Read Southern Rengma Naga 1 JOHAN 5 Bible Online

1 JOHAN 5 - Southern Rengma Naga bible

1 JOHAN 5

¹Temi lihigüe Jisu le Khrista güle tse kethyü tenyen kehü güle Sunggigü nyu laso, lo temi lihigüe Pvügü so kehü nyu le Nyugü so hünyo.

²Nle Sunggigü so lo a-johokeshü dan thyüzen hü yatselo, tsüge tsü nle Sunggigü nyenyu ju sohü tse kethyü nle shalo hünyo.

³Lo nle Sunggigü so hü nle tse kethyü tsüle, nle a-johokeshü dan thyü zen kehü gü hile. Lo a-johokeshü le tsen mvu le.

⁴Lo tha lihie Sunggigü kanyu nnyu kelo gü le kazü gü nyekvu lo hünyo; lo kazü gü nye kvulo kela kvukelo gü hile n ketenyen.

⁵Segü le kazü gü nyeki kvulo gwa la? Jisu le Sunggigü nyugü le tse kethyü tenyen kehü gü nti le kvulo ti.

⁶Zü lo tezi sen keryü gü hile Jisu Khrista le, zü nti sen mvu ai zü lo tezi sen ryü. Lo kapu gü le shahu gü, a-kon le kapugü le ketsin gü genyu.

⁷Kemisha kenshen le bin nyo.

⁸Kapu gü, zü gü lo tezi gü lo kenshen hidan le kerhün nme.

⁹Nle temi le jün kezo ai lolo hü yatselo, Sunggigü le jün kezo gü we tsünyeki gonkvu; a-kon le Sunggigü le a-nyugü jünzo keshü gü rüla genyu.

¹⁰Temi lihigüe Sunggigü nyugü tenyen kehü nyu le jün kezo tsügü tsüle a-ge bin laso. Temi lihigü Sunggigü tenyen hü kemvu nyu le, Sunggigü lope kenku nyu thyü laso; a-kon le a-le Sunggigü a-nyugü rüla jünzo keshü gü tenyen mvu kela genyu.

¹¹Lo jün kezo tsügü tsü le Sunggigü le kethonthen kerhün khipe n-tsü lo kerhün higü hile a-nyugü ge bin nyo.

¹²Temi lihigüe nyugü hyulo kela nyu le kerhün le bin nyo; lo temi lihigü Sunggigü nyugü kendi nyu le kerhün ndi.

¹³Hagun Sunggigü nyugü zan nyu tenyen kehü dan le kethonthen kerhün le bin kela hagun no shalo nrün genyu ale higü hi thu pe hagun tsü shü le.

¹⁴Lo nle a-kendo nyu tha lihie hiya tselo a-le nkhwenyü shü ti tse kethyü nle a-ge nkepeche le bin laso.

¹⁵Lo nle tha lihi hi ai a-le nkhwenyü shühü tse kethyü shalo yatselo, nle a-ka hikeshü dan hyulo laso tse kethyü shalo la hünyo.

¹⁶Temi lihigüe a-tsasikezen nyu le kemu thyü kela hyu, ai tsüle sila kekü kemu mvu yatselo, nle Sunggigü ka hilo, tson yatselo Sunggigü le a-no rhün loti. Higü hile sila kekü kemu thyü kemvu dan genyu zo binnyo. aAi sila kekü kemu ko bin nyo; ale hagun no tsügenyu hilo tse zobin mvu.

¹⁷Gwakemvu kethyü tsü aphu kemu le; ai sila kekü kemu kemvu ko bin nyo.

¹⁸Temi lihigüe Sunggigü nyu nnyulo kela nyule mu hü mvu tse kethyü nle shabin nyo; ai Sunggigü le a-ntsenlo lahü nyo, tsügenyu gwakemvu gü le a-kesülo nrün ndi.

¹⁹Nle Sunggigü hon, lo kazü aphu gwakemvu gü hensin bin nyo tse kethyü nle sha bin nyo.

²⁰Lo Sunggigü Nyugü le ryüo nno ketsin gü shalo nrün genyu thakesha khipe ntsü laso tse kethyü nle sha logwa; lo nle ketsin gü, a-nyugü Jisu Khrista nyu bin laso. Higü hile Sunggigü ketsin gü lo kethonthen kerhün gü le.

²¹A nyenyu ju, hagun teromen kezü dan nrhilo nye.