Read Southern Rengma Naga 1 JOHAN 4 Bible Online

1 JOHAN 4 - Southern Rengma Naga bible

1 JOHAN 4

¹A kesonyu ju, hagun kapu lihie tenyen lanya ai kapu tsüdan le Sunggigü kanyu ryü le nmvuyo tse kethyü shwi petsü lochi; kechamvule kenku sidyükesha kechon le chwiryüo kazü nyu hü kelasi genyu.

²Hagun le hinyu hi Sunggigü kapu gü sha lonye. Kapu lihie Jisu Khrista le thyümin thyü pfü ryü letse kethyü zoshwi kehü dan tsüle Sunggigü kanyu ryü le.

³Lo kapu lihie Jisu zoshwi hü kemvu dan tsü le Sunggigü kanyu ryü mvule; higü hile Khrista zen kenrhi kehü gü kapu le, tsügü tsü le ryü titse kethyü hagun le nyülo laso, lo a-le ntsoka-e ryüo kazü nyu hü laso.

⁴Anyenyu ju, hagun we Sunggigü hon lo hagun le tsüdan nye kvulo laso; kechamvule hagun nyu bin kela güle kazü nyu kehü gü nyeki gonkvu kethyü genyu.

⁵Anyugun le kazü gü hon, tsügenyu kazü gü rüla zohü, lo kazü gü le anyugun khwenyü hünyo.

⁶Nle Sunggigü hon. Temi ligühigüe Sunggigü sha kehü nyu le njo nyü hünyo; lo Sunggigü hon kemvunyu ju le njo nyü hü mvu. Tsüge tsü nle ketsin kapu gü lo thyüzü kela kapu gü tse shakekho lo hünyo.

⁷A kesonyu ju, ngun khinyunyu solo tinu; kechamvule keso le Sunggigü kanyu chwiryü kethyü genyu, lo meso kehü nyu le Sunggigü kanyu nnyulo laso, lo Sunggigü sha hünyo.

⁸Meso hü kemvu gü le Sunggigü sha hümvu, kechamvule Sunggigü le keso genyu.

⁹N no a-genyu rhünlo titse Sunggigü le a-nyuchegü nipe kazü hinyu shü, hige hi Sunggigü keso pe ngun dan nyu mehishü laso.

¹⁰Keso le higü hile: nle Sunggigü so kethyü genyu mvu ai a-le nso kethyü genyu nkemu dan rothyü la titseo a-nyugü nishü.

¹¹A kesonyu ju, Sunggigü le nso pe hitsülaki thyülo, ngun ko khinyunyu solo züle.

¹²Temi nme thame ka-e Sunggigü hyu mvu; nle khinyu khinyu sohü yatselo, Sunggigü le nge bin hünyo lo a-keso gü le ngun ge bin penlo hünyo.

¹³Hige hi nle a-ge bin lo a-le nge bin tse kethyü shalo hünyo, kechamvule a-le a-kapu khipe ntsü shü kela genyu.

¹⁴Lo kazü gü kenikelo gü thyü titseo Pvügü le a-nyugü nikeshü awe hyu laso lo tsügü jünzo hünyo.

¹⁵Temi lihigüe Jisu le Sunggigü nyugü letse kethyü zoshwi kehü nyule Sunggigü le tsünyu nyu bin hünyo, lo tsügüe Sunggigü nyu bin hünyo.

¹⁶Tsügenyu Sunggigü le nso hü tse kethyü nle sha lo tenyen bin nyo. Sunggigü le keso, lo temi lihigüe keso günyu bin kehü nyu le Sunggigü nyu bin hü lo Sunggigü ko a-nyu bin hünyo.

¹⁷Ketso kethyü jon gü nyü nno peche lo nrün genyu keso gü le n nyu bin penlo hünyo; kechamvule a-hontse nko kazü higü nyu kebin genyu.

¹⁸Kesonyu kenshvu nme ndi, tsonkethyü gü mvule gwapen kethyü güle kenshvu hüla hünyo; kechamvule kenshvu le a-shaja le kebin genyu. Lo temi ligühigüe nshvu kehü gü le kesonyu penlo mvu zun.

¹⁹Nle a-so hünyo, a-kon le a-le nso teri keshü genyu.

²⁰Temi lihigüe, “Ale Sunggigü so hü nyo,” tse zo hüo a-tsagü sikezen nyu ntsü hü yatselo, temi tsügü tsü le kenku nyu le; kechamvule a-le hyu kebin a-tsasikezen nyu ai solo mvu yatselo a-le hyu kemvu Sunggigü solo nrün ndi.

²¹Lo temi lihigüe Sunggigü so kehü gü le a-tsasikezen nyu ai solo mvulo shvu, johokeshü higü hi nle a-kanyu hyulo le.