Read Southern Rengma Naga KERATHÜ 13 Bible Online

KERATHÜ 13 - Southern Rengma Naga bible

KERATHÜ 13

¹Israel nyu le Npugü mhundyü ka mu nila, tson-o A-le Filistian nyu no chen henzi a-nyu sa gonla.

²Tsügwenkho ka Zorah rünyi nyu Manoah tse kethyü temi nme le bin. A-le Dan tsipwen. A-nu le nyuzen mvu.

³Npugü lokethyü gü le ryü tsügi ka, “Nle nyuzen mvu, ai nle whütse nyuphu pfü lo-o peche nme nnyu loti.

⁴Tsügenyu zu lihi nmvue beer-e tsü nya, lo nshünkemvu nme tyünya;

⁵lo nnyu gü nnyu lolo a-pehü thu nya, a-nnyukelo nyü gerho a-khikhokecha thyüpe Nazirit nyu hontse Sunggigü tsüla nrün genyu. A-le Filistian nyu ben nyu Israel nyu kenishwi shü nrün tho thyü soti.”

⁶Tson-o tsügi le ryü a-nyepvü ka zoshü, “Sunggigü temi nme le akiryü le, lo a-nrikeshü le Sunggigü lonyu hontse kenrin thyü. A-le dikipon ryüyo ale ketso shümvu, lo a-le a-zan pe aka zomvu.

⁷Ai a-le ale nyuphu pfü lo-o peche nme nnyu loti tse aka zoshü. A-le ano zu lihi nmvue beer-e tsü nya lo nshünkemvu lihie tyünya, ntsenyu güle yhun kebin then a-khikhokecha thyüpe Nazirit nyu hontse Sunggigü tsüla nrün genyu tse zoshü le.”

⁸Tsüselo Manoah le Npugü ka hio, “O Npugü nle nikeshü Sunggigü temi gü no niryüo nyugü nnyu lolo dihontse tiyo agun ka zoshülo,” tsonshü.”

⁹Sunggigü le Manoah kehi thyüshüo, tenu gi le lonyu dun kebin ka a-lokethyü gü le niryü. A-nyepvü Manoah le a-zen hü mvu,

¹⁰tsügenyu tsügi le tin gü a-ka, “Shwishü ta, khenyüme ki keryü temi gü tsü le niryü bin nle.”

¹¹Tsüselo Manoah le so-o a-nu then gü. A-le temi gü kigü, “Nle anu nthon keshü gü tsü le?” tse ketsoshü. Laryü a-le, “Ele” tsonshü.

¹²Tsontsin Manoah le, “Njodan le ketsin thyü ryülo ntsenyu gü no nyuthyü mvulo shvula? A-no dihontse yhun tila?” tse ketsoshü.

¹³Tsanggelo gü le zoshü, “Nnu no ale a-ka kezo aphu thyülo mvuloshvu.

¹⁴A-no vain bin ge chwikeryü lihie tyü nya, a-no zu lihi nmvue beer tsü nya lo nshünkemvu lihie tyünya. A-no ale a-ka kezo aphu thyü mvuloshvu.”

¹⁵Manoah le tsüle Npugü logü tse kethyü sha kemvu genyu a-ka zoshü, “Tin nya tselo. Tson-o ayi le ngenyu tenyünyu nme nishü tile,” tsonshü. Ai tsanggelo gü le zoshü, “Ale sun bin-e nchvütyü kemvui. Ai nle khishünyü yatselo rope kerüshvu thyüo pe Npugü kishü lo,” tsonshü.

¹⁷Manoah le, “Nzan pe ayi ka zoshülo, njo dan le ketsin thyü pen ryülo ayi no nrühvu nrün genyu.”

¹⁸Npugü logü le, “Hai le nyugenyu a-zan shanyü bin nla? Tsü le zan ndun kethyü nme le.”

¹⁹Tson-o Manoah le tenyü nyu nme lo shye peha tse pe tsonye ge ndun tho thyüshü kehü Npugü rüshvu shü.

²⁰Kershvubin ge mah le nnyü kü kebin ka Manoah lo a-nu au le Npugü logü le mahyi ge bin-o tsangge kü kejü hyushü. Tsüselo Manoah le temi gü tsüle Npugü logü tse kethyü shalo njüo a-nu au kazü nyu nkhün tsüla. Au le tsangge logü hyuni mvula.

²²Manoah le a-nu ka zoshü, “Nhi le sikelai so, nhi le Sunggigü hyukela genyu!”

²³Ai a-nu le zoshü, “Npugü le nhi boshvula nyü ya tselo, A-le nhi kerüshvu lokemvui le; lo a-le tha hi aphu pe nhi hi lo zoshü kemvui le.”

²⁴Tenugi le peche nme nnyu lo-o a-zan pe Samson tholo. Nyugü le min soryü lo Npugü le jochü pe a-tsüshü.

²⁵Lo a-le Dan kensenbin gü nyu Zorah lo Eshtaol au ja nyu kehü ka Npugü kekvu le a-thyü nkvu so.