Read Southern Rengma Naga JAMES 4 Bible Online

JAMES 4 - Southern Rengma Naga bible

JAMES 4

¹Nyu genyu hagun dan nyu teri kethyü lo kega kethyü le soryü hü nla? Tsüle hagun kenyü yhüdyü thyü kenyü dan hagun min ge teri thyü kehü dan genyu soryü hü mvu ole?

²Hagun le nnyü hü, ai hyulo hü mvu, tsügenyu me dushvu hünyo. Lo hagun le tepen hü, ai hyulo mvu; tsügenyu hagun le kenyi lo kega hünyo. Hagun le hihü kemvu genyu hyulo hümvu.

³Lo hagun le hi hü-e hyulo hümvu, kechamvule hagun le sen-o hagun kenyü yhüdyü thyü titse hizü kemvu dan hi kehü genyu.

⁴Ntsen serikemvu temi dan, kazü gü zen-o kepvüshen kethyü le Sunggigü shwikerüchün letse kethyü hagun le shamvu ole? Tsügenyu temi ligühigüe kazü gü zen-o kepvüshen kenyü nyu le Sunggigü shwinyü kemvu nyu thyüla hünyo.

⁵Ketsinlesü le kezo le, “A-le Kapugü thyü pe nnyun ka bin lo tse keshü gü le nnyüo meshwi pe a-yhüthyü bin hünyo,” tsekethyü jo tsüle kenrun letse rüchün hü le?

⁶Ai a-le shwikenjün khichon kvu shü hünyo, tsügenyu ketsinlesü nyu, “Sunggigü le ketekho kehünyu ntsun hünyu, ai shwikenjün khipe tsenyon kehünyu tsü hünyo,” tsonkethyü zohü.

⁷Tsügenyu hagun Sunggigü jo zenlo, lo tero gwakemvu gü nrenlo, tsonlo yatselo a-le tin-o hagun nrhi lati.

⁸Hagun Sunggigü kho nni gunlo; lo a-ko hagun kho nni ryü loti. Kemu nyu dan, hagun ben thyü nshün lo, lo kenyun hvu kehü dan hagun nyun thyü nshün lo.

⁹Hagun nyun gwamvulo, lo chechülo. Hagun kenyü no kechü thyüla, lo hagun shekerhün no dyükezin thyüla.

¹⁰Npugü mhundyü nyu hagun npvü hagun thyü ketsenyo lo, tsonlo yatselo a-le hagun thyü nso shü ti.

¹¹Apvünyu ju, hagun khinyunyu ge jo gwakemvu zo nya, temi ligühigüe a-pvü nyu ge zo nmvue a-pvü nyu nmu kehü gü le tejvü gü zo nshvu lo tejvü gü nmu kehü gwünzin. Ai nle tejvü gü nmu hü yatselo nle tejvü gü thyüzen mvule tsü nmu kehü nyu nme thyü laso.

¹²Tejvü khikeshü lo me ketso kehü gü le nme nti. A-le me kenilo gwa, lo me boshvula logwa. Ai nkazonkazin nmu kehü gü nle segü la?

¹³Hagun le hihontse zo hünyo, “Je, ngun nthu nmvulo senduki rünyi higü nmvue ligü ki gungü chenme tsünyu hathyüo kechwi fülo tile,” tson zo hünyo.

¹⁴Ai senduki nyu tsethyü tiyo hagun le tsü we sha hümvu. Hagun keyhun hile nyu la? Hagun keyhun le tha kekhu keshanyu ka chwiryüo hyu mvu nila kehü dan me hontse le.

¹⁵Tsügenyu, “Npugü kendo yatselo ngun le rhün bin-o tha higü nmvue ligü thyülo ti,” hagun le tsühontse zo hüzü.

¹⁶Hagun le tsühontse ketekho lo kemakin bin hünyo. Kemakin pe tsühontse kethyü tsü le aphu gwamvu.

¹⁷Tsügenyu temi ligühigüe tha kegwa thyü kezü sha bin-o thyü hü kemvunyu tsünyule mu le.