Read Southern Rengma Naga 1 PITOR 4 Bible Online

1 PITOR 4 - Southern Rengma Naga bible

1 PITOR 4

¹Khrista le thyümin denzin kenjün thyü kelo hontse, hagun ko tsühontse kethyü pe hagun nyun nyu shülo nye. Kechamvule temi ligühigüe a-thyümin nyu kenjün thyü kebin nyu le kemu thyü bin mvula hünyo.

²Ntsoka gerhonyu hagun kazü hinyu yhun sin gun kezhü ka temi kenyü yhüdyü dan thyü titse mvule Sunggigü kendo then-o yhun gunlo.

³Hagun le jon kethon ki Sunggigü shakemvu nyu dan le thyü nyü kehü tho dan thyü ryü laso; tson-o hagun le kejokemvu tho dan thyü min kenyü yhüdyü dan, kenzeü, nkhün zoni kethyü, logwa thyüo keho, lo kentsükenchen tero men zü shüo kershvu nyu hagun keyhun jon kethon nke laso.

⁴Lo ntsoka we hagun le anyugun zen-o anyugun hontse kevükeben mvu kela genyu hagun shwi pe anyugun dunthyüo hagun tsin hünyo.

⁵Ai anyugun le kesinyu-e lo kerhün nyue ketso titse ndo bin kelagü mhundyü nyu anyugun rüla henshwi küti.

⁶Lo tsühontse nduka jolokegwa gü zope si kelanyu dan ko senthyü shü, tson-o anyugun no thyümin kipon me hontse nmula, ai anyugun kapu denzin Sunggigü hontse yhunlo nrün genyu.

⁷Tson-e tha aphu a-keni thyüla nrün gwünkho nni bin laso. Tsügenyu hagun npvü hagun kekheni binlo, lo nnyun a-kho thyüo kehi thyü binlo.

⁸Lo tha aphu nyeki khinyu khinyu so binlo, kechamvule keso genyu kemu kechon henlo kehü genyu.

⁹Kenyokenyü mvutse khinyunyu nsinlo.

¹⁰Ligühigüe kenrun nyu Sunggigü ki hyukelo jochü gü sen-o jochü aphu khishü kehü Sunggigü lotho kegwa nyu hontse khinyunyu lothyü binlo.

¹¹Ligühigüe jozo kehünyu no, tsünyu no Sunggigü jo zolo, ligühigüe lotho thyü kehünyu no Sunggigü le khikeshü kekvu gü sen-o thyülo, tson-o tha aphu nyu Jisu Khrista genyu Sunggigü shwenlo, zankechwi lo kekvu kethyü le kethonthen a-hon le. Amen.

¹²A kesonyu dan, hagun kegwa keshvu sha nrün genyu hagun semen-o kenjün thyü kebin, lo himhundyü ki hagun le sha hü kemvu teno bin yatselo tsügenyu hagun dunthyü nya.

¹³Tsonkethyü gü mvule hagun le Khrista zen-o kenjün kethyü gü kerhün bin tsekethyü rüchün pe hagun sherhünlo, tsonlo yatselo a-le zankechwi thyüo me yhühyu thyü keryü nyü hagun ko hagun kenyü loti.

¹⁴Hagun le Khrista sithen kehü genyu tetsin pvülo yatselo hagun le hagun phou kengvü nyu, kechamvule tsüle a-kon le zankechwi kethyü Sunggigü Kapugü le hagun zen bin kelasi genyu.

¹⁵Lo hagun temi nme-e me dushvu, nmvue me hon rühu nmvue tha gwakemvu kethyü lo me hon nkhen-o tsügenyu we kenjün kethyü thyülo nya.

¹⁶Ai hagun temi nme le khristian thyü kelo genyu kenjün kethyü hyulo yatselo a-no tsügenyu kejo nya, ai zan tsügü pvü kelo genyu Sunggigü shwenlo.

¹⁷Sunggigü le me ketso nrün gwünkho gü le ryü laso, lo a-npvü a-temi dan ketso teri ti; ngun a-temi dan ketso teri so ti yatselo hisiki Sunggigü jolokegwa gü tenyen mvu kela dan we dihontse tiyo no?

¹⁸Ketsinlesü le hihontse zo hünyo, “Kentsen nyu-e kenikelo hyu tsensa tse hyulo yatselo; Sunggigü tenyen hü kemvu nyu lo kemunyu dan we dihontse mon?”

¹⁹Tsügenyu Sunggigü kendo then-o kenjün thyü kehü dan no thatho kegwa thyüo a-keyhun hope tha aphu nyhun keshü gü, joketsin kezo gü ben nyu shüla chi.