Read Southern Rengma Naga 1 PITOR 5 Bible Online

1 PITOR 5 - Southern Rengma Naga bible

1 PITOR 5

¹Ako kehun nyu peshünyu nme lo Khrista kenjün kethyü rüla jünzo kehünyu, lo a-le hisiki zankechwi thyü keryü ka ajün le kebin nyu nme. Tsügenyu ale kehun nyu peshünyu ju thu keyhun shü bin nyo.

²Hagun dan nyu kebin Sunggigü tanyü dan leyilo, lo thyünyü mvu kela thyü mvule Sunggigü jo zen-o thyü nyüsa tse thyülo. Lo hagun chün jon ketepen genyu mvule Npugü lothyü nyüo thyülo.

³Khipe hagun tenyen keshü temi dan so kvulo titseo thyü nya, ai tsüdan mhundyü nyu tsinhi kegwa thyülo chi.

⁴Tsonlo yatselo tanyü kekhwe kedagü le me yhühyu thyü gunkeryü nyü hagun le zoshwe zonye kethyü shvula lokeho raja perün hyulo ti.

⁵Tsühontse hagun selo dan ko peshünyu dan jo zenlo. Lo hagun aphu ketekho kemvu khiben lo-o khinyunyu lothyü lo nye; kechamvule ketsinlesü le hihontse zo hünyo, “Sunggigü le ketekho kehünyu kendyü thyü hünyo, ai shwikenjün khipe tsenyo kehünyu tsü kehü genyu.”

⁶Tsügenyu Sunggigü no gwünkho toka hagun thyü n gon shü nrün genyu hagun bwen lo tsenyo-o a-benkekvu gü hensin binlo nye.

⁷Hagun nyun le keho aphu keli pe a-tenyen la nye, kechamvule a-le hagun phin rüchün bin kehü genyu.

⁸Hagun nyun a-kho thyü binlo, lo khwen binlo, kechamvule hagun shwikerüchün gü satan le hagun ligühigüe tüntyülo kegwa gü tüntyü titseo shünyho kenho hontse nho sen-o fü nsin nshye kehü genyu.

⁹Tsügenyu hagun ko hagun ketenyen nko-o nren binlo, kazü aphu nyu kebin hagun pvünyu dan-e hagun hontse kenjün thyü kü bin kehü hagun-e shabin nyo.

¹⁰Ai hagun le a-gwünkho keshanyu nme ka kenjün thyü kelo we a-genyu shwikenjün aphu chwiryü kehü Khrista nyu hagun kope kethonthen kerhün nyu shülo kela gü Sunggigü le a-npvü hagun thyü ngwa penshü, lo hagun thyü nko lo thyü nkvu shü ti.

¹¹A-no kethonthen kvu kelo gü thyülo. Amen.

¹²Ale lesü higü thu nzü pe tenyenlo kekü asikezen gü Silvana no sen gunryüo hagun tsüshü lo tse shüle. Higü hile Sunggigü shwikenjün tsin gü letse kethyü khipe hagun thukeyhun-o zoshwi shü hin nyo. Tsünyu tsekho binlo.

¹³Hagun sin-o kejülo kela Babilon nyu kebin tenugi lo anyugü Mark ko tse hagun kelushü le nye.

¹⁴Khristian nyu le keso nyu kenbo kehü jvü gü pe hagun khinyunyu kelushü le nye. Nyun kebwen gü no Khrista hon thyülo kelanyu aphu zen bin kelo gü thyülo.