Read Southern Rengma Naga KERATHÜ 10 Bible Online

KERATHÜ 10 - Southern Rengma Naga bible

KERATHÜ 10

¹Abimelech kesi siki Dodo nyugü Puah nyu Tola le Israel nyu kenishwi shü. A-le Efraim rincho ki Shamir nyu yhun kehü Issachar tsipwen.

²A-le chen nkikenshen Israel nyu sharhi thyü. A-le silao pe Shamir nyu sunla.

³Tola sika Gilead nyu Jair le soryü. A-le chen nkikenyhun Israel nyu sharhi thyü.

⁴A-le a-nyu peche gada ge dun kehü temi shenryü le bin. Tsüdan le Gilead kazü nyu nyida shenryü le bin, nthu keti tsü pe Jair rünyi dan tse kohü.

⁵Jair le silao pe Kamon nyu sunla.

⁶Israel nyu le Baal, Astartes, tsü ntimvu le Siria, Sidon, Moab, Ammon lo Filistian nyu tero dan rüshvuo Npugü mhundyü ka mula. Anyugun le Npugü rüshvu mvuo a-khela.

⁷Tsügenyu Npugü le anyugun ge anyunta lao Filistian lo Amor nyu no anyugun so kvu lola.

⁸Anyugun le chen tseryüo tetse Jordan nphozin Gilead ki Amornyu kazü nyu yhunkebin Israel nyu aphu nshwe nyhün.

⁹Amornyu le Jordan-e nkenryüo Judah, Benjamin lo Efraim tsipwen dan zen kega.Tson-o Israel nyu le shese sala.

¹⁰Tsüselo Israel nyu le Npugü ko-o zoshü, “Agun le agun Sunggigü, nkhelao Baal rüshvuo nmhundyü ka mula sele.”

¹¹Npugü le anyugun jokenishü. “Ijiptnyu, Amornyu, Ammonnyu, Filistian,

¹²Sidon, Amaleknyu, lo Maonnyu le gükela ki hagun nshweo hagun le akoshü. Ale tsüdan ben nyu hagun kenishü mvu ole?

¹³Ai hagun le akhelao tero kecha rüshvu tinla, tsügenyu ale hagun kenishwi nishü loho.

¹⁴Gü hagun le kejükelo tero dan ko lota. Hagun le kenjünthyü kelo ka anyugun no hagun kenishwi shülo,” tsonla.

¹⁵Ai Israel nyu le Npugü ka zoshü, “Agun le mu laso. Agun ge nyuthyü nyüyo thyülo, tson-e nthu agun kenishülo.”

¹⁶Tson-o anyugun le tesin tero dan khelao Npugü rüshvu tinla; lo a-le Israel nyu kenjün kethyü shwipe anyugun njün la.

¹⁷Tsüselo Amon nyu rihü le teri genyu gwenda lo-o Gilead nyu kensenbin thyülo. Lo Israel nyu le kequen lo-o ryü Gilead nyu Mizpah ka kensenbin thyülo.

¹⁸Tsüka Israel nyu tsipwen nmeme ka sharhi jule khinyunyu ketso-o, “Segü le rigü Amon nyu zen kega tila? Tsügü no Gilead nyu aphu so sharhi thyüti.”