Read Southern Rengma Naga 1 PITOR 3 Bible Online

1 PITOR 3 - Southern Rengma Naga bible

1 PITOR 3

¹Tsühontse menunyu dan ko hagun nyepvünyu jo zenlo, tsonlo yatselo tsüdan peha le Sunggigü jo tenyen mvu hü yatse-e a-nunyu jvü genyu tenyenlo ti.

²Kechamvule tsüdan le hagun tho kenshün lo hagun le anyugun rühvu kehü hyu loti.

³Hagun kenthyü kenzen lo hagun shün shukepvü, nmvue hagun kontyü kelu, nmvue hagun phinya keben kenya, no tegwen kipon kezegwa gü thyüla nya.

⁴Tsonkethyü gü mvule hagun kethyü kenzen no ketekho kemvu, bwenye tsekethyü tenrenla lokeho nnyun ki kezegwa gü pe hagun nthyü nzenlo chi, tsügü tsüle Sunggigü mhundyü nyu a-min ketsen gü genyu.

⁵Kechamvule nduka ko tenunyu Sunggigü rüshvu kehünyu dan le tsühontse kethyü pe anyugun nthyü kezegwa pvü hü, lo anyugun le anyugun nyepvünyu jo zen-o yhun keryü genyu.

⁶Sara ko tsühontse nduka Abraham jo zen hü, tson-o a npugü tseo Abraham kohü, hagun ko nshvu mvu tse tha kegwa thyü hü yatselo hagun-e a-nyugi nyu dan so.

⁷Me nyepvünyu dan, hagun ko tsühontse tha rüchün-o hagun nunyu zen-o yhunlo chi. Hagun kehi ka tha nme-e no hagun tson kekhin thyü mvulo nrün genyu hagun nunyu le hagun nyeki a-kekvu kerhonyu letse kethyü shalo nye, ai jochü kerhün letse kethyü rüchünlo nye.

⁸Tsüselo hagun nyun me kengüo kerhüntsü hyulo nrün thyülo, kerüchün-e nme thyülo, tsagü sikezen gü hontse khinyu khinyu kesolo, tson-o bwen lo tsenyo kehilo.

⁹Mele hagun ge thagwakemvu thyü shüe gwakemvu thyü pe kethun ninya, mele hagun swetsüe me swetsü ninya, tson mvule jochü pe ketsülo, kechamvule Sunggigü le jochü pe hagun tsüti tseo hagun ko kelo genyu.

¹⁰Ketsinlesü le hihontse zohü nyo, “Temi ligühigüe rhün bin nyü, lo tsangkeben kegwa hyu kenyü nyu no, gwakemvu kipon a-yi ntsenlo, lo a-mün pe me kesa jo zo nya.

¹¹Lo a-no tha gwakemvu nyu ranilo-o thakegwa thyülo, a-no nyun kebwen gü fülo, lo tsügü hü gunlo.

¹²Kechamvule Npugü yhütyü le kentsen nyu nrizin bin hünyo, lo a-nyetin le tsünyu kehi nyü zin bin kehü genyu; ai Npugü mhun le tha gwakemvu thyü kehünyu shwipe a-kenyü mvu bin kehü genyu.”

¹³Lo hagun le thatho kegwa thyü nyü hü yatselo, segü le hagun ge gwakemvu thyü tila?

¹⁴Tson-e hagun le kentsen gü genyu mele hagun no kenjün thyü yatselo hagun le jochü kepvü tsin, tsügenyu we nshvu nya, lo hagun nyun nkhi nya.

¹⁵Hagun nyun ki Khrista rühvulo, lo a-no hagun Npugü thyülo, lo hagun nyun ki hagun sidyü kegwa nme le bin kela tsüle dihontse kethyü yo tse kethyü temi ligühigüe no hagun ka shünryü yatselo zope hishü nrün genyu ndo zin bin lo.

¹⁶Ketekho mvutse lo zozü kela nshvu hotse zope zen shülo. Hagun le Khrista sithen kehü hontse hagun jvü gwa-o yhun kehü hagun nkhin kehünyu dan no anyugun npvü anyugun rüchün pe kejolo nrün genyu hagun kerüchün nshünlo.

¹⁷Hagun le Sunggigü kendo then-o tha kegwa genyu kenjün thyü kelo le tha thyükezü gü nyeki gwakvu.

¹⁸Kechamvule Khrista ko hagun kemu genyu si shü, a-le nzen-o Sunggigü ki gunlo nrün genyu a-we ntsen, ai ngun ntsen kemvu nyu genyu sila; ai Kapu nyu a-thyü nrhünnilo laso.

¹⁹Lo a-kapu tsügü genyu a-le gungü ntsoka dothyü kebin kapu dan senthyü.

²⁰Kapu hidan hile nduka Noah gwünkho ka zü so phunlo kegwa gü cha kebin then Sunggigü le a-nyun thonsa bin-e a-jo zenmvu kela dan, zü so phunlo kegwa tsügü nyu temi kerho ki, min tetse nti kenikelo gwünzin la.

²¹Zü tsügü tsüle baptism kethyü gü zansü nme tsinshü, tsügü tsüle nthyümin ge kerhu sükelo gü kemvu, ai nyun kenshün kenjü, nyu Sunggigü ka njo hoshü kela gü genyu ntsoka hagun kenilo laso. Jisu Khrista rhünni keso gü nyu baptaiz thyü kelo nyu kenilo kehü gwünzin.

²²Khrista we gungü tsangge Sunggigü njüzin bin laso, tsangge kebin jolonyu aphu lo keda kekvu dan aphu a-hensin bin tin laso.