-o ketsin gü sa hünyo.

¹⁵Hihontse kethyü thakesha we tesoge ryü mvu, ai kazünyu nthyümin lo terogwakemvu gü kanyu gun ryü.

¹⁶Kechamvule dika me shwi pe nyhükethyü lo n npvü njün kegwa kefü le bin yo tha gwakemvu kethyü shaseni tsünyu bin kehü genyu.

¹⁷Ai tesoge keryü thakesha gü we keri gü le nshün, lo tsüsika kengü kegwa, njvükegwa, kejozen kene, me shwinjün sa kethyü, nsha kegwa, pehanyu so kecha thyü kemvu lo kerokon kemvu.

¹⁸Lo kengü kegwa tho thyü kehünyu le kengügwa-o gwünkeshü tsi gü tsü genyu kentsen gvülo hünyo.