Read Southern Rengma Naga JAMES 5 Bible Online

JAMES 5 - Southern Rengma Naga bible

JAMES 5

¹Hire, kenya nyu dan, kenjün kethyü le hagun ge ryü kejü dan genyu chülo, lo chü nra nhulo chi.

²Hagun kenya dan tsü le renbu gü zhüla so, lo hagun phinya dan le a-nyun le tyübu gü zhü laso.

³Hagun suna lo hagun rakagi dan le mogwün bu bin laso, lo mokegwün tsüdan le hagun rüla zoshü bin nyo, lo mah hontse hagun thyü tyü lati. Hagun le jon kekhin gü gwünkho ki kenya kequenlo laso.

⁴Hagun le joketsin zomvu la-o meno hagun logvü keshün chün thyümvu kela a-chün gü le sen bin nyo, lo logvü nyu le sen keshü khwen le npu dan Npugü nyetin ka yü laso.

⁵Hagun le kazü hinyu yhun ketegvü lo hagun kenyü yhüdyü dan thyülo laso, tson-o hagun le hagun npvü hagun leyi pe dushvu nrün jon gü khwen bin nyo.

⁶Hagun le kentsen gü nmu-o a-dushvu laso; ai a-le hagun nrenni hümvu.

⁷Tsügenyu apvünyu ju, Npugü le niryü kemvuthen nyhenhi binlo. Hire, low ketsü gü le kazü gü nyu a-rasha kegwa khwen-o tsangkenri kerigü lo tsangri kekhin gü no a-low gwün keshü khwen bin hünyo.

⁸Tsügenyu hagun-e nyhenhi bin lo. Hagun nyun tsekho binlo, kechamvule Npugü keryü temün thyü bin kelasi genyu.

⁹Apvünyu ju, meno hagun ketso mvulo nrün genyu hagun khinyu khinyu genyu kenyon kenyü nya; hire, hagun ketso nrün gü tsüle kakhin ka sobin nyo.

¹⁰Apvünyu ju, sidyükeshanyu ju, Npugü zan sen-o jozo gunkeryü dan le kenjün thyü lo nyhenhi kethyü hontse hagun tsinhi nme thyü shülo.

¹¹Hire, ngun le nyhe kelonyu lope a-yhen kegwa nyu letse hünyo. Hagun-e Job le nyhenhi kelo rüla nyülo so, lo Npugü kendo le dihontse yo, Npugü le dihontse me phin rüchün lo me shwinjün hü yono.

¹²Ai apvünyu ju, tha aphu nyeki hagun tsang-e lo kazü-e zo-o swe nya, nmvue keswe kecha-e thyü nya, ai ele tselo ele tselo, lo nmvule tselo nmvule tselo, lo tsüle meno hagun nmu mvulo nrün genyu.

¹³Hagun dan nyu peha le kenjün thyü bin le? A-no kehi thyülo. Peha le a-nyun nyü bin nle? Tsünyu no lüthyülo.

¹⁴Hagun dan nyu peha le ho bin le? Tsünyu no kehun ketsen kehünyu kolo; tson-o tsüdan no Npugü zan nyu terzü pe yün-o a-genyu kehi thyülo.

¹⁵Tsonlo yatselo tenyen-o hi kethyü genyu ho kebin gü kenishü ti, lo Npugü le a-no solo ti; lo tson-o a-le kemu thyüla-e tsü jü pe a-tsü ti.

¹⁶Tsügenyu hagun keho kenyü no gwalo nrün genyu khinyunyu ka hagun kemu zoshwila, lo khinyunyu genyu hilo; kentsen nyu nme kehi le a-kekvu le gon sa-o tha thyülo kehü genyu.

¹⁷Elia ko ngun hontse kethyü temi nme thyü hü, a-le a-yhenthyü tsang no rinya lo tse hilo kela genyu, chenshen-o shyetsero tsang no ri-o kazü nyu tsüryü mvula.

¹⁸Tson-o a-le kekhin ki kehi thyü nishü, tsüsiki tsang rilo, tson-o kazü gü nyu tha le yhun ni chwiryülo, tson-o a-sha nshalo.

¹⁹Apvünyu ju, hagun dan nyu temi peha le ketsin gü gwünzüo nmhon tinla, tson-o peha le a-zenni gunryü yatselo;

²⁰tsünyu no sha bin lo nye: temi ligühigüe kemu nyu nme le thyüzü kebin a-tson nyu a-zen-o rani keryü nyu le kesi nyu a-kapu kenilo ti, lo kemu kechon kemihenla ti.