Read Southern Rengma Naga KERATHÜ 11 Bible Online

KERATHÜ 11 - Southern Rengma Naga bible

KERATHÜ 11

¹Gilead nyu shüpahü kepeche nme Jephthah, le keyülachün ketyü gi nme nyu. A-pvü Gilead le,

²a-nu au nyu peche kecha le bin, tsüdan le peshü soryü ntsin anyugun kanyu Jephthah hüshwila. Anyugun le a-ka zoshü, “Nle agun pvü hon thame gwenlo nrün ndi; nle tenunyu kechanyu nyu le,” tsonla.

³Jephthah le a tsasikezen ju khelao gü Tob kazü nyu yhun tin la. A-le tsünyu temi gwakemvu dan me nsüpe no ryü a-hunpfü hü.

⁴Amon nyu le Israel nyu zen terithyü titse kegü tsüle tsüsi khe ka.

⁵Hihontse kelo ka Gilead nyu sharhi jule Tob kazü ki Jephthah zen niryü lati tse gü.

⁶Anyugun le, “Agun no Amon nyu zen kega nrün genyu ryü agun sharhi thyülo,” tson zoshü.

⁷Ai Jephthah le zonishü, “Hagun le a nrhio apvü kanyu ahü shwila. Tson njüo ntsoka kenjünthyü kelo ka aki ryü bin nle?”

⁸Anyugun le Jephthah ka zoshü, “Agun le nno agun zen gü Amon nyu zen kega lo Gilead nyu temi aphu sharhi thyü titseo ntsoka nki niryü bin nle.”

⁹Jephthah le anyugun ka zoshü, “Hagun le azen kaki nigü Amon nyu zen kega-o Npugü le kvukelo pe ngun tsü shülo, ale hagun so gonti.”

¹⁰Tsontsin anyugun le a-jokenishü, “Agun kendo. Npugü le ngun jaka shahu güle.”

¹¹Tson-o Jephthah le Gilead nyu sharhi ju zen güo temi dan le a-lope anyugun so kegon lo sharhi thyü lo. Jephthah le Mizpah ka Npugü mhundyü nyu a-jo shüshü.

¹²Tsüselo Jephthah le lilonyu nipe Amon raja gü kishüo a-ka, “Nle nyuthyüo agun ntsun lo ryü akazü hü titse ola?”

¹³Amon raja gü le Jephthah lilonyu jo kenio, “Israel nyule Ijipt ki bin-o keryü ka Amon züri ka gü Jabbok lo Jordan züri keti akazü lolo la. Tsügenyu kegwathyü ntsoka tsü khishüla mvu loshvu.”

¹⁴Jephthah le liloju ni nipe Amon raja gü kishüo

¹⁵hipe a-jokeni: “Israel nyu le Moabnyu nmvue Amonnyu kazü lolo la le tse kethyü tsüle ketsin mvule.

¹⁶Hihontse le: Israel nyu le Ijipt kheo keryü ka anyugun le kazükesi pfüthüo Akaba zükenchon ka tse Kadesh nyu ryü.

¹⁷Tson-o anyugun le lilonyu nipe Edom raja gü kishüo a-kazü pfüthü gü titse hi. Ai Edon raja gü le anyugun no gü mvula.Anyugun le Moab raja gü kakohi, ai ae anyugun no gü mvula.Tsügenyu Israel nyu le Kadesh ka bin.

¹⁸Tsüselo anyugun le kazükesi pfüthüo Edom lo Moab kazü hun sen-o Arnon züri pere kipon Moab nphozin tilo. Anyugun le tsüka kensenbin thyülo, ai anyugun le Arnon pfüthü mvu tsüle Moab nyu terhi genyu.

¹⁹Tsüsika Israel nyu le lilonyu nipe Heshbon ka Amornyu raja gü Sihon tsüo anyugun kazü kigü lo lotse hi.

²⁰Ai Sihon le Israel nyu no gü mvula. A-le a-rihü apentha zenryü Jahaz ka kequen lo-o Israel nyu whe.

²¹Ai Npugü Israel nyu Sunggigü le Sihon lo a-rihü so kvu kelo pe Israel nyu tsüla. Tsügenyu kazü tsügü nyu yhun kebin Amornyu lojvü aphu Israel nyu le lo lola.

²²Anyugun le tesinzin Arnon ka gü tesozin Jabbok keti lo nphozin kazükesi ka gü nkhünzin Jordan keti aphu nkhelo la.

²³Tsügenyu tsüle Npugü Israel nyu Sunggigü le a-temi Israel nyu genyu Amornyu hüshwi kela le.

²⁴Nle tsü khinilo la titse ndo tile? Hagun tero Chemosh le pe nketsü lihie nle ntsen logwa.Ai agun le Npugü agun Sunggigü le pe agun ketsü aphu ntsen bin ti.

²⁵Nle Zippor nyu gü Balak, Moab raja gü nyegwa letse rüchün bin le? A-le thame kae Israel nyu khin mvu. A-le Israel nyu ntsun ole?

²⁶Chen tsishen Israel nyu le Heshbon lo Aroer nyida lo tsü kehun rünyi lo Arnon züri se nyu nyida aphu nyu bin ryü laso. Hagun le nyuthyüo tsü khinilo lamvu ola?

²⁷Ale nge a-zükemvu nme thyümvu. Nle azen teri kethyü le a-zümvu. Penronshü nrün le Npugü. A-le nthu Israel lo Amon au jaka pen shüti.”

²⁸Ai Amonnyu raja gü le Jephthah jolo higü pe lihi kemvu thyüla.

²⁹Tsüselo Npugü kapu le Jephthah ge ryüla. A-le Gilead lo Manasseh pfüthü güo ranio Gilead nyu Mizpah ka ryüo Amon ki gü.

³⁰Jephthah le Npugü ka zoshwishü: “Nle ano Amon nyu nyekvulo yatselo,

³¹ale kvulo-o rani keryü ka segü le akanyu chwiryü ateno ri tiyo ale tsüpe kerokerüshvu thyüti. Ale temi tsügü pe nrüshvu lati.”

³²Tson-o Jephthah le züri gü pfüthü gü Amonnyu zen kega lo Npugü le kvukelo pe a-tsüla.

³³A-le Aroer ka gü Minnith lojvü nyu nyida nki lo gü Abel keramim keti aphu nkiela. Tsünyu temi dushvu sala, lo Israel nyu le Amon nyu nyekvu la.

³⁴Jephthah le Mizpah ki a-kanyu nikeryü ka a-nyugi le a-teno titse baja sen-o nashüo lüthyü ryü. A-nyu le tsügi tsü nti.

³⁵A-le tsügi hyu keshüka a-nyun kenjün thyü a-phi sürhen-o zoshü,“Oh, anyugi! Nle anyun bokho laso! Nyuthyüo ano ngenyu anyun kenjün thyü mvulo shvu layo? Ale Npugü ka swen-o zoshwishü laso, lo tsü ranikeloi mvuso!”

³⁶Tsontsin tsügi le a-ka zoshü, “Nle Npugü ka zoshwishü njü yatselo age tsü thyülo, Npugü le nshwikerüchün Amonnyu ge nno nkhünzo kelo khishü kela genyu.”

³⁷Ai tsügi le a-pvü ka, “Agenyu thakon me hi thyü shülo. Shyehvu genyu ahoshüo ano apvünyu zen gü kazüthun ki ho-o ano lünyu phusen gi thyüo si mvulo shvukela chechülolo.”

³⁸A-le tsügi no shyehvu genyu gülo lotse nishüla. Tson-o a-le a-pvünyuju zen kazüthun ge kügü, a-le kalumvu lo a-nyenyu ndi tse sigü kejü genyu chechü.

³⁹Shyehvu siki a-le rani a-pvü kiryü. Lo a-pvü le Npugü ka zoshwishü kenjü hontse thyüla, tson-o tsügi le phusen ka sila. Hile Israel nyu dan nyu tejvü nme thyü tinla

⁴⁰lünyu dan le chen me ka jonzi Gilead temi Jephthah nyugi chechü nrün genyu gü hü.