Read Southern Rengma Naga 1 PITOR 2 Bible Online

1 PITOR 2 - Southern Rengma Naga bible

1 PITOR 2

¹Tsügenyu hagun serikemvu aphu, lo kenku, lo kenero kethyü, lo me shwi pe nyhü kethyü, lo me kenshwe jo kezo aphu khe küla chi.

²Lo hagun min, gungü kenikelo tilo nrün genyu nyuhonyu hontse kapu nyüzü keshün gü nnyü zinlo chi.

³Kechamvule ketsinlesü le kezo hontse, “Hagun le Npugü le me shwikenjün ntsin shwi kela genyu.”

⁴Hagun Npugü kerhün tso gü temi le a-khela-e Sunggigü le a-min ketsen gü letse kejülo kela gü ki gunryü re.

⁵Lo hagun ko peshü kenshün dan me thyülo nrün genyu kerhün tso dan me thyüo ketun keren pe Kapu ka nme thyülo chi; tson-o Jisu Khrista genyu Sunggigü no khilo kekü kershvu tho thyü shülo chi.

⁶Ketsinlesü nyu tsügü rüla thu pe bin kenjü le hihontse, “Hire, ale Sion ge a-qün ka keshü kejükelo a-min ketsen tso gü pe bin njü nyo; lo temi ligühigüe a-tenyen kelo gü le thame ka-e rünyunkemvu thyüla loho.”

⁷Tsügenyu hagun tenyen kelonyu dan mhundyü nyu we tsügü tsüle a-min ketsen tsin gü laso; ai tenyen kemvu nyu dan mhundyü nyu we: “Tso yhe pe ka thyü kehü nyu dan le khekela tso tsügü le a-qün nyu sen mvulo keshvu ketsin tso gü thyülo laso.”

⁸Lo ketsinlesü bin kecha nme nyu zoni kenjü le, “Tso higü ge temi no a-pha nsü ti, tson-o tso tsügü ge nyu anyugun no nto ti.” Kechamvule anyugun le jo gü tenyen kemvu genyu anyugun no tsühontse kethyü le Sunggigü kendo kela genyu.

⁹Ai hagun we kejülo kela senye dan me, peshükengun dan me, lo tsipwen kenshün dan me lo Sunggigü hon thyülo kela dan me laso; tsüle kechamvule kezün nyu hagun kope a-keben ndun kethyü nyu shülo kela Sunggigü tho zope mehilo nrün genyu.

¹⁰Nduka we hagun le Sunggigü temi kemvu, ai ntsoka we a-temi thyülo laso, nduka we hagun le Sunggigü shwikenjün sha hümvu, ai ntsoka we a-shwikenjün hyulo laso.

¹¹A kesonyu ju, ale hagun no kenjwen nyu lo tesin hontseo hagun thyümin kenyü dan nyu tsü hagun kekhenilo lotse hagun ka hishü bin nyo; tsüdan le kapugü zen-o teri thyü bin kehü genyu.

¹²Hagun le Sunggigü sha kemvu nyu mhundyü nyu yhun ntsen serilo, lo mele hagun le gwakemvu thyü kehünyu letse hagun nmu bin-e anyugun no hagun tho kegwa hyuo Sunggigü zan shwen kelo thyülo chi.

¹³Npugü genyu hagun temi so kekvu sen kebin nyu ligühigüe lo kekvu keda tsin kesen gü raja gü

¹⁴hensin-e gwakemvu thyü kehünyu tsülo tse lo thatho kegwa thyü kehünyu shwe lotseo nikeshü kedanyu dan jo-e zenlo.

¹⁵Kechamvule Sunggigü le hagun no thatho kegwa thyü pe thashakemvu kenrunkenryü kezo nyu jo gwünkemhen kela le a-kendo kethyü genyu.

¹⁶Thame nkekhin ndi kelanyu hontse yhun lo; tson-e hagun kekhin ndi kelagü tsüpe kemu gü henlo lanya, ai Sunggigü gonyu hontse yhunlo.

¹⁷Temi aphu rühvulo, tsagü sikezen nyu solo; Sunggigü nshvulo, lo raja güe rühvulo.

¹⁸Hagun me go kethyü nyu ju, hagun npunyu a-jvü kegwa nyu nti mvuo a-jvü gwakemvu nyue nshvu lo rühvulo.

¹⁹Hagun le Sunggigü kendo sha-o mele hagun no kenjün thyüzü kemvu nyu kenjün kethyü tsü nyhenlo yatselo Sunggigü le jochü pe hagun tsüti.

²⁰Kechamvule hagun le tha thyüzü kela genyu mele hagun vüo kenjün thyü yatselo teshwe le dikipon bin nla? Ai hagun le thyü kezü gü thyü bin-e mele hagun vüo nyhenlo yatselo tsügenyu we Sunggigü le jochü pe hagun tsüti.

²¹Hagun no hihontselo nrün genyu Sunggigü le hagun kolo; kechamvule Khrista ko hagun no a-hontselo nrün genyu hagun genyu kenjün thyüo hagun no tsü thenlo lotse tsin shü laso.

²²A-le kemu nme-e thümvu, lo a-mün nyu kenku jo nme nti-e nyülo shwimvu.

²³Mele a-swetsü bin-e a-le me jo keni mvu shü, a-le kenjün thyü kelo ka-e me ketsun kedün mvu, ai a-khipe jo ketsin nyu mejün kera kehü Sunggigü tenyen la.

²⁴Khrista le nno kemu denzin sila-o kentsen keseri denzin yhunlo nrün genyu, a-le san ge kemu dan khipe a-min ge shülo laso. Lo a-ge tejünshvu dan genyu hagun thyü ngwalo laso.

²⁵Hagun le tanyü hontse tson gwünzü hü-e ntsoka we hagun zen-o hagun kapu kekhwen gü lo kentsen gü ki niryü laso.