Read Southern Rengma Naga KERATHÜ 12 Bible Online

KERATHÜ 12 - Southern Rengma Naga bible

KERATHÜ 12

¹Efraim temi dan le teri genyu ndalo; anyugun le Jordan züri pfüthüo Zaphon ki gü Jephthah ka zoshü, “Nyuthyüo nle agun koshü mvuo terhi nken gü Amon nyu zen kega la? Agun le nle nkanyu kebin nka roshü ti!”

²Ai Jephthah le anyugun ka zoshü, “Atemi lo ale Amon nyu zen ketsin kega sala. Tson-o ale hagun koshü, ai hagun le anyugun benyu akhishwi shümvula.

³Hagun le gü kemvui tsü ale hyushüo, akeyhun-e tepen mvutse terhi nken gü anyugun zen kega, tson-o Npugü le anyugun sokvukelo pe atsüshü le. Tsonlo nyuthyüo hagun le ntsoka azen kega titse ryüjü nla?”

⁴Tsüselo Jephthah le Gilead nyu temi kequen lo-o Efraim temi zen kegao anyugun so kvula. (Efraim temi dan le, “Hagun Efraim lo Manasseh nyu kebin Gilead nyu le Efraim kachün dan le tsonzo!”)

⁵Efraim nyu no kebutin lamvu nrün genyu Gilead nyu le Jordan pfüthü lokegwa bin khwen lola. Efraim nyu ligü higü pfüthü gü titse hilo, Gilead nyu le, “Nle Efraim nyu le?” tse ketso-o a-le, “Nmvu,” tselo

⁶anyugun le no “Shibboleth” zo lotse shü ai a-le zo nshün lo mvuo “Sibboleth” tseshü. Lo anyugun le tenlo-o Jordan pfüthü kehü bin nme ka dushvu lala tse. Tsügwenkho ka Efraim nyu yie henzi kenyhun dushvula.

⁷Jephthah le chen tsero Israel sharhi thyü. Tson-o sila, lo pe a-rünyi Gilead nyu sunla.

⁸Jephthah sika Bethlehem nyu Ibzan le Israel nyu sharhi thyü.

⁹A-le a-nyu peche mi shenryü lo tenu mi shenryü tse bin. A-le a-nyu tenu ju pe pvüphun kecha ki kalu, lo pvüphun kecha ki lünyu mi shenryü zenryü a-nyu dan nu thyü. Ibzan le chen tsenyü Israel nyu sharhi thyü,

¹⁰a-le silao Bethlehem nyu sunla.

¹¹Ibzan sika Zebulun nyu Elon le chen tseryü Israel nyu sharhi thyü.

¹²Lo a-le silao Zebulun kazü nyu Aijalon ka a-sunla.

¹³Elon sika Pirathon temi Hillel nyugü Abdon le Israel nyu sharhi thyü.

¹⁴A-le a-nyu peche mi henzi lo a-nyudan nyu peche mi shenryü le bin. Abdon le chen tetse Israel nyu sharhi thyü,

¹⁵tseo sila, lo khipe Amelek nyu kazü nyu Efraim lojvü rincho ki Pirathon ka sunla.