Read Southern Rengma Naga 2 PITOR 1 Bible Online

2 PITOR 1 - Southern Rengma Naga bible

2 PITOR 1

¹Jisu Khrista gogü, apostel Simon Pitor le khipe Sunggigü lo n kenikelo gü Jisu Khrista kentsen kegwa genyu ahontse ketenyen a-min ketsen tsin hyulo kela dan ka shüshü le.

²Hagun Sunggigü lo n Npugü rüla shwikenjün lo nyun kebwen gü no hagun ge bin sa kelogü thyülo.

³Lo a-npvü a-zankechwi lo a-kegwa gü nyu nko kelo rüla sha kelo genyu a-kekvu nyu nno yhun ntsen serilo lotse ngenyu mvulo keshvu shaseni pe ntsü shü laso.

⁴Tsühontse nno a-le zope bin kenjü gü tsü hyulo-o kazü hinyu nkenyü yhüdyü nkela nrün gü nrhilo nrün genyu a-le tha a-min ketsen tsin lo tha keda zope bin kenjü dan khipe ntsü shü laso; hagun no Sunggigü jvü senlo nrün genyu.

⁵Kechamvule hihontselo nrün genyu hagun yhenthyüo hagun jvü kegwa pe hagun ketenyen sinlo; lo thakesha pe hagun jvü kegwa sinlo.

⁶Lo hagun kekheni kethyü pe hagun thakesha sinlo; lo nyhenhi kethyü pe hagun kekheni kethyü sinlo; lo ketsin kerüchün pe nyhenhi kethyü sinlo.

⁷Lo tsagü sikezen gü keshwi kenjün kethyü pe ketsin kerüchün sinlo; lo keso pe tsagü sikezen gü keshwi kenjün kethyü sinlo.

⁸Hagun le tha hidan hi sen mvulo shvu bin nyo, tha hidan sen zinlo yatselo tsüdan genyu n Npugü Jisu Khrista rüla thakesha denzin hagun shese nmvu-e hagun sha nshalo mvula loho.

⁹Ai temi ligühigüe tha tsüdan kendinyu le a-khoka kebin dan nti hyuo a-yhütyü po bin hünyo; lo nduka bin kehü tha kezü kemvu dan tsü süla so tsekethyü nmhinla hünyo.

¹⁰Tsügenyu apvünyu dan, Sunggigü le hagun kokelo, lo hagun kejükelo sha tsentsülo nrün genyu hagun yhenthyü sinlo; tsonlo yatselo hagun le thame ka-e chela loho.

¹¹Hihontselo yatselo n Npugü lo n kenikelo gü Jisu Khrista kethonthen keda nyu hagun no yülo kegwa kekvu pe hagun tsü sa shüti.

¹²Tsügenyu hagun le hyulo kela ketsin gü nyu hagun yhenthyü bin hüe ale hagun no jo tsüdan rüchün binlo nrün genyu hagun ka zoni zin bin hü nyo.

¹³Lo ale phika hinyu kebin then, hagun thukeyhun shüo hagun no tha higü hi rüchünlo lotse lo gwati tsekethyü rüchün bin nyo.

¹⁴Kechamvule Npugü Jisu Khrista le a-npvü tsin pe ahi keshü hontse ale thonsa mvu tse phika higü khela tiso, tsekethyü sha bin kelasi genyu.

¹⁵Ale sikela siki hagun no lihi gwünkho ka-e hi rüchün nilo lotse nrün genyu ale ayhenthyü ti.

¹⁶Lo ale Npugü Jisu Khrista kekvu lo a-le nigunryü nrün rüla zope hi kethyü ka a npvü akendo kerüchün nyu rhikelo rüla zomvu, ai ayhütyü pe hyu kethyü rüla zo bin nyo.

¹⁷A-le nduka kekvu tsin gü kanyu, “Higü hile Anyu A sogü, Ale a-shwi pe Akenyü sa kehü gü le,” tsonkethyü zo tsükeryü ka agun ko tsüka bin le, a-le tsüka Pvügü, Sunggigü kanyu zankechwi lo teshwen hyulo laso.

¹⁸Lo agun le a-zen-o kazüthun kenshün ge kebin ka thakhwe higü hile tsangge tsükeryü agun ko nyülo le

¹⁹Tsügenyu ngun we sidyükesha jo nyeki-e sha tsentsü kethyü le bin laso. Tsangben chwiryü lo lonyü shyepvü gü le hagun nyun nyu chwiryü kemvuthen mah nben pe kezün nyu gwün nben kehü hontse hagun le jo tsügü rüchün ton binlo yatselo gwati.

²⁰Ketsinlesü nyu sidyükesha jo nme-e temi le a-npvü a-kendo ka a-kon zokholo nrün ndi tsekethyü jo higü sha terilo mvulo shvu.

²¹Kechamvule temi kendo nyu sidyükesha jo nme-e zo chwiryü shwimvu, ai Kenshün Kapugü le temi thu keyhun shüo temi no Sunggigü kanyu zo chwiryü kethyü genyu.