Read Southern Rengma Naga 2 PITOR 2 Bible Online

2 PITOR 2 - Southern Rengma Naga bible

2 PITOR 2

¹Nduka temi dan nyu kenku sidyükesha le soryü kethyü hontse hagun dan nyu ko kenku senkethyü le soryü ti, tsüdan le me thyü kenshvu sen ryü ti, lo kenku senkethyü sen gunryü ti; tson-o anyugun kenikelo gü Npugü zan-e shamvu letse lati; tson-o kenke nsü pe anyugun npvü anyugun ge shü whütselo ti.

²Lo temi kechon le anyugun ntsen serikemvu tsongü then ti, tsügenyu meno ketsin tsongü zo nshvula ti.

³Tson-o tha ketepen genyu kenku senkethyü dan hile anyugun npvü anyugun kendo kerüchün nyu rhikelo rüla pe hagun ka zo-o anyugun kechwi fü ti, anyugun nmu nrün himhundyü kinyu ndo sen bin laso, lo anyugun nkela nrün gü le zhü tinla mvu.

⁴Lo nduka tsangge jolonyu dan me le mu kela ka Sunggigü le tsüdan so mvu tse tsüdan shwe pe kenjün kethyü bin nyu shüla, lo anyugun no bin-o ketso nrün jon gü ti titseo anyugun phin pe kezün nyu shü laso.

⁵Lo a-le nduka zü lope serikemvu kazü gü kemi gun kethyü ka kentsen keseri rüla zope me senthyü kehü gü Noah lo kechanyu mi tsenyü kenikelo nyeki nduka kazü tsügü tepen mvula.

⁶Lo nduka ko Sunggigü le Sodom lo Gomora rünyi nyida hvu nmuo tsühvu rope jonbü thyüla, tson-o hisiki serikemvu nyu dan le dihontse la tiyo tsekethyü tsinhi nme thyü pe bin laso.

⁷Ai temi serikemvu dan jvü rüla genyu anyu kenjün thyü kehü temi kentsen keseri gü Lot kenilo.

⁸Kechamvule temi kegwa, kentsen keseri tsügü le anyugun dan nyu yhun-o khenyütsen nyü anyugun tho anyugun jvü gwakemvu dan hyu pe a-nyun kenjün thyü sa hü.

⁹Tsühontse Npugü le kesemen nyu-e kentsen nyu kenikelo tedo, lo shaja pe ntsen serikemvu nyu tsüo anyugun no bin-o jokera nrün tsangkeben jon gü ti kelo tedo-e sha bin nyo.

¹⁰Ai thyümin kendo zen-o yhun nshün kemvu nyu, lo Sunggigü hensin bin ntsü kehünyu ge shaja le gunryü chon hünyo Tsüdan le nshvu mvu tse a-npvü a-kendo thyüo anyugun so gon kebin zankechwi thyü kebin dan zo nshvu bin hünyo.

¹¹Tson-e tsangge jolonyu anyugun nyeki gonkvu lo kvu kvu kethyü dan-e Npugü mhundyü nyu anyugun rüchün nshvuo anyugun zo nshvu hünyo.

¹²Ai temi hidan hi we tehen thyü hontse nnyulo lo tenlo-o dushvula kehü hontse nyu thyü bin yo sha hümvu, anyugun le a-kon sha kemvu dan-e shwinyü bin hünyo. Tehenthyü hontse anyugun bo nshvu lati.

¹³Anyugun genyu meno kenjün thyülo kehü hontse anyugun chün anyugun no kenjün thyü ti. Anyugun le nhennyu serikemvu kethyü le anyugun kenyü hünyo. Anyugun kenyü yhüdyü thyü tseo hagun dan nyu ho kebin ka kejo lo kemüni.

¹⁴Temi tsüdan yhütyü le keyüla le süpvü bin hünyo, lo anyugun le kemu tho kethyü khenyü hü mvu, anyugun le temi a-nyun nko kemvunyu nsü nshvula hünyo, anyugun le tha ketepen pe anyugun jvü thyü laso. Anyugun le Sunggigü nyunkekhü hensin bin laso.

¹⁵Anyugun le tson kenzhü gü khelao nmhon tin laso. Anyugun le Beor nyugü, Balam, thagwakemvu chün lonyü kehü gü tson then tin laso.

¹⁶Ai a-kemu genyu a-rhoshü, kechamvule jo zolo hü kemvu gada no temi khwe thyüo sidyükesha tsügü keshyelu tha nkhin shü.

¹⁷Temi hidan hile zülvu kesin hontse, lo tsangkenbu terhi le whün sen kehü nmha hontse, Sunggigü le kezün kentsun nyu anyugun bin ndo pe anyugun nrin bin nyo.

¹⁸LO anyugun le ketekho jo lo kenrun keryü jo zo nyenbün nyenrün-o thyümin kenyü yhüdyü thyü yhun-o anyugun serikemvu pe temi serimvuo yhun kehü dan nrhi tinla titse kebin nyu nsü nshvu hünyo.

¹⁹Anyugun le dothyü kebin nyu hoshüla titse zohü, ai anyugun npvü serikemvu dothyü bin hünyo; kechamvule tha lihi-e temi nyeki kvulo la yatselo, temi gü le tsügü dothyü tinla kehü genyu.

²⁰Kechamvule anyugun le ngun Npugü lo nkenikelo gü Jisu Khrista rüla sha kelo genyu nthyü nrhula kehü dan nrhikelo nyu le ni yügü tsüdan no a-nsülo-o a-nyeki kvulo la yatselo temi tsünyu rüla le kekhin ki le kerika nyeki shvu kvula hünyo.

²¹Kenshün johokeshü khipe anyugun tsü kela sha bin-o rani kela nyeki, kentsen tsongü shamvu shü kethyü we gwakvu.

²²Anyugun rüla le thakesha jo nyu thu kenjü le, “Tehi le a-nyun keso shüo a-npvü rani gü tyü kehü, lo tebo le sükenshün shüe ranigü nnyon kemben nyu nfüni la hü,” tse zokehü tsen tsüle.