Read Southern Rengma Naga KERATHÜ 1 Bible Online

KERATHÜ 1 - Southern Rengma Naga bible

KERATHÜ 1

¹Joshua kesi siki Israel nyu le Npugü ketsoshü, “Agun tsipwen digü no ri gü Kanan nyu whe tila?”

²Npugü le kenishü, “Juda tsipwen le ri güti. Ale anyugun no kazü gü ketsen lo nrün khishü bin nle.”

³Judah temi dan le Simeon temi dan ka zoshü, “Agun zen-o kazü pe agun ketsü ki gülo, lo ngun kengüo Kanan nyu zen kega lo. Tson yatselo agun ko hagun zen-o kazü pe hagun ketsü güki güti.” Tsügenyu Simeon

⁴lo Judah tsipwen dan le kengü terinyu gü. Npugü le Kanan nyu lo Periz nyu so kvukelo pe anyugun tsüshü, tson-o anyu le Bezek ka temi yie tseryü gala.

⁵Anyugun le tsüka Adonibezek hyulo-o zen kenren.

⁶A-le tinla, ai anyugun le a-hü gü ten lo-o a-ben zentsü hvu lo a-pha zentsü hvu duthüla.

⁷Adonibezek le zoshü, “A-benzentsü lo a-phazentsü duthü kela raja nyu hentsenyü le amiz hensin ki chvü kenrhi jün tyühü. Laryü ntsoka we Sunggigü le ale anyugun ge nyuthyü shüyo age thyüshü laso.” A-zen Jerusalem ki güo, a-le tsüki sila.

⁸Judah temi le Jerusalem whe-o tsü lolo la. Anyugun le temi dan dushvu la njüo nyida gü rola.

⁹Tsüsika anyugun le rincho ge, rincho pha ki, lo tesinzin kazükesin ki kebin Kanan nyu zen kega titse güla.

¹⁰Anyugun le Kiriath Arba tse ko kehü Hebron ka Kanan nyu nren titse gü. Tson-o tsünyu kebin Sheshai, Ahiman lo Talmai pfüphun dan so kvu lola.

¹¹Judah temi dan le tsünyu bin-o Kiriath Sepher tse ko kehü Debir nyida gü nren titse gü.

¹²Kaleb le zoshü, “Temi segü le Kiriath Sepher lolo tiyo anyugi Aksah no a-zen sunthyü ti,” tsonshü.

¹³Kaleb sikezen gü Kenaz nyu gü Othniel le nyida tsügü lolo la, tsügenyu Kaleb le anyugi Aksah no a-zen sunthyülo.

¹⁴Sunkethyü jon nyu Othniel le tsügi no a-pvü ka lobu nme hi lolo tse tenge shü. Tsügi le a-gada ge tsenryü laryü a-pvü le a-le nyu lonyü bin yo tse ketsoshü.

¹⁵Tsontsin tsügi le a-zokenishü, “Ale zübun peha lonyü bin nle. Nle pe a ketsü kazü gü le kazükesin ki genyu.” Tson-o Kaleb le zükenthün teso gü lo tesin güe tse pe a-tsüla.

¹⁶Kenite temi Mosa a-mi gü tsipwen dan le kvubin nyida gü Jeriko nyu Judah temi dan zen-o Judah kazü Arad tesinzin tehen yhun kemvu ki gü. Anyugun le tsüki Amalek nyu dan nyu bin lo.

¹⁷Judah temi le Simeon temi dan zen gü Zephath nyida nyu kebin Kanan nyu hüla. Anyugun le nyida tsügü swetsüo nkiela tson-o tsüpe Hormah tse thola.

¹⁸Npugü le Judah temi dan cheshüo anyugun le rincho dan gwen lola. Ai anyugun le Gaza, Ashkelon nmvue Ekron lo tsü kehun kazü dan lolo mvu. Ketejon ki kebin dan hile tegi pe kethyü terigari le kebin genyu Judah le anyugun hülo mvula.

²⁰Mosa le zokeshü hontse Hebron pe Kaleb tsüla, tson-o a-le Anak tsipwen pvüshen le tsünyu kebin dan hüla.

²¹Ai Benjamin tsipwen le Jerusalem nyu kebin Jebus nyu no nthu keti Benjamin temi zen-o tsünyu yhun bin nyo.

²²Efraim lo Manasseh tsipwen le tsü gwenkho ka Luz tse ko kehü Bethel nyida gü whe. Npugü le anyugun cheshü. Anyugun le me nipe no nyida gü rüzü gü

²⁴laryü temi nme le tin kejü hyulo-o a-ka, “Nyu hontse nyida günyu yülo tiyo tsinpe agun hishülo, lo agun le n nthyünnyü loho, tsonshü.

²⁵Tson-o a-le tsinpe anyugun hishü, tsüka Efraim lo Manasseh temi dan le nyida tsügü nyu temi aphu dushvula, ai temi tsügü lo a-kami nyu kheshü.

²⁶Temi tsügü le kenkhin ki gü Hitnyu kazü ki nyida nme thyülo-o tsüpe Luz tse kolo, nthu keti tson kohü.”

²⁷Manasseh kami le Bethshan, Taanak, Dor, Ibleam, Megiddo nyida hidan lo tsü kho rünyi dan ka temi hü mvula. Kanan nyu le tsünyu yhun hü.

²⁸Israel nyu le kvukenye soryü kelo ka, Kanan nyu kemvu thyü-o no anyu tho thyühü, ai anyugun hü lamvu.

²⁹Efraim tsipwen le Gezer nyida nyu Kanan nyu dan hüla mvuo Kanan nyu le anyugun zen-o tsünyu yhun hü.

³⁰Zebulun tsipwen le Kitron lo Nahalal nyida nyu temi dan hümvu, tsügenyu Kanan nyu le anyugun zen-o tsünyu yhun hü, tson-o tsüdan kemvu thyüpe no anyu tho thyühü.

³¹Asher tsipwen le Akko, Sidon, Ahlab, Achzib, Helbah, Aphek lo Rehob nyida dan temi hümvu.

³²Asher temi le Kanan nyu zen-o yhun, anyugun hüla kemvu genyu.

³³Naftali tsipwen le Bethshemesh lo Bethanath nyida nyu temi dan hümvu. Naftali temi dan le Kanan nyu zen-o yhun, ai tsüdan kemvu thyüpe no anyu tho thyühü.

³⁴Amornyu le Dan tsipwen temi dan hüpe rincho ki shü lao anyu no ketejon ki ryü mvula.

³⁵Amornyu le Aijalon, shaalbim, Heres kazüthun ge yhun, ai Efraim lo Manasseh tsipwen dan le anyugun so gon-o anyu kemvu thyü pe no anyugun tho thyühü.

³⁶Edom nyu terhi le, Sela sozin tse sen-o Akrabbim kazü kenchon nyu güla.