Read Southern Rengma Naga 1 JOHAN 3 Bible Online

1 JOHAN 3 - Southern Rengma Naga bible

1 JOHAN 3

¹Hire, Sunggigü nyenyu letse kolokela, Pvügü le keso dihontse kethyü khipe ntsü shüla seyo no; lo nne tsühontse laso. Higenyu kazü gü le ngun shamvu hünyo, kechamvule a-sha kemvu genyu.

²A kesonyu ju, ntsoka we nne Sunggigü nyenyu laso, lo hisiki nle dihontse latiyo hyu mvuzun, ai a-le me yhühyu thyü ryülo nko a-hontse lati, kechamvule a-le dihontse yo nle hyu nrün genyu.

³Lo lihigüe a-ge sidyü higü hile kebin gü a-le nshün kethyü hontse tsügü ko a-thyü kenshün bin hünyo.

⁴Temi lihigüe kemu thyü kehü nyu le tejvü gü gwünrho bin nyo, kechamvule kemu le tejvü gü gwünrho kethyü genyu.

⁵Lo kemu dan khisen tinla titseo a-le me yhühyu thyü ryü tse kethyü hagun ko sha bin ti; lo a-ge kemu nme ndi.

⁶Temi lihigüe a-ge kebin nyu le kemu thyü hümvu; temi ligü higüe kemu thyü kehü güle a-hyu-e mvu, nmvue a-sha-e mvu.

⁷A nyenyu ju, temi nme no hagun sala nya. Temi lihigüe kentsen tho thyü kehü nyu le a-le ntsen kethyü hontse tsünyu ko ntsen le.

⁸Temi lihigüe kemu tho thyü kehü nyu le tero serikemvu gü kanyu le; kechamvule tero serikemvu gü le a-kerika nyu mu kela genyu. Sunggigü nyugü le me yhühyu thyü keryü le tero serikemvu gü tho dan nkela titse ryü.

⁹Temi lihigüe Sunggigü kanyu nnyu lo kela gü le, a-tsi le a-ge bin kela genyu kemu thyü hümvu; lo a-le Sunggigü ge nnyulo kela genyu a-le mulo nrün ndi.

¹⁰Hige hi Sunggigü nyenyu ju lo tero serikemvu gü nyenyu ju tse shakekho lohü. Temi lihigü a-tsasikezen nyu so hü kemvu lo ketsin gü thyü hü kemvu gü le Sunggigü kanyu mvu.

¹¹Lo ngun no khinyunyu keso lo lotse hagun le sokerika nyu nyülo kela jo gü le tsügü tsü.

¹²Lo Kain le gwakemvu gü kipon bin-o a-sikezen gü dushvu kela hontse nya. Nyu genyu a-le a-sikezen gü dushvu la ola? Kechamvule a-thodan le gwamvu lo a-sikezen gü tho danle njü kela genyu.

¹³A pvünyu ju, kazü gü le hagun ntsü ai hagun dunthyü nya.

¹⁴Nle ntsagü sikezen nyu ju so kehü genyu nle kesi nken-o kerhün nyu chwi laso tse kethyü shabin nyo. Temi lihigüe me so hü kemvu nyu le kesi nyu bin zun.

¹⁵Temi lihigüe a-tsasikezen nyu ntsü kehü gü le medu keshvu nyu. Lo kethonthen kerhün le medukeshvu nyu ge bin hümvu tse kethyü hagun le sha bin nyo.

¹⁶A-le a-phou lope nphou sunthyü kela genyu, nle hinyu hi keso le nyuyo shalo hünyo; lo nko n tsasikezen nyu genyu nphou hoshü lozü le.

¹⁷Ai temi lihigüe kazü nyu kenya le bin-o a-tsasikezen nyu rhokedyü hyu shü ai a-nyun nyu meshwi njün chwi keryü gü khinla yatselo, dihontse Sunggigü keso le a-ge bin lo tila?

¹⁸A nyenyu ju, ngun nmün njo mvule ntho nyu lo ketsin nyu meso lo tinu.

¹⁹Hige hi nle ketsin gü hon tse kethyü sha loti, lo a-mhundyünyu nnyu le bwenye loti.

²⁰Keshanyu laka nnyun le n nmu hü yatselo, Sunggigü le nnyun nye gonkvu lo a-le tha aphu sha bin nyo.

²¹A kesonyu ju, nnyun le n nmu mvu yatselo, nle Sunggigü mhundyü nyu nkepeche le bin nyo.

²²Lo nle a-johokeshü dan zen kehü lo a-kenyü kon thyü kehü genyu nle tha lihi hie hyulo hünyo.

²³Lo a-le jo hope nketsü hontse nno a-nyugü Jisu Khrista zan nyu tenyenlo lo khinyunyu solo lo tse keshü hile a-johokeshü güle.

²⁴Temi lihigüe a-johokeshü dan zen kehü güle a-ge bin hünyo, lo a-ko tsügü ge bin hünyo. Lo a-le nnyu bin tse kethyü a-le khipe nketsü kapu gü genyu nle tsü shalo hünyo.