Read Southern Rengma Naga 2 PITOR 3 Bible Online

2 PITOR 3 - Southern Rengma Naga bible

2 PITOR 3

¹Akeso ju, higü hile ale lesü thu pe hagun ki keshü kenyhun gü le, lo kenyhun nren ale hagun no hagun si rüchün nilo lotse hagun nyun kenshün gü tsü thu keyhun nini shü bin nle.

²Tsügütsü le hagun no kenshün sidyükesha dan le zope bin kenjü jo dan, lo hagun apostel ju no Npugü lo kenikelo gü ka nyu johokeshü dan rüchünlo lotse kethyü genyu.

³Keri tsingü le hagun le higü hi shalo mvulo shvu, kekhin gwünki tha shwinyü kehü dan me le me shwinyü gunryü ti, lo anyugun le anyugun kenyü yhüdyü thyü yhun-o;

⁴“A-le gunryü titse kethyü rüla dikipon zo njü nla? N pvünyu ju le sila so, lo tha aphu kazü thyülo nyeka gunryüo nthu keti a-keme bin gwünzin,” tson soti.

⁵Anyugun le anyugun shwenron thyüo ketsin higü hi shamvu lati, tsüle Sunggigü jo nyu tsang lo kazü le nduka nyu bin hü laso, lo kazü le zü nyu lo zü sen-o thyülo.

⁶Lo kazü keri gü tsü zü no kemihen la-o tsügü tsü nke la.

⁷Ai jo tsügü genyu ntsoka kebin tsang lo kazü hi we khipe mah khwe kebin gwünzin laso, ketsin kemvu ju ketso nrün, lo nkela nrün tsangkeben jon gü genyu ntsen sen kebin nti so.

⁸Ai kesonyu ju, Npugü mhundyü nyu we khenyü me-e chen yie nme lo chen yie nme-e khenyü me hontse letse kethyü jo higü hi nmhinla nya.

⁹Peha nyu kerüchün we ntsüla sele tse rüchün kehü hontse Npugü le gunryü titse zope bin kenjü jo gü thyüpen ntsüla loho; ai temi nme-e no nke kela a-kendo mvule aphu no a-nyun kelulo kenyü genyu a-le hagun ge a-nyun thon sa bin nyo.

¹⁰Ai Npugü gunkeryü jon we kerühunyu le gunkeryü hontse ti, tsünyü tsang dan le a-khwen ketetsin thyüo ndila ti, lo tha pe tsüdan kethyü dan ko nyenrikela genyu zunla ti, tson-o kazü lo tsü ge kebin dan aphu ro kemhen lati.

¹¹Lo tha hidan hi aphu tsühontse nke lo ndi gü zhü kelasi genyu yhun nshün lo seri pe temi dihontse kethyü thyülo zü yo.

¹²Tson-o Sunggigü keryü jon gü khwenlo, lo nyhen thyüo tsü no nmhe gunryülo, tsünyü tsang dan rola ti, lo nkela ti, lo nyenri kela genyu tha pe tsüdan kethyü dan-e zun lati.

¹³Ai ngun we a-le zope bin kenjü jo genyu tsang keshün lo kazü keshün, ketsen nyu nti bin kehü tsü khwen kehü nti so.

¹⁴Tsügenyu akeso nyu ju, hagun le tha hidan hi khwen kebin hontse, hagun yhen thyüo rhu mvu, nmvue meno nmu mvu, lo kengü gwa bin-o a-no hyulo lo.

¹⁵Lo Npugü le a-nyun thon kebin hile hagun kenilo nrün genyu letse kethyü rüchünlo chi. Tsühontse keso ngun sikezen gü Paul ko thakesha khipe a-ketsü hontse thu pe hagun tsüshü laso.

¹⁶A-le tha higü rüla zo kethyü a-lesü aphu nyu hihontse zo hünyo. Tsüdan nyu tha shalo kerü peha le bin nyo, lo thasha kemvu matse binlo hü kemvu temi dan le anyugun le ketsinlesü kecha dan-e pe thyü kehü hontse a-kon zo zü pe anyugun npvü anyugun kenke thyülo hünyo.

¹⁷Tsügenyu hagun akeso nyu ju, nchwe kinyu hi sha binlo, serikemvu nyu jo ketsin kemvu no hagun sa zen-o ntsoka hagun le tsekho tse kebin gü nyu tinla mvu nrün genyu.

¹⁸Ai hagun Npugü lo kenikelo gü Jisu Khrista shwikenjün lo thakeshanyu min kenyelo. A-no ntsoka-e lo kethonthen-e zankechwi gü thyülo! Amen.