Read Southern Rengma Naga 1 JOHAN 2 Bible Online

1 JOHAN 2 - Southern Rengma Naga bible

1 JOHAN 2

¹Anyenyu ju, hagun no mu mvulo nrün genyu ale hi thu pe hagun ki shü bin nyo; ai peha le mula hü yatselo nnokepen kentsen gü Jisu Khrista le bin nyo.

²A-le nkemu rothyü kela gü; lo ngun ntimvule kazü aphu genyu-e sin.

³Lo nle a-le johokeshü dan zen hüya tselo nle a-sha bin nyo tse kethyü sha tsentsü logwa.

⁴Temi segü le, “Ale a-sha hünyo,” tsezo hüo a-le johokeshü dan zen hümvu yo a-le kenku nyu, lo ketsin gü le a-ge ndi.

⁵Ai temi lihigüe a-jo zen hüya tselo, Sunggigü keso güle a-thyü pe gwapen laso. Hige hi nle a-nyu bin tse kethyü shalo hünyo.

⁶Temi segü le a-le Khrista nyu bin hü nle tse zo hüyo tsünyu ko a-hontse lo hüzü.

⁷A kesonyu ju, ale hagun ka johokeshü keshün mvule hagun le sokeri kanyu sen hükela johokeshü whe gü thu shü bin nyo. Johokeshü whe gü tsüle hagun le nyülo kela jo gü tsü.

⁸Tson ai ale johokeshü keshün nme thu pe hagun ka shü bin nyo, tsügü tsüle a-nyu-e lo hagun nyun nyu-e ketsin le; kechamvule kezün gü le tinjü laso lo keben ketsin gü le benbin kelasi genyu.

⁹Temi lihigüe keben günyu bin hü nle tseo a-tsasikezen nyu shwintsü kehü nyu le ntso-e kezün nyu bin hüzun.

¹⁰Temi segü le a-tsagü sikezen nyu so hüyo tsügü le keben nyu bin hünyo lo a-nyun nyu phansü kethyü kon ndi.

¹¹Ai temi segü le a-tsagü sikezen nyu shwintsü hüyo tsügü le kezün nyu bin hünyo lo kezün nyu tsonchü hünyo, lo kezün güle a-yhütyü thyüpo kela genyu a-le dikipon gü zhü yo tsü sha hümvu.

¹²A nyenyu ju, a-zan nyu hagun kemu dan jü pe hagun tsü kela genyu ale thu pe hagun tsü shü bin nyo.

¹³Me pvünyu ju, hagun le sokeri kanyu kehü gü sha kela genyu ale thu pe hagun kashü bin nyo. Selo ju, hagun le gwa kemvu gü nyekvu lo kela genyu ale thu pe hagun kashü bin nyo.

¹⁴Ntsenyu ju, hagun le Pvügü shalo kela genyu ale thu pe hagun kashü bin nyo. Me pvünyu ju, hagun le sokeri kanyu kehü gü shalo kela genyu ale thu pe hagun kashü bin nyo. Selo ju, hagun le nko lo Sunggigü jo le hagun nyun ka bin hünyo, lo hagun le gwakemvu gü nyekvulo kela genyu ale thu pe hagun kashü bin nyo.

¹⁵Kazü gü lo kazü nyu kebin hon dan so nyalo. Temi lihigüe kazü gü sohü yatselo, Pvügü keso le a-ge ndi.

¹⁶Kechamvule kazü nyu kebin hon aphu thyümin kenyü dan, nyhüdyü dan, lo yhun ketekho kethyü, tsüle Pvügü kanyu mvu ai kazü gü nyu chwikeryü genyu.

¹⁷Kazü gü lo tsünyu kenyü yhüdyü dan le ndi güzhü laso, ai Sunggigü kendo thyü kehü gü le kethonthen bin hünyo.

¹⁸A nyenyu ju, tegi kevüja kekhin gü tsüle ryü bin laso; lo Khrista kenrhi gü le ryü titse kethyü hagun le nyülo kela hontse ntsoka-e Khrista zen kenrhi kehü kechon le soryü bin laso; tsügenyu nle hile tegi kevüja kekhin gü laso tse kethyü shalo hünyo.

¹⁹Anyugun le ngun dan nyu chwila, ai anyugun le nlogwa kemvu. Kechamule anyugun le nlogwa yatselo ngun kengü bin nrün; ai anyugun le n logwa mvu tse kethyü meno shalo nrün genyu chwi laso.

²⁰Ai hagun we kenshün gü nyu yülo laso, lo hagun aphu thasha bin nyo.

²¹Hagun le ketsin gü shamvu letseo ale thu pe hagun tsü shümvu; ai hagun le tsüsha kethyü genyu, lo kenku nme-e ketsin günyu bin mvu.

²²Tsonlo kenku gü le segü la? Tsüle Jisu le Khrista gü le tse zoshwihü kemvu gü. Temi tsügü le Khrista kenrhi gü, a-le Pvügü ko lo nyugü ko kenila hü.

²³Temi lihigüe nyugü kenikela gü le Pvügü ko kenila hü; lo lihigüe nyugü zenlo kehü gü le Pvügüe zenlo kehü genyu.

²⁴Hagun le sokerika nyu nyülo yo tsüno hagun nyun nyu binlo. Hagun le sokerika nyu nyülo yo tsüno hagun nyunka binlo yatselo, hagun le Nyugü lo Pvügü nyu bin loti.

²⁵Lo a-le zope ntsü kenjü higü hile kethonthen kerhün.

²⁶Hagun sala tiya kehü ju rüla ale jo hidan thu pe hagun tsü shüle.

²⁷Ai hagun le a-kanyu yükelo hyulo kela gü le hagun nyun nyubin hünyo, lo hagun le temi nme no hagun senthyü mvu-e gwa; hagun nyun nyu yülo kela gü le tha seni zope hagun senthyü hünyo, lo tsüle ketsin lo nku bin mvu, tsügenyu tsüle hagun senthyü keshü hontse a-nyu bin lo.

²⁸Lo anyenyu ju, a-nyu binlo tson yatselo a-le me yhühyu thyü tsü keryü ka peche loti lo a-mhundyü nyu keja-o ranila loho.

²⁹A-le ntsen tse kethyü hagun le shahü yatselo lihigüe kentsen tho thyü kehü nyu le a-ge nnyu lo laso tse kethyü sha tsentsü loti.