Read Southern Rengma Naga 1 PITOR 1 Bible Online

1 PITOR 1 - Southern Rengma Naga bible

1 PITOR 1

¹Jisu Khrista apostel thyü kelagü Pitor le pe kejülo kela dan le gungü Pontus, Galatia, Kapodokia, Asia lo Bethunia ki nren nru tinkela dan ka keshü.

²Npvü Sunggigü le hagun no nchwenyu Jisu Khrista jo zen, lo a-zi kezen pe hagun gwünlo-o Kenshün Kapu nyu hagun thyü nshün kelo le a-kendo kela genyu hagun kejülo laso. Shwikenjün lo nyun kebwen gü no hagun ge bin chonsa kelo gü thyülo.

³Ngun chenkeno khipe Sunggigü n Npugü Jisu Khrista a-pvügü tsü tinu; kechamvule a-le n shwinjün sao Jisu Khrista no kesi nyu rhünnilo-o n nnyu nipe kerhün sidyü nyu shülo kela genyu.

⁴Tsügenyu Sunggigü le a-temi dan no gwenlo titse tsangge jochü keda pe nkhwen kebin gü nrin bin hünyo, lo tsüle renla lokeho, lo ndila lokeho, lo rhula lokeho hon danle.

⁵Hisiki tesha shü titse ndo sen kebin kenikelo hagun no hyulo titseo hagun ketenyen genyu Sunggigü le a-npvü a-kekvu nyu hagun ntsenlo laso.

⁶Tsügenyu hagun ntsoka a-gwünkho nme ka hagun semen pe konsin kontseryü thyüo kenjün thyü hüe hagun sherhün salo.

⁷Tsüle hagun ketenyen kegwa keshvu shalo nrün genyu. Hagun ketenyen le mah nyu kegwa keshvu shalo-e bo nshvula lokegwa suna nyeki a-min tsenkvu, tsüno binlo nrün genyu kegwa keshvu shwila mvulo shvu. Tsonlo yatselo Khrista le me yhühyu thyü gunkeryü nyü hagun le teshwe, zankechwi lo kerühvu hyulo ti.

⁸Hagun le himhundyü a-hyu mvu zun; ai a-so a-rüno hünyo; lo ntsoka-e a-hyu mvu zun, ai a-tenyen hünyo; tson-o hagun kekenyü lo hagun shekerhün le zolo bu keho thyü bin hünyo.

⁹Kechamvule hagun le tha nme genyu tenyen kehü gü tsü le kekhin nyü hagun kapu le kenikelo hyulo titse bin kela genyu.

¹⁰Shwikenjün Sunggigü le pe hagun tsü nrün gü rüla sidyükesha jo zope bin kenjü sidyükeshanyu dan ko kenikelo higü hi fü, lo fü tserü gunryü.

¹¹Anyugun nyun nyu kebin Khrista Kapu rüla nchwenyu Khrista le kenjün thyü nrün lo tsügenyu zankechwi thyü nrün gwünkho higü tsin-o nyu gwünkho ka lo dihontse tiyo tsekethyü fü gunryü.

¹²Sidyükesha tsüdan le anyugun npvü anyugun genyu mvule hagun genyu pe anyugun tesha shü, lo anyugun le zokeshü ketsin jo dan hagun le nyülo laso. Lilonyu tsüdan le tsangge nikeshü Kenshün Kapu kekvu ketsin jo hidan pe hagun ka zoshü. Lo tsangge lokethyü nyu dan ko tha rüla hidan shanyü sa bin hünyo.

¹³Tsügenyu hagun nyun tsekho binlo, lo hagun nyun a-kho thyüo Jisu Khrista le me yhühyu thyü gunkeryü nyü hagun shwinjün shü nrün gü nrin bin lo.

¹⁴Hagun Sunggigü jo kezen nyenyu thyüo hagun le nduka tepen rüsi kehü dan sen-o hagun jvü yhun thyüni tinla nya.

¹⁵Tsonkethyü gü mvule hagun kokelo Sunggigü le nshün kethyü hontse hagun ko hagun jvü rüla aphu nshün binlo chi.

¹⁶Kechamvule ketsinlesü nyu hihontse thu pe bin njü nyo, “Ale nshün kethyü genyu hagun le nshünlo mvulo shvu.”

¹⁷Tson-o temi nme-e so kecha thyü mvuo temi ligühigüe chün thyü pe tsü kehü gü lope hagun pvü letse ko hü yatselo, kazü hinyu yhun kebin ka Sunggigü rühvu, lo nshvuho tse yhun lo nye.

¹⁸Kechamvule tenrenla lokegwa suna raka pe hagun pvübon nyu ka nyu kenye sen keryü kenrunkenryü dan ka hagun rhinhilo mvu tsekethyü hagun-e sha bin nyo.

¹⁹Tanyü nyu kenshün lo a-ge tetsin nme-e kendi hontse kethyü gü zi a-min ketsen gü lope hagun heilo laso.

²⁰Kazü thyükelo mhundyü kinyu Sunggigü le a-kejülo laso, ai hagun genyu kekhin gwün ki a-le ryü me yhühyu thyü shü.

²¹Hagun le a-genyu kesi nyu a-kesun kelo gü Sunggigü tenyenlo. lo a-zan kechwi thyü kelo hontse, hagun ketenyen lo hagun sidyü ko Sunggigü kipon bin laso.

²²Ketsin gü jo zen-o hagun thyü kenshünlo lo hagun pvüshen solo nrün genyu hagun nyun ketsin thyü pe khinyunyu solo.

²³Kechamvule hagun le nke ndila lokegwa gü ge mvule nke ndila lokeho tso gü Sunggigü jo gü genyu nnyu kenshün nilo, lo jo tsügü tsüle kerhün jo lo bin zin hünyo.

²⁴Ketsin lesü le zo hünyo, “Thyü min thyü kepvü temi hiwe tehen zonpenyü hontse, lo anyugun kezegwa-e nyekepun hontse le. Tehenzonpenyü dan le rügula, lo nyekepun dan le nrhila,

²⁵ai Npugü jo we kethonthen binzin hünyo.” Lo zope hagun hikeshü jo higü hile jolokegwa gü le.